Yohaannisi Ajuuja 1:1-20
1 Tini ajuuja* muli yannara ikka hasiissanno coye borojjootisira leellishara Maganu, Yesuusi Kiristoosira eenna isi leellishinote. Yesuusino sokkaasinchosi soye borojjichisi Yohaannisira malaattatenni xawisinosi;
2 Yohaannisino Maganu uyinosi qaalenna Yesuusi Kiristoosi kulinosi sokka yaano laino coye baala farciꞌrino.
3 Konne masaalote qaale huurosi naggi asse nabbawannohu hagiirraamoho; konne qaale macciishshitannorinna giddosi borreessinoonnire agadhitannorino hagiirraammaho; korkaatuno murroonni yanna gambissino.
4 Yohaannisi, Iisiyu qoqqowira nootera lamalante songora:
“Noohu, heeꞌrinohunna daannohuwiinni” hattono zuufaanesi albaanni noori lamala ayyaannawiinni eltonna keeru kiꞌnera ikko;
5 qoleno “Ammanamino Naqaashshe,” hattono “reyotenni kaꞌꞌatenni bayira” ikkinohunna “uullate mootoolla Gashshaanchi” Yesuusi Kiristoosiwiinni eltonna keeru kiꞌnera ikko.
Baxannonkehuranna mundeesi widoonni cubbinkenni keere fushshinonkehura,
6 mootoolla,* hattono Maganisiranna Annisira kakkalaano assinonkehura isira ayirrinyunna wolqa hegerera ikkitosi. Hamiiꞌni.
7 Kuneeti isi gomichunni daanno; mannu baalu ille laꞌannosi; qassusirino laꞌannosi; isinni kainohunni uullate aana noo gosa baala dadillite gagaso gaꞌnitanno. Ee, kuni coyi addinta ikkanno. Hamiiꞌni.
8 “Ani Alfanna Omeegaati;* noohu, heeꞌrinohunna daannohu, Woꞌmanka Dandaannohu aneeti” yaanno Maganu Yihowa.*
9 Yesuusi haꞌrunsaancho ikkoommo daafira, kiꞌne ledo qarrisi, gashshootisinna cincasi beeqqaasincho ikkoommohu ani rodiiꞌne Yohaannisi, Maganu daafira coyiꞌroommohuranna Yesuusi daafira farciꞌroommohura Phaximoosi yinanni giddichora noommo.
10 Ayyaanu Mootichu barriwa massinoe; badheꞌyaannino xurumbu huuro gedeeta lowo huuro macciishshummo;
11 togo yitue: “Laꞌꞌattore xaaxote borreessite Efessooni, Semirineesi, Phergaamooni, Tiyaaxirooni, Serdeesi, Filaadelfiyahonna Lodooqiyaho nootera lamalante songora soyi.”
12 Hasaawisanni nooehu ayetiro laꞌꞌammora badhe hige caaqqi yuummo woyite, culkunni seekkinoonniha caabbicho worranniha lamala uduunne laummo;
13 caabbicho worranni uduunni mereerono manchi beetto lawannoha laummo; isi lekkasi geeshsha iillitino uddano uddiꞌre no; gagasohono culku hiito usudhe no.
14 Qoleno umisinna dananchisi waajjo qoffete; kaadete gedee waajjooti; illesino giirate buwani gedeete;
15 lekkasi goolu giira giddo ruqaꞌnitinota fila camo labbanno; huurosino wayi foonchi gedeeti.
16 Qiniiticho angasira lamala beeddahe haaꞌre no; afiisinni lamenka widoonni qara afidhinoti iibbado seeda bise fultu; albisino barru taalootira xabbanno arrishsho gedeeho.
17 Iso laummo woyite, reyino manchi gede ikke lekkasi hunda uwummo.
Isino qiniiticho angasi aanaꞌya wore, “Waajjitooti. Ani Umihonna Jeefonniho;
18 heeshshonnihuno aneeti; konni albaanni reyommo; xa kayinni hegere hegerera heeꞌreemmo; reyotenna Waammate* makafachuwano nooe.
19 Hakko daafira laootto coye, xa ikkanni noorenna konni gedensaanni ikkannore borreessi.
20 Qiniiticho angaꞌyara laittori lamala beeddakkonna culkunni seekkinoonni caabbicho worrannihu lamalu uduunniti qullaawa fojo tenneeti: Lamalanti beeddakko lamalante songo sokkaasinera lawishshaho; caabbicho worrannihu lamalunku uduunnino lamalante songora lawishshaho.
Lekkaalliidi Qaagiishshuwa
^ “Xawo fushsha; reqecci assa” yitanno tiro afiꞌrino.
^ Noo gedeenni tirriro, “gashshoote.”
^ Umihunna jeefonnihu yaate. Alfanna Omeega Girikete qaalira uminna jeefote fidallaati.
^ Guwuursha A5 lai.
^ Woy “Heedisi.” Mannu ooso baalate waamma xawisanno. Qaallate Tiro lai.
