Ri nabʼe carta xtaq bʼi chke ri aj Corinto 15:1-58

  • Ri ukʼastajibʼal ri Cristo (1-11)

  • Kqakubʼsaj qakʼuʼx chrij ri Dios rumal ri ukʼastajibʼal ri Cristo (12-19)

  • Ri ukʼastajibʼal ri Cristo kukʼutu che ri Dios qastzij kubʼan na ri ubʼim (20-34)

  • Ri cuerpo ri kilitajik y ri cuerpo ri kilitaj taj (35-49)

  • Ri cuerpo che kkam ta chik y kqʼay ta chik (50-57)

  • «Qas chixok il che ri uchak ri Qajaw» (58)

15  Qachalal, kinnaʼtajisaj chiwe ri utz taq noticias che xinya ubʼixik chiwe, ri xixkojon chrij y che kamik uyaʼom ichuqʼabʼ. 2  Kiriq ta i salvación riʼ we kixkojon ta chi chrij ri utz taq noticias ri xintzijoj chiwe y kʼo ta upatan riʼ che xixkojon na chrij ri Jesús. 3  Ri nabʼe taq jastaq che xinkʼut chiwach are ri xkʼut chnuwach in: ri Cristo xkam rumal ri qamak, junam rukʼ ri tzʼibʼam kanoq; 4  xuqujeʼ tzʼibʼam kanoq che xmuqik y churox qʼij xkʼastajisaxik, 5  y xukʼut ribʼ chuwach ri Cefas,* tekʼuriʼ chkiwach ri Doce. 6  Tekʼuriʼ xukʼut chi ribʼ chkiwach más che e 500 qachalal ri kimulim kibʼ. Y e kʼi chke kʼa e kʼasal na chanim riʼ, pero jujun e kaminaq chik. 7  Xukʼut chi ribʼ chuwach ri Santiago, tekʼuriʼ chkiwach juntir ri apóstoles. 8  Chukʼisbʼal xukʼut ribʼ chnuwach in, rumal laʼ kinjunamataj rukʼ jun alaj neʼ ri majaʼ ktzʼaqat uqʼij kkʼojiʼk. 9  Taqal taj kbʼix apóstol chwe, rumal che xinbʼan kʼax che ri u congregación ri Dios y in ri in kʼisbʼal apóstol. 10  Pero rumal ri nimalaj rutzilal ri Dios, kamik in apóstol. Y xaq ta loqʼ xukʼut ri nimalaj rutzilal ri Dios chnuwach, rumal che más in chakunaq na chkiwach ri e nikʼaj chi apóstoles. Pero in kowinaq che ubʼanik ri e chak riʼ rumal ri nimalaj rutzilal ri Dios che ukʼutum chnuwach. 11  Apachin taneʼ ri xtzijon iwukʼ, we in o e nikʼaj chik, xaq junam ri xqakʼutu y are laʼ ri xixkojon ix chrij. 12  Pero, ¿jas kʼu che e jujun chiwe kikoj taj che kekʼastajisax na ri kaminaqibʼ we tajin ktzijoxik che xkʼastajisax ri Cristo chkixoʼl ri kaminaqibʼ? 13  Rumal che we kekʼastajisax ta ri kaminaqibʼ, xkʼastajisax ta riʼ ri Cristo xuqujeʼ. 14  Pero we ta ma ta xkʼastajisax ri Cristo kʼo ta upatan riʼ ri xqatzijoj chiwe y ma ta kʼo upatan riʼ che ri ix kikubʼsaj ikʼuʼx chrij ri Dios. 15  We kekʼastaj ta ri kaminaqibʼ, ri Dios xukʼastajisaj ta riʼ ri Cristo. Rumal laʼ tajin kqamol tzij riʼ are chiʼ kqabʼij che ri Dios xukʼastajisaj ri Cristo. 16  Rumal che we kekʼastajisax ta ri kaminaqibʼ, xkʼastajisax ta riʼ ri Cristo. 17  Xuqujeʼ we ma ta xkʼastajisax ri Cristo, kʼo ta upatan riʼ che ri ix kikubʼsaj ikʼuʼx chrij xuqujeʼ ix kʼo ta na riʼ pa ri imak. 18  Y ri winaq ri xekojon chrij ri Cristo pero e kaminaq chik xsach kan kiwach riʼ. 19  Kʼax qe riʼ we xaq xiw kqakubʼsaj qakʼuʼx chrij ri Cristo kamik are chiʼ oj kʼaslik y kqakoj taj che kekʼastajisax na lo ri kaminaqibʼ. 20  Pero ri Cristo are ri nabʼe xkʼastajisax chkixoʼl ri kaminaqibʼ. 21  Xa rumal jun achi kekam ri winaq y xa rumal jun achi kekʼastaj ri kaminaqibʼ. 22  Rumal rech ri Adán konojel kekamik y rumal rech ri Cristo konojel kkiriq kʼaslemal. 23  Pero wariʼ kbʼan rukʼ cholajil: nabʼe kkʼastajisax ri Cristo, tekʼuriʼ pa ri tiempo are chiʼ ktzalij loq, kekʼastajisax ri e rech. 24  Are chiʼ usachisam chi kiwach konojel ri gobiernos y konojel ri kʼo taqanik pa kiqʼabʼ, kujach kan ri qʼatoj tzij pa uqʼabʼ ri u Dios y Utat. 25  Ri areʼ kʼateʼ kuya kan uqʼatik tzij are chiʼ ri Dios chʼakanaq chi pa kiwiʼ e juntir ri ukʼulel. 26  Y ri kamikal che are ri kʼisbʼal kʼulel, kkʼis na tzij puwiʼ. 27  Rumal che ri Dios «xuya ronojel ri jastaq pa uqʼabʼ». Pero are chiʼ kubʼij che xyaʼ ronojel pa uqʼabʼ, tajin ta kubʼij che ri xyaʼow ronojel ri jastaq pa uqʼabʼ, xuqujeʼ kkʼojiʼ chuxeʼ ri utaqanik. 28  Are chiʼ kʼo chi ronojel ri jastaq pa uqʼabʼ ri Dios, ri Ukʼojol xuqujeʼ kuya ribʼ chuxeʼ ri utaqanik, rech are ri Dios kqʼatow tzij puwiʼ ronojel. 29  We ri kaminaqibʼ kekʼastajisax taj, ¿jas kʼu che ri winaq tajin kkibʼan ki bautismo rech kekamik? ¿La ma ta qastzij che kʼo ta upatan riʼ che kkibʼan ki bautismo? 30  ¿Jas kʼu che ronojel taq qʼij ri qakʼaslemal xaq kebʼ kubʼij puwiʼ? 31  Qachalal, ronojel taq qʼij kinwil uwach ri kamikal. Y qastzij wi ri kinbʼij junam rukʼ ri kikotemal kinnaʼo, rumal che ri ix xiwetaʼmaj uwach ri Cristo Jesús ri Qajaw. 32  We ri kaminaqibʼ kekʼastajisax taj, kʼo ta upatan riʼ che ri in y ri nikʼaj chi achijabʼ xojchʼojin kukʼ itzel taq chikop pa Éfeso. Rumal laʼ «chojwoq bʼaʼ y chqatijaʼ bʼaʼ vino rumal che xa kojkamik». 33  Chichajij iwibʼ chkiwach ri winaq che keʼiwachilaj. Rumal che we e utz ta ri keʼiwachilaj kkibʼan riʼ che ri ix kiya kan ubʼanik ri utz taq jastaq. 34  Chichomaj na jas ri tajin kibʼano, chiyaʼ kan ubʼanik ri makaj y are chibʼanaʼ ri utz. Rumal che e jujun chiwe ketaʼm ta uwach ri Dios y kinbʼij wariʼ chiwe rech kixkʼixik. 35  Rumal laʼ weneʼ kʼo jun kuchomaj: «¿Jas kibʼanik riʼ ri kaminaqibʼ are chiʼ kekʼastaj loq? Y ¿jas cuerpo riʼ kyaʼ chke?». 36  ¿La ma ta iwetaʼm che jun semilla rajawaxik kqʼay na rech kkʼiy chi lo jumul? 37  Y are chiʼ kʼo kiwaj kitiko are ta kitik ri kʼiyinaq chik. Xaneʼ are kitik ri semilla, weneʼ triko o jun chi uwach semilla. 38  Are ri Dios kbʼanowik che ri tikoʼn kel loq junam rukʼ ri semilla ri xtikik. 39  Xa ta jun uwach ri cuerpo kʼolik: kʼo wi ri ke ri winaq, jun chi wi ri ke ri chikop che kʼo kajibʼ kaqan, ri kerapanik y ri e kʼo pa ri jaʼ. 40  Ri kʼo pa ri kaj y ri kʼo cho ri ulew kjunamataj ta ubʼanik ri ki cuerpo. 41  Xuqujeʼ ri qʼij jun wi ubʼanik, ri ikʼ jun wi ubʼanik, ri e chʼumil jun wi kibʼanik y chkijujunal ri chʼumil jun wi kibʼanik. 42  Xuqujeʼ junam kkʼulmataj kukʼ ri kaminaqibʼ. Keqʼayik are chiʼ kemuqik y are chiʼ kekʼastajisax loq keqʼay ta chik. 43  Nim ta kiqʼij are chiʼ kemuqik, nim chi kiqʼij are chiʼ kekʼastajisaxik. Kʼo ta taqanik pa kiqʼabʼ are chiʼ kekamik. Kʼo chi taqanik pa kiqʼabʼ are chiʼ kekʼastaj loq. 44  E winaq kekamik, espíritu chik are chiʼ kekʼastaj loq. We kʼo jun cuerpo kilitajik xuqujeʼ kʼo jun cuerpo kilitaj taj. 45  Junam rukʼ ri tzʼibʼam kanoq: «Ri nabʼe achi, ri Adán are jun winaq ri xyaʼ ukʼaslemal». Pero ri kʼisbʼal Adán are jun espíritu ri kuya kʼaslemal. 46  Man are ta nabʼe xpe cho ri uwach ulew ri cuerpo ri kilitaj taj, xaneʼ are nabʼe xpe ri cuerpo ri kilitajik, tekʼuriʼ xpe ri cuerpo ri kilitaj taj. 47  Ri nabʼe achi cho ri ulew xbʼan wi y ulew xkoj che ubʼanik. Y ri ukabʼ achi pa ri kaj xbʼan wi. 48  Ri winaq xaq e junam rukʼ ri nabʼe achi ri xbʼan rukʼ ulew. Y ri e kʼo pa ri kaj xaq e junam rukʼ ri xpe pa ri kaj. 49  Chanim riʼ oj junam rukʼ ri winaq che xbʼan rukʼ ulew pero xuqujeʼ kojjunamataj na rukʼ ri winaq che xbʼan pa ri kaj. 50  Kinbʼij kʼu wariʼ chiwe wachalal che ri ki cuerpo ri winaq* kuya taj kok pa ri Uqʼatbʼal tzij ri Dios.* Y ri cuerpo che kqʼayik, kuya taj kyaʼ jun cuerpo che ri kqʼay taj. 51  Kʼo jun jastaq ri uqʼalajisam ta na ri Dios pero chanim riʼ kwaj kinqʼalajisaj chiwach: oj juntir taj kojkamik pero juntir kkʼextaj na ri qa cuerpo. 52  Are chiʼ koqʼ ri kʼisbʼal trompeta aninaq kkʼextaj ri qa cuerpo oj. Y kekʼastaj lo ri kaminaqibʼ y kyaʼ na jun qa cuerpo ri kqʼay ta chik. 53  We qa cuerpo riʼ xa kqʼayik pero kkʼextaj na, kyaʼ na jun cuerpo chqe ri kqʼay ta chik. Y kamik xa kojkamik pero kopan na jun qʼij kojkam ta chik. 54  Rumal laʼ, wajun cuerpo che kqʼayik, kqʼay ta chik. Y wajun cuerpo ri kkamik, kkam ta chik. Rukʼ wariʼ kbʼantaj ri tzʼibʼatal kanoq: «Ksachisax uwach ri kamikal». 55  «¡Kamikal, kʼo ta chi achuqʼabʼ pa qawiʼ! ¡Kamikal, katkowin ta chik kabʼan kʼax chqe!». 56  Ri kʼax kuya ri makaj are ri kamikal y ri Ley kuqʼalajisaj chqawach che oj ajmakibʼ. 57  ¡Kqamaltyoxij che ri Dios rumal che rumal ri Qajaw Jesucristo xojchʼakan puwiʼ ri kamikal! 58  Je kʼu riʼ loqʼalaj taq qachalal, qas ko chixtakʼaloq, kʼo mixsilabʼanik y qas chixok il che ri uchak ri Qajaw. Rumal che ronojel ri kibʼano sibʼalaj nim kril wi ri areʼ.

Notas

^ Xuqujeʼ kbʼix Pedro che.
^ Pa ri idioma griego, «che ri kikʼ».
^ O «ri u Reino ri Dios». Chawilaʼ ri diccionario.

Copyrights for this publication