Ri nabʼe carta xtaq bʼi chke ri aj Corinto 2:1-16
2 Qachalal are chiʼ xinopan iwukʼ xinkʼut chiwach chrij ri xubʼij ta na ri Dios, xinkoj tzij ri kʼax ta uchʼobʼik y xinbʼan taj che kʼo nim nunojibʼal.
2 Rumal che are chiʼ xinkʼojiʼ iwukʼ xaq xiw xinchʼaw chrij ri Jesucristo y chrij ri ukamikal cho ri cheʼ.
3 Sibʼalaj xinbʼirbʼit che xibʼin ibʼ are chiʼ xinopan iwukʼ y xinnaʼo che kinkowin ta che ubʼanik ri chak ri xyaʼ chwe.
4 Xuqujeʼ are chiʼ xinbʼan predicar ri utzij ri Dios chiwe, xinbʼan ta we jas ri kkibʼan ri winaq ri kʼo kinojibʼal rech kixinchʼako, xaneʼ rukʼ ri nutzij xinkʼut chiwach ri u poder ri u espíritu ri Dios.
5 Rech are kikubʼsaj ikʼuʼx chrij ri u poder ri Dios, man chrij ta ri kinojibʼal ri winaq.
6 Ri oj, kqatzijoj ri nojibʼal chke ri tzʼaqat chi kichomanik,* pero man are ta ri kinojibʼal ri winaq re wajun uwach ulew riʼ y man are ta kech ri qʼatal taq tzij ri xa ksach kiwach.
7 Xaneʼ are kojchʼaw chrij ri unojibʼal ri Dios ri xuya ta na ubʼixik y xukʼuʼ na.* Ri Dios ojer loq uchomam ri kubʼan na che ukʼutik ri unojibʼal rech knimarisax qaqʼij.
8 Xekowin ta ri qʼatal taq tzij re we qʼij riʼ xketaʼmaj wajun nojibʼal, rumal che we ta xketaʼmaj, ma ta xkikamisaj riʼ cho ri cheʼ ri Qajaw ri nim uqʼij.
9 Rumal laʼ tzʼibʼam kan wariʼ: «Nijun winaq rilom, utom y uchomam ri kuya na ri Dios chke ri winaq ri keraj».
10 Pero ri Dios xukoj ri u espíritu santo rech ri oj kqetaʼmaj wariʼ, rumal che ri espíritu santo kuqʼalajisaj juntir ri jastaq, xuqujeʼ kuqʼalajisaj ri kʼo pa ranimaʼ ri Dios.
11 Rumal laʼ, ¿jachin retaʼm ri kʼo pa ranimaʼ jun winaq? Kʼo ta nijun, xaq xiw ri winaq retaʼm ri kʼo pa ranimaʼ. Y jelaʼ ri Dios, kʼo ta nijun retaʼm ri kuchomaj, xaq xiw ri u espíritu retaʼm.
12 Ri oj yaʼom ta ri espíritu re ri uwach ulew chqe, xaneʼ are yaʼom ri u espíritu ri Dios chqe, rech kojkowinik kqetaʼmaj ri jastaq rech ri Dios ri rukʼ utzilal ukʼutum chqawach.
13 Ri oj kqatzijoj ri e jastaq riʼ, pero are ta kqakʼut ri kinojibʼal ri winaq, xaneʼ are kqakʼut ri ukʼutum ri espíritu santo chqawach. Rumal laʼ ri oj kqatzijoj ri jastaq re ri Dios, ri qetaʼmam rukʼ ri espíritu santo.
14 Pero ri winaq ri kukoj ri xaq uchomanik kuchʼobʼ ta ri jastaq re ri Dios, rumal che nim ta ubʼanik chuwach y kkowin taj kretaʼmaj rumal che rajawaxik ri utobʼanik ri espíritu santo che.
15 Ri winaq ri kʼamom ubʼe rumal ri espíritu santo qas kunikʼoj na juntir ri jastaq, pero kʼo ta jun winaq kkowinik kuqʼat tzij puwiʼ.
16 Tzʼibʼam kʼu pa ri Utzij ri Dios: «¿La kʼo jun winaq retaʼm ri kuchomaj ri Jehová?* ¿Jachin kkowinik kuya unoʼj?». Pero ri oj, junam ri qachomanik rukʼ ri Cristo.
