Yohaannisi Ajuuja 21:1-27
21 Anino haaro gordonna haaro baatto laummo; albi gordinna albi baatto saꞌino; baaruno xaate dino.
2 Qoleno qullaawu katami Haaro Yerusaalame gordunni Maganuwiinni dirritanna laummo; iseno minaannisera seessino idayicho gede ikkite qixxaabbe no.
3 Hatte yannara zuufaanetewiinni togo yitannota mitte lowo huuro macciishshummo: “Kuneeti Maganu dunkaani mannu ledo no; isino insa ledo heeꞌranno; insano mannasi ikkitanno. Maganu umisino insa ledo ikkanno.
4 Hindiiddo baala illensanni feyanno; konni kaꞌa reyo diheedhanno; dadillu woy raare woy shetto xaate diheedhanno. Albi coyi saino.”
5 Zuufaanete ofollinohu, “Kuneeti baalanka coye haaro assanni noommo” yii. Qoleno, “Kuni qaali hawaqiꞌnannihonna* halaalehona borreessi” yiie.
6 Hakkiinni togo yiie: “Kuni coyi woꞌmino! Ani Alfanna Omeegaati;* umihunna jeefonnihu aneeti. Gooꞌrinohura baalaho heeshshote wayi buichonni* mulla* eemmosi.
7 Qeelannohu baalu konne coye ragiꞌranno; ani Maganosi ikkeemmo; isino beettoꞌya ikkanno.
8 Ikkollana waajjaleeyyete, ammana noonsakkiri, battabbinori, tiyyiꞌnanniri, lubbo shitannori, foortannori,* agaanintete looso loossannori, kaphu maganna magansidhannorinna kaphaasinete baalu gawalo, giiratenna ruqanunni giiramanno garbi giddo tugamate. Tini layinkimeeshshu reyora lawishshaho.”
9 Jeefonnihu lamalu qoomami woꞌminota lamala sayine haadhe noori lamala sokkaasine giddonni mittu daye, “Amo, Geꞌrechu minaama idayicho leellisheemmohena” yiie.
10 Hakkiinni ayyaanu wolqanni mittu lowohu seedu ilaaliwa haaꞌre masse, qullaawu katami Yerusaalame gordunni Maganuwiinni dirritanna leellishie;
11 iseno Maganu ayirrinyinni xabbanni no. Xawaabbiseno lowo geeshsha ayirrado ikkinohu iyyaasphiidi yinanni kinchi gedeeho; qoleno kiristaali* gede xawado calallaqaati.
12 Jawunna seedu kinchu huxxi hattono 12 waalchi noose; waalchuwate 12 sokkaasine no; tonaa lamente Israeelete gaꞌre ooso suꞌmi waalchuwate borreessame no.
13 Soojjaatoonni sasu waalchi, aliyyeenni sasu waalchi, wodiidoonni sasu waalchinna galchimaanni sasu waalchi no.
14 Qoleno katamunnihu kinchu huxxira 12 safote kinna no; kinnate aanano 12nte Geꞌrechu soqqamaasinehu 12 suꞌmi borreessame no.
15 Hasaawisanni nooe sokkaasinchi, katama, katamu waalchuwanna katamunniha kinchu huxxa bikkinannita culku siqqicho amade no.
16 Katamu shoole midaado afiꞌrinoho; hojjanna godowano taaloho. Isi katama siqqichotenni bikkita, 2,220 kiilo meetire* balla ikki; katamu seendille, godowanna hojja taaloho.
17 Katamunniha kinchu huxxano bikki; huxxuno manchu bikkaasinchinnino sokkaasinchu bikkaasinchinnino 144 cigile* ikki.
18 Katamu huxxa huxxinoonnihu iyyaasphiidi yinanni kinchinniiti; katamuno xawado hincilaallo lawannoho fila culkaati.
19 Katamunnita kinchu huxxi safo addi addite ayirrado kinnanni seesiinsoonni: Umi safo iyyaasphiidi, layinkiti sempeeri, sayikkiti kelqedooni, shoolkiti emeraaldi,
20 ontikkiti serdonkisi, leekkiti serdiyooni, lamalkiti kirisooleti, settikkiti birelle, honsikkiti tophaazi, tonnikkiti kirisphiraasisi, tonaa mitikkiti yaakintinna tonaa layinkiti ametesxinoosiiti.
21 Qoleno tonaa lamunku waalchi 12 inquuti; mitto mittonka waalcho mitte inqunni seekkinoonni. Katamunniti jawa doogono xawado hincilaallo labbannote fila culkaati.
22 Qullaawu minisi Woꞌmanka Dandaanno Magano Yihowanna* Geꞌrecho ikkino daafira, katamu giddo qullaawa mine dilaoommo.
23 Katamaho arrishshote woy aganu xawaabbi dihasiisanno; mayira yiniro, Maganu ayirrinyi xawisannosi; Geꞌrechuno caabbichosiiti.
24 Dagano katamu xawaabbinni hadhanno; uullate mootoollano ayirrinyensa isiwa abbitanno.
25 Barra katamu waalchuwa horo dicufantanno; hashshuno hakkiicho horonta diheeꞌranno.
26 Insa dagate gaamaarrenna ayirrinye hakkiira abbitanno.
27 Ikkollana batte ikkinohu aye coyino hattono tiyyiꞌnannire assannohunna dogannohu aye manchino aye garinnino hakkiira dieanno; hakkiira Geꞌrechunnite heeshshote maxaafi xaaxora borreessaminohu callu eanno.
Lekkaalliidi Qaagiishshuwa
^ Woy “addaxxinannihonna.”
^ Alfanna Omeega Girikete qaalira uminna jeefote fidallaati.
^ Woy “foonchinni.”
^ Woy “calla; baatooshshiweelo.”
^ Hincilaallaamo kinchooti.
^ Noo gedeenni tirriro “12,000 istaadiyoone.” Mitte istaadiyoone 185 meetireeti. Guwuursha B14 lai.
^ 64 meetire ballaati. Qaallate Tiro lai.
^ Guwuursha A5 lai.
