Yohaannisi Ajuuja 8:1-13
8 Lamalki sumuda tiri woyite, saatete darati geeshsha gordu sammi yii.
2 Anino Maganu albaanni uurritannore lamala sokkaasine laummo; insara lamala xurumba uyininsa.
3 Culkunni seekkinoonniha hixaana giirranni uduunnicho haaꞌrinohu wolu sokkaasinchi daye, kakkalote dargi mule uurri; qullaawootu baalu huuccatto macciishshantanni heedheenna, zuufaanete albaanni noohu culkunni seekkinoonnihu kakkalote darga shiqishanno gede, lowo hixaana uyinisi.
4 Sokkaasinchu anga noo hixaani wiliile, qullaawootu huuccatto ledo Maganu albira fultu.
5 Ikkollana sokkaasinchu hakkawoyintenni hixaana giirranni uduunnicho haaꞌre, kakkalote darga noo giira hakko uduunnichira wonshe uulla qole oli. Hakkiinni beleqi, huuro macciishshantu, banqo bilicci yitu, baattono huxidhu.
6 Lamala xurumba amaddinori lamalanti sokkaasine xurumba ufuuffara qixxaabbu.
7 Umi sokkaasinchi xurumbasi ufuufi. Hatte yannara mundeete ledo karsantino kaadenna giira leeltu; uullara qolleno olli; baattonniti sayikki anga giirantu; haqqenniti sayikki angano giirantu; haanjidhino hayisso baalano giirantu.
8 Layinki sokkaasinchi xurumbasi ufuufi. Buwanni nooha jawa ilaala lawannoricho baaru giddora qolle olli. Baarunniti sayikki angano mundee ikkitu;
9 baaru giddo noohu heeshshote kalaqami* giddonni sayikki anga ikkannohu reyi; markaabbate giddonnino sayikki anga hiiqqaqqante baꞌu.
10 Sayikki sokkaasinchi xurumbasi ufuufi. Caabbichu gede waraꞌa yite xabbannoti jawa beeddakko gordunni ubbu; laggannite sayikki anganna wayi buꞌate sayikki anga aanano ubbu.
11 Beeddakkote suꞌma Qaraaro* yinanni. Wayino sayikki anga qaraarannoha ikki; qaraaranno wayinni kainohunni lowo manni reyi.
12 Shoolki sokkaasinchi xurumbasi ufuufi. Arrishsho sayikki anga, aganu sayikki anganna beeddahe sayikki anga ganantu; kuni ikkinohu insati sayikki anga tunsitanno gedeetinna barrunnitinna hashshunniti sayikki anga xawaabba afidhannokki gedeeti.
13 Laummo woyite, mittu allamurchi gordu mereero buuwanni lowo huuronni togo yaanna macciishshummo: “Xurumbansa ufuuffara qixxaabbinori sasenti sokkaasine macciishshiishshannote gattinote batiꞌra xurumbu huuronni kainohunni baattote aana heedhannorira aanneꞌe, aanneꞌe, aanneꞌe!”
Lekkaalliidi Qaagiishshuwa
^ Woy “lubbo afiꞌrino kalaqami.”
^ Qaraarannonna killanno haqqi suꞌmaati. Qaallate Tiro lai.
