Yohaannisi Ajuuja 2:1-29
2 “Efessooni songo sokkaasinchira togo yite borreessi: Qiniiticho angasira lamala beeddakko haaꞌre noohunna culkunni seekkinoonnihu lamala caabbicho worranni uduunni mereero haꞌramannohu togo yaanno:
2 ‘Loosokki, daafurokkinna cincakki afoommo; qoleno busha manna sammi yite laꞌꞌattokkitanna soqqamaasine ikkitukkinni “Ninke soqqamaasinete” yitannore fonqolte, kaphaasine ikkansa buuxoottota afoommo.
3 Hakkiino saꞌe kaajjite uurrootto; suꞌmiꞌyara yite lowo qarra cincite saootto; wolqano dibaootto.
4 Ikkollana misheemmohe coyi no; hakkuno umi baxillekki agurootto.
5 “‘Hakko daafira, hiikkiinni uwoottoro qaagi; maaro ei; alba assattoreno assi. Giwittoro kayinni dayemmohe; maaro ea giwittoro caabbicho worranni uduunnichokki bayichisinni haaꞌre hooleemmo.
6 Ikkirono mittu galantannihe coyi no: Ani giweemmoha Niqoolootu looso* giwootto.
7 Ayyaanu songuwate yaannore macca noohu macciishsho: Qeelannohura Maganu gannate giddo noota heeshshote haqqicho laalo itara fajjeemmosi.’
8 “Semirineesi songo sokkaasinchirano togo yite borreessi: ‘Umihunna Jeefonnihu,’ reyihunna galagale heeshshonniha ikkihu togo yaanno:
9 ‘Qarrakkinna buximakki afoommo; ikkollana ati dureessaho; Ayihude ikkitukkinni ‘Ninke Ayihudete’ yitannori xontanno xono afoommo; insa Sheexaanu gaamo miillaati.*
10 Amadahera noo qarra waajjitooti. Kuneeti woꞌmunni woꞌma jifantinanni gedenna tonnu barri geeshsha qarra adhitinanni gede, Daawuloosi kiꞌne giddonni mito usuru minira eessanno. Reyote geeshsha ammanamoottoha ikkoottota leellishi; anino heeshshote baꞌlatto eemmohe.
11 Ayyaanu songuwate yaannore macca noohu macciishsho: Qeelannoha layinkimeeshshu reyo horonta digawajjitannosi.’
12 “Phergaamooni noo songo sokkaasinchira togo yite borreessi: Lamenka widoonni qara afidhinoti iibbado seeda bise noosihu togo yaanno:
13 ‘Heeꞌrattohu Sheexaanu zuufaane noowa ikkinota afoommo; ikkirono, suꞌmaꞌya seekkite cuꞌmiꞌrootto; ammanamino naqaashsheꞌya Antiphaasi Sheexaanu heeꞌrannowa kiꞌne katamira shini waro nafa ane ammanattota dikaadootto.
14 “‘Ikkollana shiimu misheemmohe coyi no; mereerokki Beleaami roso haꞌrunsitannori no; Beleaami, Israeelete ooso kaphu magannara kakkalloonnire ittanno gedenna foortanno* gede albansaanni guficho worara Baalaaqi rosiisino.
15 Niqoolawoositi ammaꞌnote gaamo rosiissanno roso haꞌrunsitannorino mereerokki no.
16 Hakko daafira maaro ei. Giwittoro kayinni atewa rahe dayemmo; afiiꞌyara noote seeda bisennino qaseemmonsa.
17 “‘Ayyaanu songuwate yaannore macca noohu macciishsho: Qeelannohura maanxoonni menni aaninni kayise eemmosi; qoleno shiima waajjo kincho* eemmosi; kinchu aana, adhannoha agurranna ayino afannokkiha haaro suꞌma borreessinoonni.’
18 “Tiyaaxirooni noo songo sokkaasinchira togo yite borreessi: Giirate buwano labbanno illenna fila camo gedee lekka noosihu Maganu Beetti togo yaanno:
19 ‘Loosokki, baxillekki, ammanakki, soqqanshokkinna cincakki afoommo; qoleno gedensiidi loosikki umi loosokki roorannota afoommo.
20 “‘Ikkollana misheemmohe coyi no; hakkuno, ‘Ani masaalaanchote’ yitannota hattee mancho Elzaabeeli sammi yite worte agurootto; ise foortanno* gedenna kaphu magannara kakkalloonnire ittanno gede borojjootaꞌya rosiissanno hattono soꞌrisiissanno.
21 Maaro eꞌanno gede yanna oommose; ise kayinni foorresera* maaro ea gibbino.
22 Kuneeti maꞌnanni kaꞌannokki gede asseemmose; ise ledo soorritannorino loosisera maaro ea gibburo, quuxxote qarri giddo tugeemmonsa.
23 Songuwa baala ani giddoyidi hedonna* wodana qonqolche laeemmoha ikkoommota affanno gede, oosose qoomamunni shee gudeemmo; mittu mittunkurano loosiꞌne garinni eemmoꞌne.
24 “‘Ikkollana konne roso haꞌrunsitinannikkirira baalahonna “Dahaawinoha Sheexaanu coye” yinannire affinoonnikkirira Tiyaaxirooni heedhinannirira gattinoonnirira togo yeemmo: Kiꞌnera wole duha lede diduhisiiseemmoꞌne.
25 Ikkollana ani daammo geeshsha nooꞌnere seekkitine cuꞌmidhe.
26 Qoleno qeelannohuranna goofimarchu geeshsha loosiꞌyanni kaajjannohura dagate aana silxaane eemmosi;
27 isi, doru uduunni gede cancanantanno gede, manna siwiilu siqqonni gashshanno;* tini ani Anniꞌyawiinni adhoommo gedee silxaaneeti.
28 Soodimaru bakkalchono eemmosi.
29 Ayyaanu songuwate yaannore macca noohu macciishsho.’
Lekkaalliidi Qaagiishshuwa
^ Woy “Niqoolawoositi ammaꞌnote gaamo loossanno looso.”
^ Noo gedeenni tirriro, “Sheexaanu xaadi mineeti.”
^ Girikete Afiinni, poorniya. Qaallate Tiro lai.
^ Woy “carcho.”
^ Qaallate Tiro lai.
^ Girikete Afiinni, poorniya. Qaallate Tiro lai.
^ Noo gedeenni tirriro, “mulenna.”
^ Noo gedeenni tirriro, “allaalanno.”
