Jifunze Kutoka Katika Neno La Mungu

Unaweza Kuitambua Ibada ya Kweli Jinsi Gani?

Makala hii ina maswali ambayo huenda umejiuliza na inakuonyesha mahali unapoweza kupata majibu katika Biblia yako. Mashahidi wa Yehova watafurahi kuzungumzia majibu hayo pamoja nawe.

1. Je, kuna dini moja tu ya kweli?

Yesu aliwafundisha wafuasi wake kuhusu dini moja tu, dini ya kweli. Dini hiyo ni kama barabara inayoelekea kwenye uzima. Yesu alisema hivi kuhusu barabara hiyo: “Wachache ndio wanaoipata.” (Mathayo 7:14) Mungu anakubali tu ibada inayotegemea Neno lake la kweli. Waabudu wote wa kweli wameunganishwa katika imani moja.—Soma Yohana 4:23, 24; 14:6; Waefeso 4:4, 5.

2. Kwa nini dini nyingi hudai kuwa za Kikristo?

Manabii wa uwongo wamepotosha Ukristo na wameutumia kuendeleza faida zao wenyewe. Kama Yesu alivyotabiri, wanajifanya kuwa “kondoo” wake lakini wanatenda kama mbwa-mwitu wenye njaa. (Mathayo 7:13-15, 21, 23) Ukristo wa uwongo ulitokea hasa baada ya mitume wa Yesu kufa.—Soma Matendo 20:29, 30.

3. Ni mambo gani yanayoitambulisha ibada ya kweli?

Waabudu wa kweli huiheshimu Biblia kuwa Neno la Mungu. Wanajitahidi kuishi kulingana na kanuni zake. Hivyo, dini ya kweli ni tofauti sana na dini zinazotegemea maoni ya wanadamu. (Mathayo 15:7-9) Waabudu wa kweli wanaishi kulingana na mambo wanayofundisha.—Soma Yohana 17:17; 2 Timotheo 3:16, 17.

Dini ya kweli inalitukuza jina la Mungu, Yehova. Yesu aliwajulisha watu jina la Mungu. Aliwasaidia kumjua Mungu na kuwafundisha wasali kwamba jina la Mungu litakaswe. (Mathayo 6:9) Katika eneo unamoishi, ni dini gani inayowahimiza watu kulitumia jina la Mungu?—Soma Yohana 17:26; Waroma 10:13, 14.

 4. Unaweza kuwatambua waabudu wa kweli jinsi gani?

Wakristo wa kweli huhubiri kuhusu Ufalme wa Mungu. Mungu alimtuma Yesu kuhubiri kuhusu Ufalme huo. Ufalme wa Mungu ndilo tumaini pekee la wanadamu. Yesu aliendelea kuhubiri kuhusu Ufalme huo hadi siku aliyokufa. (Luka 4:43; 8:1; 23:42, 43) Aliwaambia wafuasi wake wahubiri kuhusu Ufalme wa Mungu. Ikiwa mtu atakukaribia ili azungumze nawe kuhusu Ufalme wa Mungu, mtu huyo ni wa dini gani?—Soma Mathayo 10:7; 24:14.

Wafuasi wa Yesu si sehemu ya ulimwengu huu mwovu. Hawajihusishi na siasa wala migogoro ya kijamii. (Yohana 17:16) Pia, hawaigi mitazamo na mazoea yenye kudhuru ya ulimwengu.—Soma Yakobo 1:27; 4:4.

5. Ni jambo gani kuu linaloutambulisha Ukristo wa kweli?

Wakristo wa kweli wanapendana sana. Wamejifunza katika Neno la Mungu kuwaheshimu watu wa jamii zote. Ingawa mara nyingi dini za uwongo zimeunga mkono kwa dhati vita vya mataifa, waabudu wa kweli wamekataa kufanya hivyo. (Mika 4:1-4) Badala yake, washiriki wa dini ya kweli hutumia bila choyo wakati na mali zao ili kuwasaidia na kuwatia moyo wengine.—Soma Yohana 13:34, 35; 1 Yohana 4:20, 21.

Ni dini gani ambayo mafundisho yake yote yanategemea Neno la Mungu, inatukuza jina la Mungu, na kutangaza kwamba Ufalme wa Mungu ndilo tumaini pekee la wanadamu? Ni dini gani ambayo washiriki wake wanapendana na hawaungi mkono vita? Mambo ya hakika yanathibitisha kuwa ni Mashahidi wa Yehova.—1 Yohana 3:10-12.

Kwa habari zaidi, ona sura ya 15 ya kitabu hiki, Biblia Inafundisha Nini Hasa?, kilichochapishwa na Mashahidi wa Yehova.

[Picha katika ukurasa wa 16]

“Wao hutangaza hadharani kwamba wanamjua Mungu, lakini humkana kwa matendo yao.”—Tito 1:16