Ri nabʼe carta xtaq bʼi chke ri aj Corinto 11:1-34
11 Chibʼanaʼ iwe junam rukʼ ri kinbʼan in, rumal che ri in kinbʼan we junam rukʼ ri kubʼan ri Cristo.
2 Qachalal kinmaltyoxij chiwe rumal che amaqʼel kinnaʼtaj chiwe y qas tajin kibʼan ri xinkʼut kan chiwach.
3 Kwaj kiwetaʼmaj che ri ktaqan puwiʼ ri achi are ri Cristo, ri ktaqan puwiʼ ri ixoq are ri achi y ri ktaqan puwiʼ ri Cristo are ri Dios.
4 Ri achi ri kuchʼuq ujolom are chiʼ kubʼan orar o are chiʼ kubʼan profetizar kresaj ukʼixbʼal ri ktaqan puwiʼ.*
5 Pero we ri ixoq kuchʼuq ta ri ujolom are chiʼ kubʼan orar o are chiʼ kubʼan profetizar, kresaj ukʼixbʼal ri ktaqan puwiʼ,* y jetaneʼ xa tol riʼ ri ujolom.
6 Y we ri ixoq kuchʼuq ta ri ujolom rajawaxik kusokaj ri uwiʼ. Pero we kʼixbʼal che ri ixoq kusokaj ri uwiʼ o kubʼan tol che, chuchʼuquʼ bʼaʼ ri ujolom.
7 Ri achi rajawaxik taj kuchʼuq ri ujolom, rumal che ri Dios xubʼan ri achi junam rukʼ ri areʼ y rumal ri achi kyaʼ uqʼij ri Dios. Y rumal ri ixoq kyaʼ uqʼij ri achi.
8 Rumal che ri ixoq che ri achi xel wi, man are ta ri achi xel che ri ixoq.
9 Xbʼan ta ri achi rech krachilaj ri ixoq xaneʼ xbʼan ri ixoq rech krachilaj ri achi.
10 Rumal laʼ ri ixoq rajawaxik kuchʼuq ri ujolom rech kukʼutu che kʼo ktaqan puwiʼ xuqujeʼ kuchʼuq ri ujolom kumal ri ángeles.
11 Pero chkixoʼl ri u discípulos ri Qajaw, ri ixoq rajawaxik ri achi che y ri achi rajawaxik ri ixoq che.
12 Rumal che ri ixoq che ri achi xesax wi pero ri achi kalax rumal ri ixoq. Juntir kʼu ri jastaq are ri Dios xebʼanowik.
13 Chixchoman chrij wariʼ, ¿la utz che kuchʼuq ta ri ujolom ri ixoq are chiʼ kubʼan orar?
14 ¿La ma ta iwetaʼm che kʼixbʼal rilik jun achi we nimaʼq ri uwiʼ?
15 Pero sibʼalaj jeʼl kilitaj jun ixoq we nimaʼq ri uwiʼ, rumal che xyaʼ ri uwiʼ rech kuchʼuq ri ujolom.
16 Pero we k’o jun winaq jun chi wi ri kubʼij, kwaj kinbʼij chiwe che ri oj y ri u congregación ri Dios xa jun ri qa costumbre kʼolik.
17 Pero are chiʼ kinbʼij waʼ we jastaq chiwe kixinbʼan ta felicitar, rumal che are chiʼ kimulij iwibʼ xa kibʼan kʼax chbʼil iwibʼ y are ta kitoʼlaʼ iwibʼ.
18 Xbʼix chwe che are chiʼ kimulij iwibʼ, kitasalaʼ taq iwibʼ y ri in kinkoj jubʼiqʼ ri xbʼix chwe.
19 Pero are chiʼ kitas iwibʼ pa taq grupos, ktobʼanik rech kilitajik jachin kukʼ kʼo wi ri utewchibʼal ri Dios.
20 Are chiʼ ri ix kimulij iwibʼ che ubʼanik ri Cena del Señor, utz ta ri tajin kibʼan che.
21 Rumal che are chiʼ kimulij iwibʼ, e jujun kitijom chi kiwa are chiʼ majaʼ na kbʼan ri Cena del Señor, e jujun kenumik y e nikʼaj chik e qʼabʼarelabʼ chik.
22 ¿La xa kʼo ta iwachoch rech kitij lo iwa y kitij lo i vino? ¿O la xa nim ta kiwil wi ri u congregación ri Dios y la xa kiwaj kiwesaj kikʼixbʼal ri kʼo ta jastaq ke? ¿Jas kichomaj? ¿La kichomaj ix che xa kixinbʼan felicitar? No, kixinbʼan ta felicitar.
23 Rumal che xinkʼut chiwach ri xukʼut kan ri Qajaw. Pa ri chaqʼabʼ are chiʼ ya mer kjach ri Qajaw Jesús pa kiqʼabʼ ri ukʼulel, xukʼam jun kaxlanwa
24 tekʼuriʼ, xumaltyoxij che ri Dios, xupaʼij* y xubʼij: «Wariʼ kukʼutunisaj ri nu cuerpo, ri kyaʼ na rech kiriq utzilal ix. Mitanabʼaʼ ubʼanik wariʼ* che nunaʼtajisaxik».
25 Are chiʼ kitijom chi kiwa chaqʼabʼ, je xubʼan rukʼ ri copa y xubʼij: «Wajun copa kukʼutunisaj ri kʼakʼ pacto, y wajun pacto riʼ kʼo upatan rumal ri nukikʼel. Mitanabʼaʼ ubʼanik wariʼ, y are chiʼ kitij ri kʼo pa ri copa chinnaʼtaj chiwe».
26 Rumal che are chiʼ kitij ri kaxlanwa y are chiʼ kitij ri vino ri kʼo pa ri copa, jetaneʼ kʼa tajin kitzijoj na ri ukamikal ri Qajaw kʼa are chiʼ kpe ri areʼ.
27 Rumal laʼ, apachin ri taqal ta che kutij ri kaxlanwa y kutij ri vino ri kʼo pa ri u copa ri Qajaw, tajin ta kubʼan respetar ri u cuerpo y ri ukikʼel ri Qajaw.
28 Nabʼe rajawaxik krilo we qas utz ri tajin kubʼano, tekʼuriʼ kkowinik kutij ri kaxlanwa y ri vino ri kʼo pa ri copa.
29 Pero we kʼo jun kutij ri kaxlanwa y kutij ri vino ri kʼo pa ri copa y kuchʼobʼ taj che are kukʼutunisaj ri u cuerpo ri Qajaw, xa tajin kutzukuj ri ukamikal.
30 Rumal laʼ e kʼi chiwe ix ko taj, ix yawabʼ y e kʼi chiwe e kaminaq chik.*
31 Pero we qas kqil na we utz ri tajin kqabʼano, kqʼat ta tzij riʼ pa qawiʼ.
32 Are chiʼ ri Jehová* kuqʼat tzij pa qawiʼ, xa tajin kojuqʼilo* rech kkʼajisax ta qawach kukʼ ri e nikʼaj chik.
33 Rumal laʼ loqʼalaj taq wachalal, are chiʼ kimulij iwibʼ che ubʼanik ri Cena del Señor, cheʼiweyej na ri nikʼaj chik are chiʼ kixwaʼik.
34 We kʼo jun chiwe knumik, chutijaʼ lo ri uwa cho rachoch, rech kqʼat ta tzij puwiʼ rumal ri kubʼano are chiʼ kimulij iwibʼ. Pero ri nikʼaj chi jastaq, kʼateʼ kinbʼanaʼ ubʼanik are chiʼ kinopan iwukʼ.
Notas
^ Pa ri idioma griego, «kresaj ukʼixbʼal ri ujolom».
^ Pa ri idioma griego, «kresaj ukʼixbʼal ri ujolom».
^ Pa nikʼaj chi lugar jewaʼ kbʼix che: «xupiro», «xuchʼaqapij».
^ Pa nikʼaj chi lugar jewaʼ kbʼix che: «Amaqʼel chibʼanaʼ wariʼ».
^ Ri kamikal waral, weneʼ are kchʼaw chrij jun winaq ri kʼo ta chi jun rachilanik rukʼ ri Dios.
^ Chawilaʼ ri tema A5.
^ O «kojupixbʼej».
