Yohaannisi Ajuuja 11:1-19
11 Siqqote* gedee shomboqqo uyinie; isino togo yiie: “Kaꞌe Maganunnihu qullaawu miniha qullaawa darga, kakkalote darganna hakko magansidhannore bikki.
2 Ikkollana qullaawu minihu qullaawu dargi gobbaanni noo hoowe gudisse aguri; bikkitooti; korkaatuno hakkiicho dagate uyinoonni; insa qullaawa katama 42 agana kaddanno.
3 Anino lamenti naqaashsheꞌya xiddu uddano uddidhe 1,260 barra masaalo coyidhanno gede asseemmo.”
4 Insa lame ejersu haqqichonninna caabbicho worrannihu lamu uduunnichinni lawinsoonni; insano uullate Mootichi albaanni uurrite no.
5 Ayino insa gawajjara hasiꞌriro giira afiinsanni fulte diinnansa ittanno. Ayino gawajjansara hasiꞌriro hatto ikke reya hasiissannosi.
6 Insa masaalo coyidhanno barruwara xeena ganannokki gede gordo cufate silxaane noonsa; qoleno waa mundeete soorratenna hasidhu yanna baalate duuchunku gari qoomaminni baatto ganate silxaane noonsa.
7 Farcidhe kaꞌanno woyite qiletenni fulanno moyichi insa aana ola kayisanno; insa qeelanno hattono shaanno.
8 Reeshshinsano jawu katamite halaꞌlado doogora diriiranno; konne katama lawishshunni Soddoomanna Gibitse yine woshshinanni; Mootichinsano haqqaho sutaminohu hakkooti.
9 Addi addi gosanni, gaꞌrenni, qaalinninna* daganni fulino manni sase barranna darate reeshshansa laꞌꞌanno; reeshshansa madaarrarano difajjanno.
10 Kuri lamenti masaalaano baattote aana heedhannore shetissino daafira, insa reyonni kainohunni uullate aana heeꞌranno mannira tashshi yaannonsa; qoleno hagiidhite ikkitannota hoogganno; mimmitohono afansha uyitanno.
11 Sasu barrinna daratu gedensaanni Maganuwiinni dayinohu heeshshote ayyaani einsa; insano kaꞌe lekkansanni uurritu; insa laino mannino lowo geeshsha waajji.
12 Hakkiinni gordunni lowo huuro, “Kawira fulle” yitannansa macciishshitu. Insano gomichunni gordo fultu; diinnansano laꞌunsa.*
13 Hatte saatera baatto lowo geeshsha huxidhu; katamunniti tonnikki anga ubbu; baattote huxanonni 7,000 manni reyi; gattinorino lowo geeshsha waajjitu; gordu Maganirano ayirrinye uyitu.
14 Layinki aanneꞌe saꞌino. Kuneeti, sayikki aanneꞌe rakke dagganni no.
15 Lamalki sokkaasinchi xurumbasi ufuufi. Gordoho togo yitannoti lowo huuro macciishshantu: “Alamete gashshooti Mootichinkehanna isi Buurinohu* Gashshoote ikki; isino hegere hegerera moote ikke gashshanno.”
16 Maganu albaanni zuufaanensara ofolte noori 24 geerrino albinsanni kumbuulte Magano magansidhu;
17 togo yitu: “Noottohunna heeꞌroottohu Woꞌmanka Dandaatto Magano Yihowa,* jawa silxaanekki amadoottohuranna Moote ikkite gashsha hanafootto daafira galanteemmohe.
18 Ikkollana daga hanqitu; ate hanqino dayi; reyitinorira yoo yaattoti, borojjootakki masaalaano, qullaawootanna suꞌmakki waajjitannore shiimmaaddanna jajjabba baꞌraasattoti hattono baatto huntanni noore hunattoti murroonni yanna daggino.”
19 Gordoho noohu Maganunnihu qullaawu minihu qullaawu dargi faꞌname no; gondoorisi taawootino qullaawu minisihu qullaawa darga leelli. Qoleno banqo bilicci yitu, huuro macciishshantu, beleqi, baatto huxidhu, jajjabba kaadeno dirritu.
