Yohaannisi Ajuuja 15:1-8
15 Wole jawanna dhagge ikkanno malaate gordoho laummo; lamala sokkaasine lamala qoomama haadhe no. Maganu hanqi gumulamannohu kurinni ikkino daafira, kuri jeefote qoomamaati.
2 Anino giirate ledo karsaminoha hincilaallote baara lawannoricho laummo; qoleno moyicho, misilesinna suꞌmisi kiiro qeeltinori Maganu gingilaate* amadde hincilaallote baari mule uurrite no.
3 Insa Maganu borojjichi Muse faarsonna Geꞌrechu faarso togo yitanni faarsitanni no:
“Woꞌmanka Dandaatto Magano Yihowa,* loosikki batiꞌrahonna dhaggete. Hegere Moote, doogokki keeraanchotenna halaaleho.
4 Yihowa,* ate waajjannokkihunna suꞌmakki guwisannokkihu ayeti? Ammanamoottohu ate callaati. Keeraancho wodhokki xabbino daafira, daga baala dagge albakkiinni magansidhannohe.”
5 Hakkunni gedensaanni laummo woyite, naqaashshete dunkaanihu qullaawu dargi gordoho faꞌname no;
6 lamala qoomama haadhinori lamalanti sokkaasine, coꞌittenna shalaalatenni gannoonnita bilicci yitanno uddano uddidhe hattono gagasoho culku hiito wodhite qullaawu darginni fultu.
7 Shoolunku heeshshote kalaqami giddonni mittu, hegere hegerera heeꞌranno Magani hanqi woꞌminota lamala culku sayinna lamalante sokkaasinera uyinsa.
8 Maganu ayirrinyinninna wolqanni kainohunni qullaawu dargira wiliile woꞌmitu; qoleno, lamalante sokkaasinehu lamalu qoomami goofa geeshsha, ayino qullaawa darga ea didandiino.
