Pana hari, ked e Devlesi nevi nebesko vladavina ka vladini upro sa o manuša, i phuv ka ovel bahtalo than kuri o manuša ka živinen zajedno hem ko jekhipe. On ka ćeren šukar buti koja ka radujini len. O Devel ćhivđa e Isuse Hriste te vladini upri celo phuv. Avdije, but vladarija na brininena pe ćaće ando manuša. Ama, o Isus nane asavko, odolese so uvek ka ćerel odova soj tano najšukar e manušenđe. Ov ka vladini pherdo mangipaja, ka ovel šukar, milosrdno hem pravedno kralj (Isaija 11:4).

O manuša na ka oven odvojime premali nacija ili poreklo. O manuša ko celo sveto ka oven ko jekhipe (Otkrivenje 7:9, 10). Sare kola ka živinen ki phuv ka mangen e Devle hem pe pašutnen, hem zajedno ko mir ka ćeren ko odova te ispunini pe e Devlesi namera, ađahar so ka brininen pe andi phuv koja o Devel dinđa len (Psalam 115:16).

Ked e Devleso Kraljevstvo ka vladini, amaro Stvoritelj ka cidel sa o prirodna katastrofe (Psalam 24:1, 2). Ked hine o Isus ki phuv, ov smirinđa jekh but bari oluja. Odoleja mothovđa so šaj te ćerel e Devlese silaja (Marko 4:39, 41). Ked o Isus ka vladini, niko na ka ovel le razlog te daral ando prirodna katastrofe. Ko e Devleso Kraljevstvo, amen ka ova ko mir e životinjencar hem više niko na ka uništini amari phuv (Osija 2:18).

Sa o manuša ka ovel len savršeno sastipe. Niko na ka naborsaljol, na ka phurjol hem na ka merel (Isaija 35:5, 6). O manuša ka živinen ki šuži hem čisto phuv, isto sar so hine len o Adam hem i Eva ko Edenski vrt. Ko nevo sveto, isto sar ko Edensko vrt, i phuv ka bijani pherdo habe hem sa o manuša ka ovel len dovoljno hajbase (Postanak 2:9). Sar ko vreme ked živinđe o Izraelcija, kola angleder hine e Devleso narodo, ko raj sare „ka han [poklo] maro đi na ćaljona“ (Levitska 26:4, 5).

Ko e Devleso Kraljevstvo, o manuša ka uživinen ko mir, ka oven ljubazna jekh premalo jekheste hem poštena. Na ka oven više mariba, niko na ka koristini pi vlast ko lošno način hem sare ka ovel len sa so valjani lenđe. Ki Biblija pisini: „Svako ka bešel tali pi drakh hem tali pi smokva hem niko na ka daravi len“ (Mihej 4:3, 4).

Svako porodica ka ovel la po ćher hem na ka daral so ka našali le. Isto ađahar, ka dobinen nagrada asi buti koja ka ćeren. Sar so i Biblija phenela, okola kola ka živinen ko nevo sveto „na ka ćeren buti badijava“ (Isaija 65:21-23).

Ki Biblija pisini: „I phuv ka ovel pherdi đandipaja ando Jehova“ (Isaija 11:9). E manušen kola ka živinen ko nevo sveto, o Jehova amaro Stvoritelj, ka sikavi andi pi but bari mudrost hem ando but šukar buća kola stvorinđa. On na ka koristinen po đandipe te ćeren oružje ili te povredinen avere manušen (Isaija 2:4). On ka sikljon sar te živinen ko mir avere manušencar hem sar te brininen pe andi phuv (Psalam 37:11).

O Devel brininđa pe ando odova te pripremini i phuv te šaj amen te uživina ko životi svako dive. Ov mangela o manuša večno te živinen ki phuv (Psalam 37:29; Isaija 45:18). Te šaj te ispunini odova, o Devel „zauvek ka uništini o meribe“ (Isaija 25:8). I Biblija obećini: „Na ka ovel više meribe, ni muke, ni rojbe, ni dukha“ (Otkrivenje 21:4). O Devel ka del sa e manušenđe prilika te živinen večno, hem okolenđe kolen spasinđa ked uništinđa akava lošno sveto, hem bute manušenđe kola mule a kolen ka uskrsnini ko nevo sveto (Jovan 5:28, 29; Dela apostolska 24:15).

 Milionija manuša već akana spreminena pe te živinen ko e Devleso nevo sveto kova tano but paše. Iako tane nesavršena, on pana akana dena sa pestar te oven asavke manuša save o Devel mangela te oven ko raj. Sar? Ađahar so sikljona ando Jehova hem ando okova kas ov bićhalđa, o Isus Hrist (Jovan 17:3).

Sikljov pobuter ando odova sar šaj te preživine o krajo ando akava sveto hem te živine ko pošukar sveto kova pana hari ka avel. Ako mangeja, šaj besplatno te proučine i Biblija e Jehovase svedokonencar prekali knjiga Ov bahtalo zauvek!