Ri nabʼe carta xtaq bʼi chke ri aj Corinto 6:1-20
6 ¿Jasche are chiʼ kʼo jun problema chixoʼl, are kixbʼe pa ri kiqʼatbʼal tzij ri e winaq ri kkinimaj ta ri u ley ri Dios, y are ta kixbʼe kukʼ ri e chaʼom?
2 ¿La ma ta iwetaʼm che ri e chaʼom kkiqʼat na tzij puwiʼ ri uwach ulew? Y we ri ix kiqʼat na tzij puwiʼ ri uwach ulew, ¿jas kʼu che kixkowin taj kiqʼat tzij puwiʼ jun jastaq ri nim ta ubʼanik?
3 Y we kqaqʼat na tzij pa kiwiʼ ri ángeles, ¿jas kʼu che kojkowin taj kqaqʼat tzij puwiʼ jastaq ri kbʼantaj kamik?
4 Are chiʼ kʼo jun problema chixoʼl, ¿jasche are kixbʼe chkiwach ri jueces y are ta kitzukuj tobʼanik pa ri congregación?
5 Kinbʼij wariʼ chiwe rech kixkʼixik, ¿la xa kʼo ta jun qachalal kʼo unojibʼal kkowin che itoʼik chuwach ri i problema?
6 Ri ix are ta kitzukuj ri kitobʼanik ri e kʼo pa ri congregación xaneʼ are kixbʼe chkiwach ri jueces.
7 Are chiʼ ri ix kixbʼe chkiwach taq ri jueces xa tajin kiwesaj ikʼixbʼal. Are más utz riʼ che kiya bʼe kbʼan kʼax chiwe y kiya bʼe kelaqʼax ri jastaq iwe.
8 Pero are ta la’ ri tajin kibʼano, xaneʼ ix ri tajin kixbʼanow ri kʼax y tajin kixelaqʼanik, y chke ri iwachalal tajin kibʼan wi.
9 ¿La ma ta iwetaʼm che ri itzel taq winaq kkechbʼej ta ri Uqʼatbʼal tzij ri Dios?* Mixbʼan engañar, ri winaq ri kkibʼan ri tzʼilalaj taq makaj,* ri kkiqʼijilaj dioses, ri keqʼoyiʼ rukʼ jun winaq ri man are ta ri kikʼulaj, ri achijabʼ ri keqʼoyiʼ kukʼ achijabʼ,*
10 ri elaqʼomabʼ, ri kkirayij kʼi jastaq, ri e qʼabʼarelabʼ, ri kʼax kechʼawik* y ri kkibʼan extorsiones, kkechbʼej ta ri Uqʼatbʼal tzij ri Dios.
11 Paneʼ ojer kanoq ri ix xibʼan ri e makaj riʼ, pero rumal ri ubʼiʼ ri Qajaw Jesucristo y rumal ri u espíritu ri qa Dios, ix chʼajchʼoj chik, ix tastal chik y ix utz taq winaq chi chuwach ri Dios.
12 Juntir kinkowinik kinbʼano,* pero juntir taj kuya utzilal chwe. Juntir kinkowinik kinbʼano, pero kinya ta bʼe che ri jastaq riʼ ketaqan pa nuwiʼ.
13 Ri qawa kopan chqapam y ri qapam kukʼol ri qawa, pero ri Dios kukʼis na tzij pa kiwiʼ ri e kebʼ riʼ. Y ri qa cuerpo xbʼan taj rech kkoj che ubʼanik tzʼilalaj taq makaj xaneʼ rech ri Qajaw, y ri Qajaw kuya ri kajwataj che ri qa cuerpo.
14 Ri Dios rukʼ ri u poder xuwalijisaj ri Qajaw y jelaʼ kubʼan na qukʼ oj, kojuwalijisaj na chkixoʼl ri kaminaqibʼ.
15 ¿La ma ta iwetaʼm che ri i cuerpo parte rech ri u cuerpo ri Cristo? Rumal laʼ, ¿la utz riʼ we kinwesaj jun parte re ri u cuerpo ri Cristo y kinya kan rukʼ ri re jun prostituta? ¡Utz ta riʼ!
16 ¿La ma ta iwetaʼm che ri kqʼoyiʼ rukʼ jun prostituta keʼux xa jun cuerpo? Rumal che ri Dios ubʼim: «Ri e kebʼ xa e jun winaq chik».
17 Apachin winaq ri kkʼojiʼ rukʼ ri Qajaw junam kchoman na rukʼ.*
18 ¡Chixutuj ri tzʼilalaj taq makaj! Apachike jun chi uwach mak kubʼan ta kʼax che ri cuerpo, pero ri kubʼan tzʼilalaj taq makaj tajin kubʼan kʼax che ri u cuerpo.
19 ¿La ma ta iwetaʼm che ri i cuerpo are ri u templo ri espíritu santo ri kʼo iwukʼ, y che are ri Dios yaʼowinaq chiwe? Xuqujeʼ chnaʼtaj chiwe che ri i cuerpo, iwech ta chi ix,
20 rumal che nim xutoj ri Dios rech xixuloqʼo. Rumal laʼ chikojoʼ ri i cuerpo che uyaʼik uqʼij ri Dios.
Notas
^ O «ri u Reino ri Dios». Chawilaʼ ri diccionario.
^ Pa griego kbʼix pornéia che. Chawilaʼ ri diccionario.
^ Pa ri idioma griego kukoj kebʼ tzij, jun tajin kchʼaw chrij ri achi ri kuya bʼe kbʼan relaciones sexuales che, kubʼano che jetaneʼ ixoq, y ri jun chik are ri kubʼan che ribʼ che achi.
^ O «ri keyoqʼonik».
^ Pa nikʼaj chi lugar jewaʼ kbʼix che: «kuyaʼ kinbʼano», «kbʼanik kinbʼano».
^ Pa ri idioma griego, «xa jun espíritu kkibʼano».
