Yohaannisi Ajuuja 20:1-15
20 Anino qilete makafachanna jawa sansalate anga amadinohu mittu sokkaasinchi gordunni dirranna laummo.
2 Isino dhudhuufa amade 1,000 diro usuri; kuni dhudhuufi, Daawuloosinna Sheexaane yinanniho biꞌre hundi hamashshooti.
3 Qoleno kuni 1,000 diri goofa geeshsha xaate daga soꞌrisiisannokki gede qilete giddora ole cufi; aanahono sumuda sumudi. Hakkunni gedensaanni shiima yanna tidhama hasiissannosi.
4 Anino zuufaanna laummo; zuufaannate aana ofoltinorira yoo yitanno gede silxaane uyininsa. Ee, Yesuusi daafira farcidhinohuranna Maganu daafira coyidhinohura shinoonni* manni lubbuwa,* hattono moyicho woy misilesi magansidhinokkirenna albinsaranna angansara malaate adhitinokkire laummo. Insano heeshshonnire ikkite Kiristoosi ledo 1,000 diro mookku.
5 (Wolu reyino manni kuni 1,000 diri goofa geeshsha heeshshonniha diꞌꞌikkino.) Tini umi kaooti.
6 Umi kao beeqqaasine ikkitinori baalu hagiirraammahonna qullaawootaho; layinki reyo insa aana silxaane diafidhino; hatteentenni insa Maganunna Kiristoosi kakkalaasine ikkitanno; isi ledono 1,000 diro mookkanno.
7 Kuni 1,000 diri goofanni heeꞌreennanni, Sheexaanu usurunni tidhamanno;
8 isino, shoolente uullate maddera heedhanno daga, Googinna Maagoogi soꞌrisiisaranna olaho mitteenni gamba assara fulanno. Kiironsano baaru shaafi gedeeti.
9 Insano uulla woꞌmate aana fincantu; qullaawootu qachanna baxamino katamano doyissitu. Ikkollana gordunni giira dirrite shakki assite ittunsa.
10 Soꞌrisiisanni noonsaha Daawuloosino, moyichunna kaphu masaalaanchi noowa giiratenna ruqanu garbi giddora olli; insano barranna hashsha hegere hegerera shettanno.*
11 Anino mitte jawa waajjo zuufaanenna zuufaanete aana ofollinoha laummo. Baattonna gordu albisinni xooqi; higiwano dianfoonni.
12 Reyitinori, jajjabbunna shiimmaaddu zuufaanete albaanni uurrite noore laummo; maxaaffate xaaxono faꞌnantu. Wole xaaxono faꞌnantu; tini heeshshote maxaafi xaaxooti. Reyitinorira maxaaffate xaaxora borreessinoonnirinni loosinsa garinni yoo yini.
13 Baaruno giddosi noore reyitinore uyi; reyonna Waammano* giddonsa noore reyitinore uyitu; insarano mittu mittunkura loosinsa garinni yoo yininsa.
14 Reyonna Waammano* giirate garbi giddora olli. Kuni giirate garbi layinkimeeshshu reyora lawishshaho.
15 Qoleno heeshshote maxaafi giddo borreessinoonnikkire baala giirate garbi giddora olli.
Lekkaalliidi Qaagiishshuwa
^ Noo gedeenni tirriro, “meesanetenni dolle shinoonni.”
^ Woy “Heedisi.” Mannu ooso baalate waamma xawisanno. Qaallate Tiro lai.
^ Woy “Heedisi.” Mannu ooso baalate waamma xawisanno. Qaallate Tiro lai.
