Yohaannisi Ajuuja 13:1-18
13 Isino* baaru shaafi aana uurre no.
Anino tonnu buudinna lamalu umi noosihu mittu moyichi baaru giddonni fulanna laummo; buuddasira tonne baꞌlatto no; ummasi aanano Magano xontanno suꞌmuwa no.
2 Laummo moyichi daguncho lawanno; lekkasi dibi yinanni moyichita labbanno; afiisi doobbiichu afoo lawanno. Dhudhuufuno moyichoho wolqa, zuufaanenna lowo silxaane uyisi.
3 Moyichu umma giddonni mittu reyote iillishshanno mada madiꞌrinota laummo; ikkollana reyote iillishshanno mada hurtusi; baatto woꞌmano moyicho maalaꞌlitanni hoodesi hadhu.
4 Moyichoho silxaane uyino daafira, mannu hakkonne dhudhuufa magansiꞌri; “Konni moyichi gedeehu ayi no? Isi ledo olama dandaannohu ayeti?” yitanni moyicho magansidhu.
5 Booꞌnanninna Magano xonanni coyiꞌranno afoo uyinisi; qoleno 42 agani geeshsha baxinore assanno gede silxaane uyinisi.
6 Magano xonara yaano Maganu suꞌmanna Maganu heeꞌrannowa hattono gordoho heedhannore xonara afoo faꞌni.
7 Qullaawootu aana ola kayisanno gedenna qeelannonsa gede fajjinisi; qoleno gaꞌre baalate, gosa baalate, qaalu* baalunna daga baalate aana silxaane uyinisi.
8 Uullate aana heedhannori baalu magansidhannosi. Alame xintantu yannanni kayise insa giddo mittu suꞌmino gorramino Geꞌrechihu heeshshote maxaafi xaaxora diborreessamino.
9 Macca noohu macciishsho.
10 Qafadama hasiissannosihu ayino qafadamanno; bisetenni shaannohu* ayino bisetenni reya hasiissannosi; qullaawootaho cincanna ammana hasiissannonsahu togoo woyiteeti.
11 Hakkiinni wolu moyichi baattote giddonni fulanna laummo; isira geꞌrechu gede lamu buudi noosi; ikkollana dhudhuufu gede ikke coyiꞌra hanafi.
12 Isi umi moyichi albaanni hakkunni moyichi silxaane woꞌmunni woꞌma leellishanno. Baattonna baattote aana heedhannorino, reyote iillishshanno mada hurtusiha umi moyicho magansidhanno gede assanno.
13 Mannu ooso albaanni jajjabba malaatta leellishanno; iiminni uullara giira nafa dirrisanno.
14 Moyichu albaanni leellishara fajjinoonnisi malaattanni uullate aana heedhannore soꞌrisiisanno; uullate aana heeꞌranno manni, bise madiissiteenna gedensoonni huri moyichira misile seekkanno gedeno hajajanno.
15 Qoleno moyichu misilera foole* woranno gede fajjinisi; hakkuno, moyichu misile coyiꞌra dandiitanno gedeetinna moyichu misile magansiꞌra gibbannore baala shiishiishshanno gedeeti.
16 Manna baalaho yaano shiimahono jawahono, dureessahono buxichohono, borojje ikkitinokkirirano borojjehono qiniiticho angansara woy albinsara malaate worranni gede giddeessi;
17 kuni ikkinohuno, malaatu yaano moyichu suꞌmi woy suꞌmisi kiiro noosi mancho agurranna ayino hidhano hirano dandaannokki gedeeti.
18 Hayyo hasiissannohu togoo woyiteeti: Wodancha noosi manchi moyichu kiiro shallago; korkaatuno tini kiiro manchu kiirooti;* kiirosino 666.
