Ri nabʼe carta xtaq bʼi chke ri aj Corinto 9:1-27
-
Ri u ejemplo ri Pablo are chiʼ apóstol (1-27)
9 ¿La ma ta kinkowinik kinbʼan ronojel ri kwaj? ¿La ma ta in apóstol? ¿La ma ta wilom uwach ri Qajaw Jesús? ¿La ma ta rumal ri chak xinbʼan che ri Qajaw xiwetaʼmaj chrij ri areʼ?
2 Paneʼ e kʼo kkichomaj che in apóstol taj, pero ri ix qas kikojo che in apóstol. Rumal che ri ix ix jetaneʼ jun sello ri kkʼutuwik che in rapóstol ri Qajaw.
3 Are waʼ ri kwaj kinbʼij chke ri kinkiyoqʼo.
4 ¿La ma ta kʼo qa derecho kojwaʼik?
5 ¿La ma ta kʼo qa derecho kojkʼuliʼ rukʼ jun ixoq ri kkojon chrij ri Qajaw y kqakʼam bʼi qukʼ pa taq ri qa viajes, je jas kkibʼan ri nikʼaj chi apóstoles, junam kukʼ ri rachalal ri Qajaw y ri Cefas?*
6 ¿La xaq xiw ri in y ri Bernabé kojchakunik rech kʼo ri kajwataj chqe?
7 ¿La kʼo jun soldado che are kbʼanow ri u gasto? Y ri ktikow uva, ¿la ma ta kutij re ri uwach? Y ri ajyuqʼ, ¿la ma ta kkowinik kutij jubʼiqʼ re ri ki leche ri rawaj?*
8 Xaq ta in kinbʼinik, xaneʼ xuqujeʼ ri Ley* kubʼij wariʼ.
9 Rumal che ri Ley ri xyaʼ che ri Moisés kubʼij: «Utz taj kakoj jun chim chutzaʼm ri wakax are chiʼ kchakun chrij ri triko». Pero, ¿la xaq xiw chkij ri wakax kel wi ukʼuʼx ri Dios? No.
10 Xubʼij kan wariʼ rumal che xuqujeʼ kel ukʼuʼx chqe oj. Rumal che ri achi ri kuchakuj ri ulew y ri ktobʼan che resaxik ri triko pa ri pajo, retaʼm che kuriq na jubʼiqʼ re ri uwach ri tikoʼn.
11 We oj xojtzijon ri utzij ri Dios chiwe, ¿jas kʼu che awas we kojitoʼ rukʼ ri kajwataj chqe?
12 We tajin keʼitoʼ e nikʼaj winaq chik, ¿la ma ta are más rajawaxik riʼ kojitoʼ oj? Pero ri oj kʼo ta qatom chiwe, xaneʼ qachʼijom kʼi kʼax rech ri ix qas kixkojon chrij ri utz taq noticias chrij ri Cristo.
13 ¿La ma ta iwetaʼm che ri achijabʼ ri kechakun pa ri templo kkitij ke ri jastaq ri kkikʼam bʼi ri winaq chilaʼ? Y ¿la ma ta iwetaʼm che ri kechakun rukʼ ri altar kkikʼam kan jubʼiqʼ ke ri kyaʼ cho ri altar?
14 Rumal che ri Qajaw xubʼij kanoq che ri kkitzijoj ri utz taq noticias kkiriq na ri kajwataj chke rumal waʼ we chak riʼ.
15 Pero ri in kʼo ta nutom chiwe, y xintzʼibʼaj ta bʼi wariʼ chiwe rech kʼo kiya chwe. Ri in kinkikot che utzijoxik ri utzalaj taq noticias paneʼ kʼo ta xiya chwe, y kwaj taj che nijun kresaj waʼ we kikotemal chwe.
16 Kinbʼan ta nim che wibʼ che utzijoxik ri utzalaj taq noticias, rumal che are laʼ ri rajawaxik kinbʼano. ¡Kʼax we riʼ we kintzijoj ta ri utzalaj taq noticias!
17 Kintewchix na we kinbʼan wajun chak rukʼ ronojel wanimaʼ pero we kwaj taj kinbʼano, kinbʼan wi rumal che are laʼ ri in taqom che ubʼanik.
18 Rumal laʼ, ¿jas riʼ ri tewchibʼal kyaʼ chwe? Are che xinkikotik rumal che xintzijoj ri utzalaj taq noticias y kʼo ta pwaq xintaʼ chiwe. Paneʼ kʼo nu derecho kintaʼ ri rajawaxik chwe rumal che kintzijoj ri utzalaj taq noticias, pero xintaʼ taj.
19 Paneʼ in resclavo ta nijun winaq, pero xinbʼan esclavo che wibʼ rech keʼintoʼ e kʼi winaq keʼok cristianos.
20 Rech keʼintoʼ ri judíos xinbʼano che jetaneʼ in judío, y rech keʼintoʼ ri winaq ri tajin kkinimaj na ri Ley xinnimaj ri Ley in xuqujeʼ, paneʼ rajawaxik ta chik kinbʼano.
21 Xinkʼojiʼ kukʼ winaq ri kkinimaj ta ri Ley y ri in xuqujeʼ xinbʼano che kinnimaj ta ri Ley rech keʼintoʼ ri winaq riʼ rech keʼok u discípulos ri Cristo. Paneʼ ri in nunimam ri ley re ri Dios y ri ley re ri Cristo.
22 Rech keʼintoʼ ri qas ta e ko, ri in xuqujeʼ xinbʼano che qas ta in ko. Xinbʼan juntir uwach jastaq rech kinkowinik keʼintoʼ juntir ri winaq y rech weneʼ rukʼ wariʼ kenbʼan kan salvar.
23 Xinbʼan juntir wariʼ rumal ri utzalaj taq noticias y rech kinkowinik kintzijoj chke ri e nikʼaj chik.
24 ¿La ma ta iwetaʼm che e juntir ri kkibʼan maratón xa jun kchʼakan chke? Rumal laʼ qas chitijaʼ iwanim* rech kixchʼakanik.
25 Ri kkaj kechʼakan pa jun maratón kkichajij kibʼ chuwach apachike jastaq ri kubʼan kʼax chke. Ri areʼ kkibʼan wariʼ rumal che kkaj kkichʼak jun corona ri xa kchaqijik, pero ri oj kqabʼan wariʼ rech kqachʼak jun corona ri kchaqij taj.
26 Rumal laʼ are chiʼ kintij anim, qas wetaʼm jawiʼ kinopan wi; y junam rukʼ jun boxeador, xaq ta kinkʼis nuchuqʼabʼ che uchʼayik ri kaqiqʼ.
27 Xaneʼ ri in kinchʼay ri nu cuerpo y kinbʼan wesclavo che, rech kinuxutuj ta ri Dios rumal che kinbʼan ta ri xinkʼut chkiwach ri nikʼaj chik.
Notas
^ Xuqujeʼ kbʼix Pedro che.
^ Pa nikʼaj chi lugar jewaʼ kbʼix che: «ri uchikop».
^ Chawilaʼ ri diccionario.
^ Pa nikʼaj chi lugar jewaʼ kbʼix che: «chixbʼe aninaq», «chixsumumoq».
