Yohaannisi Ajuuja 7:1-17
7 Hakkunni gedensaanni, shoole sokkaasine shoolente baattote maddera uurrite noore laummo; insano baattote woy baaru woy aye haqqicho aana hili bubbeno bubbissannokki gede, shoolenta uullate bubbe seekkite amadde no.
2 Qoleno heeshshote Magani sumudi noosihu wolu sokkaasinchi arrishsho fultanno raginni* iima hige fulanna laummo; isino baattonna baara gawajjitara silxaane uyinoonninsare shoolenta sokkaasine lowo huuronni
3 togo yiinsa: “Maganinke borojjooti albira sumuda sumundammo geeshsha, baatto woy baara woy haqqe gawajjitinoonte.”
4 Sumundoonni manni kiirono macciishshummo; kiironsano 144,000; sumudantinohuno mitte mittente Israeelete ooso gaꞌre giddonniiti:
5 Yihudu gaꞌrenni 12,000 sumundoonni;Roobeeli gaꞌrenni 12,000;Gaadi gaꞌrenni 12,000;
6 Aseeri gaꞌrenni 12,000;Niftaaleemi gaꞌrenni 12,000;Minaase gaꞌrenni 12,000;
7 Simooni gaꞌrenni 12,000;Leewi gaꞌrenni 12,000;Yisaakoori gaꞌrenni 12,000;
8 Zaabilooni gaꞌrenni 12,000;Yooseefi gaꞌrenni 12,000;Biiniyaami gaꞌrenni 12,000 sumundoonni.
9 Hakkunni gedensaanni laummo woyite, kuneeti baalante daga, gaꞌre, gosanna qaali* giddonni fultinoti mittu manchino kiira dandaannokkiti lowo daga waajjo uddano uddidhe zuufaanete albaanninna Geꞌrechu albaanni uurrite no; saattu darono anga adhite no.
10 Insa lowo huuronni, “Gato afiꞌnoommohu zuufaanete ofollino Maganinkewiinniitinna Geꞌrechuwiinniiti” yitanni raartu.
11 Sokkaasine baalanti zuufaane, geerranna shoolenka heeshshote kalaqama doyissite uurrite no; insano zuufaanete albaanni albinsanni kumbuulte Magano magansidhu;
12 togo yitu: “Hamiiꞌni! Guweenyu, gaamaarre, hayyo, galatu, ayirrinyu, wolqanna jawaante hegere hegerera Maganinkera ikkito. Hamiiꞌni.”
13 Geerru giddonni mittu, “Kuri waajjo uddano uddidhinori ayeooti? Hiikkiinni dagginoreeti?” yee xaꞌmie.
14 Anino hakkawoyintenni, “Mootichaꞌya, afoottohu ateeti” yuummosi. Isino togo yiie: “Kuri quuxxote qarra saꞌe dagginoreeti; uddanonsano Geꞌrechu mundeenni hayishshidhe waajjo assidhino.
15 Insa Maganu zuufaanera albaanni noohu iseraati; qullaawu minisi giddono barranna hashsha isira qullaawa soqqansho soqqantanni no; zuufaanete ofollinohuno dunkaanasi aanansa diriirsanno.
16 Xaate dihudidhanno; qoleno digoodhanno; arrishsho digantannonsa; iibbilluno digiirannonsa;
17 korkaatuno zuufaanete mereero noo Geꞌrechi allaalannonsa; heeshshote wayi buichowano* haaꞌre massannonsa. Maganuno hindiiddo baala illensanni feyanno.”
