Yohaannisi Ajuuja 14:1-20
14 Hakkiinni laummo woyite, kuneeti Geꞌrechu Tsiyooni Ilaalira uurre no; isi ledo, isi suꞌmanna Annisi suꞌma albinsara borreessinoonniri 144,000 no.
2 Gordunni lowo wayi gedee huuronna lowo beleqi gedee huuro fultanna macciishshummo; macciishshoommo huuro, gingilaatensa gantanni faarsitanno faarsaano huuro gedeete.
3 Insano zuufaanete albaanni, hattono shoolunku heeshshote kalaqaminna geerru albaanni haaro faarso labbanno faarso faarsitanni no; uullate aaninni wodantinore 144,000 agurranna tenne faarso seekke rosa dandiinohu mittuno dino.
4 Kuri insaneeto meentunni batteessitinokkireeti; isinni insa seemootaho. Woꞌmanka woyite Geꞌrechu haꞌrannowa baala hoodesi hadhanno. Insa Maganohonna Geꞌrechoho umi laalchi gede assine mannu mereerinni wondoonnireeti;
5 afiinsanni kaphu fule diegennino; minshannireno diafidhino.
6 Wolu sokkaasinchi gordu mereero* buuwanna laummo; isira uullate aana heedhanno daga, gaꞌre, qaalinna* gosa baalantera duduwannohu hegerehu danchu duduwi noosi.
7 Isino lowo huuronni togo yii: “Magano waajje; ayirrinyeno uyiyyesi; korkaatuno isi yoo yaanno saate iillitino; hakko daafira gordo, baatto, baaranna wayi buꞌa* kalaqinoha magansidhe.”
8 Hakkiinni wolu layinki sokkaasinchi, “Ubbu! Daga baala foorreseta* yortote* woyine agganno gede assitinoti Batiꞌra Baabiloone ubbu!” yaanni umi sokkaasinchi hoode haꞌri.
9 Wolu sayikki sokkaasinchi lowo huuronni togo yaanni hoodensa haꞌri: “Ayino moyichonna misile magansiꞌrannohanna albisira woy angasira malaate adhannoha ikkiro,
10 isino karsiinsikkinni hanqisi finiinchira xorshinoonnita Maganunnita hanqu woyine aganno; qoleno qullaawa sokkaasine albaanninna Geꞌrechu albaanni giiranna ruqanu itannosi.
11 Insa shetissanno giira giddonni* fultanno wiliile hegere hegerera iima higge tunnuuqqanno; qoleno moyichonna misilesi magansidhannorira hattono suꞌmisi malaate adhitannorira barrano hashshano fooliishsho diheedhannonsa.
12 Maganu hajajo agadhitannorinna Yesuusi ammana seekkite cuꞌmidhanno qullaawooti, kaajjite uurra hasiissannonsahu togoo woyiteeti.”
13 Gordunni togo yitanno huuro macciishshummo: “Togo yite borreessi: Xaanni kayise Mootichu ledo noonsa mittimma agadhite heedhe reyitannori hagiirraammaho. Ayyaanuno, ‘Ee, loossino loosi bayichonkonni haꞌrunsannonsa daafira* daafurinsanni fooliishshidhona’ yaanno.”
14 Hakkiinni laummo woyite, kuneeti waajju gomichi no; gomichu aana manchi beetto lawannohu ofolle no; isi umoho culku baꞌlatto wodhino; anga iibbitino haanto adhe no.
15 Wolu sokkaasinchi qullaawu minihu qullaawu darginni fule gomichu aana ofollinoha lowo huuronni togo yii: “Midote saate iillitino daafira, haantokkinni mida hanafi; korkaatuno uullate aana noo gidi iillino.”
16 Gomichu aana ofollinohuno haantosi baattote widira qoli; baattono midantu.
17 Xaano wolu sokkaasinchi gordoho noohu qullaawu minihu qullaawu darginni fuli; isino iibbitino haanto adhe no.
18 Xaano wolu sokkaasinchi kakkalote darginni fuli; isira giirate aana silxaane noosi. Isi lowo huuronni, iibbitino haanto adhe noo sokkaasincho togo yii: “Baattote aana nooti woyinete laalo leꞌinona, iibbitino haantokkinni baattote aana noo woyine hunduruurro gamba assi.”
19 Sokkaasinchuno haantosi baattote widira qole, baattote aana noo woyine gamba assi; hakkiinni Maganu hanqihu jawu woyine huuncinanni kooffichi giddo tugi.
20 Woyineno katamu gobbaanni kandi; woyine huuncinanni kooffichi giddonni, alillitte faradu bixaali geeshsha iillitannotinna seendille 296 kiilomeetire* balla ikkitanno mundee fultu.
Lekkaalliidi Qaagiishshuwa
^ Woy “diilallote aana; iimaanni.”
^ Woy “afiinna.”
^ Woy “foonchuwa.”
^ Girikete Afiinni, poorniya. Qaallate Tiro lai.
^ Woy “hanqu.”
^ Woy “fugantinowiinni; usurantinowiinni.”
^ Woy “ledonsa haꞌranno daafira.”
^ Noo gedeenni tirriro, “1,600 istaadiyoone.” Mitte istaadiyoone 185 meetireeti. Guwuursha B14 lai.
