Yohaannisi Ajuuja 16:1-21
16 Anino qullaawu darginni mitte lowo huuro lamalanta sokkaasine, “Hadhine Maganu hanqi noota lamalanta sayinna uullate aana dunne” yitanna macciishshummo.
2 Umi sokkaasinchi haꞌre sayinesira nooha uullate aana duni. Hatte yannara moyichu malaati noonsariranna misilesi magansidhannorira shetissannoti busha mada fultunsa.
3 Layinki sokkaasinchi sayinesira nooha baaru giddo duni. Baaruno reyino manchi mundee gedeeha ikki; heeshshote kalaqami baaluno reyi;* ee, baaru giddo noori reyi.
4 Sayikki sokkaasinchi sayinesira nooha laggatenna buꞌate* giddo duni. Insano mundee ikkitu.
5 Anino wayibbate aana silxaane noosi sokkaasinchi togo yaanna macciishshummo: “Noottohunna heeꞌroottohu, ammanamootto Maganonke, tenne yoo yootto daafira ati keeraanchoho;
6 korkaatuno insa qullaawootunna masaalaanote mundee duntino; atino agganno gede mundee oottonsa; tini insara maltinote.”
7 Kakkalote dargino, “Ee, Woꞌmanka Dandaatto Magano Yihowa,* yookki baala halaalaanchotenna keeraanchote” yaanna macciishshummo.
8 Shoolki sokkaasinchi sayinesira nooha arrishshote aana duni; arrishshono iibbillisenni manna giirtanno gede fajjinise.
9 Mannuno lowo iibbillinni giirami; ikkollana insa kuri qoomami aana silxaane noosi Magano xontu; qoleno maaro dieꞌino; isirano ayirrinye diuyitino.
10 Ontikki sokkaasinchi sayinesira nooha moyichu zuufaanera duni. Gashshootisino tunsicho ikki; insano shettonsanni kainohunni arrawonsa corqa hanaffu;
11 ikkollana shettonsanninna madansanni kainohunni gordu Magano xontu; loosinsarano maaro dieꞌino.
12 Leekki sokkaasinchi sayinesira nooha jawu Efiraaxisi Lagira duni; arrishsho fultanno raginni* dagganno mootoollara doogo qixxaabbannonsa gede wayi xoi.
13 Anino becheꞌnaama labbannoti ayyaanunni coyiꞌnoonniti sase battete qaalla,* dhudhuufu afiinni, moyichu afiinninna kaphu masaalaanchi afiinni fultanna laummo.
14 Isinni kuri qaalla agaanintete ayyaaninni coyiꞌnoonnite; insa addi addi maalale loossanno;* qoleno Woꞌmanka Dandaanno Maganihu batiꞌru barri oliwa uullate mootoolla baalanta gamba assitara insawa hadhanno.
15 “Kuneeti mooraanchu gede ikke dayemmo. Mullichu haꞌrannokki gedenna mannu teedasi laꞌꞌannokki gede, baqqi yee heeꞌrannohunna uddanosi agadhannohu hagiirraamoho.”
16 Insano mootoolla, Ibiraawootu Afiinni Armagedooni* yinanni bayicho mitteenni gamba assitu.
17 Lamalki sokkaasinchi sayinesira nooha diilallote aana duni. Hatte yannara qullaawu darginni zuufanetewiinni, “Goofino!” yitannoti lowo huuro fultu.
18 Qoleno banqo bilicci yitu; huuro macciishshantu; hattono beleqi; baattono mannu uullate aana heeꞌra hanafi yannanni kayinse anfe egenninoonnikki garinni lowo geeshsha huxidhu; baattote huxano wolqaataametenna* batiꞌrate.
19 Batiꞌru katami sasewa beehami; dagate katammano diigantu; lowo hanqisi woꞌminoha woyinete finiincho uyinannise gede Maganu Batiꞌra Baabiloone qaagi.
20 Giddichuwa baala xooqqu; ilaallano higguwa hoongi.
21 Hakkiinni jajjabba kaadete kinna gordunni mannu aana dirritu; mittu mittunku kaadete kinchi mitte taalaante* ikkanno; kaadete qoomami lowo geeshsha batiꞌra ikkino daafira mannu Magano xoni.
Lekkaalliidi Qaagiishshuwa
^ Woy “lubbo baala reyitu.”
^ Woy “foonchuwate.”
^ Guwuursha A5 lai.
^ Woy “soojjaatinni.”
^ Noo gedeenni tirriro, “battete ayyaanna.”
^ Noo gedeenni tirriro, “malaatta leellishshanno.”
^ Girikete Afiinni, Harmagedooni. “Megido Ilaala” yitanno tiro afiꞌrinohu Ibiraawootu Afiinni dayinoho.
^ Noo gedeenni tirriro, “halaꞌladotenna.”
^ Mitte Girikete taalaante 20.4 kiilo giraameeti. Guwuursha B14 lai.
