Ri nabʼe carta xtaq bʼi chke ri aj Corinto 13:1-13
-
Ri loqʼoqʼebʼal kʼo ta kjunamataj wi (1-13)
13 Paneʼ kinchʼaw pa ri ki idiomas ri winaq y kinchʼaw pa ri ki idiomas ri ángeles pero we keʼinwaj ta ri winaq,* xaq in junam riʼ rukʼ jun campana o jun címbalo* ri kubʼan bulla.
2 Paneʼ kinkowinik kinbʼan profetizar, kinchʼobʼ chrij juntir ri xuya ta na ubʼixik ri Dios, kʼo wetaʼmabʼal, qas kinkubʼsaj nukʼuʼx chrij ri Dios y kinkowinik kinsilabʼisaj ri juyubʼ pero we kinloqʼoqʼen taj, kʼo ta nupatan riʼ.
3 We kinya juntir ri kʼo wukʼ rech keʼintzuq ri nikʼaj chik o kinya ri nukʼaslemal pa kiwiʼ rech kinbʼan nim che wibʼ, pero keʼinwaj taj kʼo ta upatan riʼ ri kinbʼano.
4 Ri winaq ri kloqʼoqʼenik kukʼut paciencia y utzilal, ri winaq ri kloqʼoqʼenik kunaʼ ta titikil* y kubʼan ta nim che ribʼ.
5 Ri winaq ri kloqʼoqʼenik kubʼan ta jastaq ri utz ta rilik, xaq ta are kchoman chrij ri utz krilo, aninaq ta kpe royowal, y kukʼol ta pa ranimaʼ ri kʼax kbʼan che.
6 Kkikot ta rumal ri itzelal xaneʼ kkikotik rumal ri utzilal.*
7 Ri winaq ri kloqʼoqʼenik kkʼistaj ta ukʼuʼx, juntir kukojo, kreyeʼj rukʼ paciencia che kebʼantaj na utz taq jastaq y kuchʼij juntir ri kʼax.
8 Ri loqʼoqʼebʼal kkʼis ta wi. Pero ri kkibʼan profetizar kopan na jun qʼij che kkibʼan ta chik; ri kechʼaw pa jalajoj taq idiomas kkibʼan ta chik; y ri ketaʼm jastaq rumal ri utobʼanik ri espíritu santo, kopan na jun qʼij che kketaʼmaj ta chik.
9 Paneʼ qetaʼm chrij jujun jastaq pero kojkowin taj kqetaʼmaj juntir, paneʼ kojkowinik kqabʼan profetizar pero kojkowin taj kqabʼij juntir ri kbʼantaj na;
10 ri jubʼiqʼ qetaʼm kamik ksach na uwach rumal che kopan na jun qʼij kqetaʼmaj na juntir.
11 Are chiʼ in akʼal na kintzijonik junam rukʼ jun akʼal, kinchomanik je jas jun akʼal y kwil ri jastaq junam rukʼ ri kubʼan jun akʼal che rilik, pero chanim riʼ che in achi chik kinbʼan ta chi ri jastaq junam rukʼ ri kubʼan jun akʼal.
12 Kamik xaq sutzʼ uwach ri imagen kqilo junam rukʼ ri kilitaj pa jun espejo re metal che qas ta qʼalaj, pero kopan na jun qʼij che qas qʼalaj chi ri kqilo. Kamik qas ta wetaʼm ronojel chrij ri Dios pero kopan na jun qʼij kwetaʼmaj juntir chrij, junam rukʼ ri Dios che ri areʼ retaʼm juntir chwij in.
13 Pero ri ksach ta uwach are waʼ: ri ukubʼsaxik qakʼuʼx chrij ri Dios, ri reyexik ri kubʼan na y ri loqʼoqʼebʼal. Pero ri más nim ubʼanik chke ri oxibʼ riʼ, are ri loqʼoqʼebʼal.
