Yohaannisi Ajuuja 22:1-21
22 Sokkaasinchuno Maganunna Geꞌrechu zuufaanenni fule lolahanni nooha kiristaali* gedeeha culuuta heeshshote wayi laga leellishie;
2 kuni lagi, katamunnite jawa doogo mereero eelallitte lolahanni no. Lagaho lamenka widoonni dirunni 12 higge aganu aganunkunni guma laaltannoti heeshshote haqqe no. Haqqete darono daga hursitannote.
3 Konni kaꞌa hakkiicho rumote yinanniri diheeꞌranno. Hatteentenni, Maganunna Geꞌrechu zuufaane katamu giddo heedhanno; borojjootisino qullaawa soqqansho soqqantannosi;
4 albasino laꞌanno; suꞌmisino albinsara heeꞌranno.
5 Qoleno konni kaꞌa hashshu diheeꞌranno; Maganu Yihowa* insa aana xawaabba xawisanno daafira, caabbichu woy arrishshote xawaabbi dihasiisannonsa; insano hegere hegerera mookkanno.
6 Isino togo yiie: “Kuni qaali hawaqiꞌnannihonna* halaaleho; ee, masaalaano ayyaanunni coyidhanno gede assanno Magani Yihowa,* muli yannara ikka hasiissanno coye borojjootisira leellishanno gede sokkaasinchosi soyino.
7 Kuneeti ani rahe dayemmo. Tenne xaaxo giddo nooha masaalote qaale agadhannohu baalu hagiirraamoho.”
8 Konne coye macciishshoommohunna laoommohu ani Yohaannisiti. Konne coye macciishshummonna laummo yannara, leellishanni nooe sokkaasincho magansiꞌrammora lekkasira uwummo.
9 Isi kayinni togo yiie: “Qorophi! Hatto assitooti! Anino atenna masaalaano ikkitino roduuwikki ledo hattono tenne xaaxo giddo noo qaale agadhitannori baalu ledo mitteenni soqqameemmo borojjichootilla. Magano magansiꞌri.”
10 Qoleno togo yiie: “Murroonni yanna gambissino daafira, tenne xaaxo giddo nooha masaalote qaale sumuda sumudde cuffooti.
11 Bunshe assannohu bunshe assolla; battaawinohuno battesinni heeꞌrona; keeraanchu kayinni keeraanchimmatenni heeꞌrona; qullaawuno qullaambetenni heeꞌrona.
12 “‘Kuneeti ani rahe dayemmo; mittu mittunkura loosisi garinni eemmo gumi anewa no.
13 Ani Alfanna Omeegaati;* umihunna gedensiidihu, hanafonnihunna jeefonnihu aneeti.
14 Heeshshote haqqe laalo itate qoosso afidhanno gedenna waalchuwate widoonni katama eꞌara fajjinanninsa gede, uddanonsa hayishshidhannori hagiirraammaho.
15 Woshshu,* agaanintete looso loossannori, foortannori,* lubbo shitannori, kaphu maganna magansidhannori, kapho baxxannorinna kaphaasine baalu katamu gobbaanni no.’
16 “‘Ani Yesuusi, songuwate yee konni coyi daafira kiꞌnera farciꞌranno gede sokkaasinchoꞌya soommo. Ani Daawiti rumushshootinna isi sirchooti; hattono waraꞌa yiinoho soodimaru bakkalchooti.”’
17 Ayyaanunna idayicho, “Amo!” yitanno; macciishshannohu baaluno “Amo!” yoona; gooꞌrinohu baalu dayo; hasiꞌrannohu baaluno heeshshote waa mulla* adho.
18 “Tenne xaaxora nooha masaalote qaale macciishshannohura baalaho farciꞌreemmo: Ayino konni coyi aana mittore lediro, Maganu tenne xaaxo giddo borreessinoonni qoomama ledannosi;
19 ayino tenne masaalote xaaxo giddo borreessinoonni qaali aaninni mittoreno xeisiro, Maganu tenne xaaxora kulloonnite heeshshote haqqewiinninna qullaawu kataminni isi qeecha xeisanno.
20 “Konni coyi daafira farciꞌrannohu ‘Ee, ani rahe dayemmo’ yaanno.”
“Hamiiꞌni! Mooticha Yesuusa, amo.”
21 Mootichu Yesuusi elto qullaawootu ledo ikkito.
Lekkaalliidi Qaagiishshuwa
^ Hincilaallaamo kinchooti.
^ Guwuursha A5 lai.
^ Woy “addaxxinannihonna.”
^ Guwuursha A5 lai.
^ Umihunna jeefonnihu yaate. Alfanna Omeega Girikete qaalira uminna jeefote fidallaati.
^ Maganu albaanni tiyyiꞌnannire assanno manna kulanno qaaleeti.
^ Woy “calla.”
