Ri nabʼe carta xtaq bʼi chke ri aj Corinto 1:1-31

  • Ri xubʼan ri Pablo che umajixik ri u carta (1-3)

  • Ri Pablo kumaltyoxij che ri Dios ri tajin kkibʼan ri corintios (4-9)

  • Ri Pablo kubʼij chke che utz taj kʼo tasoj ibʼ chkixoʼl (10-17)

  • «Ri Cristo are u poder ri Dios y are ri unojibʼal ri Dios» (18-25)

  • Xaq xiw chqanimarisaj qibʼ rumal che qetaʼm uwach ri Jehová (26-31)

1  In waʼ in Pablo ri xinchaʼ rumal ri Dios rech kinok rapóstol ri Cristo Jesús, y rukʼ ri qachalal Sóstenes 2  kqataq bʼi wajun carta chiwe ix ri ix kʼo pa ri congregación re Corinto. Ri ix ri ix chaʼom rech kixok u discípulos ri Cristo Jesús, ix chʼajchʼobʼisam kukʼ juntir ri kkikubʼsaj kikʼuʼx chrij ri ubʼiʼ* ri Qajaw Jesucristo, ri Qajaw oj y ri Kajaw ri e areʼ: 3  Are bʼaʼ ri Qatat Dios y ri Qajaw Jesucristo chekʼutuw ri nimalaj utzilal chiwe y cheyaʼow jororibʼal chiwe. 4  Sibʼalaj kinmaltyoxij che ri nu Dios, rumal ri nimalaj rutzilal ri ukʼutum chiwach ri ix u discípulos ri Cristo Jesús. 5  Ri ix sibʼalaj ix utewchim ri Dios rumal che ix kʼo rukʼ ri Cristo. Uyaʼom chiwe che kixkowinik kitzijoj ri utzij y uyaʼom iwetaʼmabʼal, 6  rumal che qas xikoj ri xita chrij ri Cristo. 7  Rumal laʼ yaʼom ronojel ri kajwataj chiwe are taq kiweyeʼj ri Qajaw Jesucristo kukʼut ri u poder. 8  Ri Dios kixutoʼo rech ko kixtakʼiʼk kʼa kopan ri qʼij kpe ri Qajaw Jesucristo, rech kʼo ta jun makaj kmol chiwij. 9  Ri Dios qas kubʼan ri kubʼij, ri areʼ xixuchaʼo rech kixkʼojiʼ rukʼ ri Ukʼojol, ri Jesucristo ri Qajaw. 10  Qachalal, kintaʼ pa ubʼiʼ ri Qajaw Jesucristo, che ma ta kʼo jachoj ibʼ chixoʼl y xa junam chubʼanaʼ ri ichomanik. 11  Loqʼalaj taq wachalal, e jujun chke ri e kʼo pa ri rachoch ri al Cloe, xkibʼij chwe che kʼo chʼaʼoj chixoʼl ix. 12  Kinbʼij wariʼ chiwe, rumal che ix kibʼij: «Ri in in teren chrij ri Pablo», nikʼaj chik kkibʼij: «Ri in in teren chrij ri Apolos», e kʼo chi nikʼaj kkibʼij: «Ri in in teren chrij ri Cefas»,* y e jujun chik kkibʼij: «Ri in in teren chrij ri Cristo». 13  ¿La ujachom kʼu ribʼ ri Cristo? Man are ta ri Pablo xkam cho ri cheʼ* umak iwe ix y pa ubʼiʼ ta ri Pablo xibʼan wi i bautismo. 14  Kinmaltyoxin che ri Dios rumal che in ta xinbʼanow i bautismo, xaq xiw xinbʼan ki bautismo ri a Crispo y ri a Gayo. 15  Rech nijun chiwe kubʼij che pa ri nubʼiʼ xbʼan wi ri u bautismo. 16  Xuqujeʼ xinbʼan ki bautismo ri winaq ri e kʼo pa rachoch ri Estéfanas. Xaq xiw laʼ le areʼ xinbʼan ki bautismo. 17  Ri Cristo xinutaq ta che ubʼanik bautismo xaneʼ che utzijoxik ri utzalaj taq noticias, y xinkoj tzij ri kʼax ta uchʼobʼik rech ri winaq nim kkil ri xubʼan ri Cristo are chiʼ xkam cho ri cheʼ re kʼaxkʼolil.* 18  Ri winaq ri ksachisax kiwach, nim ta kkil ri ktzijox chrij ri ukamikal ri Cristo,* pero chqe oj ri tajin kojbʼan salvar kukʼut ri u poder ri Dios chqawach. 19  Rumal che are waʼ ri tzʼibʼam kanoq: «Kinsachisaj na uwach ri kinoʼj ri winaq ri kʼo kinoʼj y kinxutuj na ri ketaʼmabʼal ri winaq ri kʼo nim ketaʼmabʼal». 20  ¿Jas* kkikʼut chqawach ri winaq ri kʼo kinoʼj, ri escribas, ri kʼo nim ketaʼmabʼal pa taq we qʼij riʼ? ¿La ma ta xubʼan ri Dios che ri kinoʼj ri winaq kʼo ta upatan? 21  Ri Dios ri kʼo nim unojibʼal, xuya ta bʼe chke ri winaq aj uwach ulew kketaʼmaj uwach rukʼ ri ketaʼmabʼal. Pero ri Dios kraj keʼubʼan salvar ri winaq ri kekojon chrij ri tajin kbʼan predicar, paneʼ chkiwach nikʼaj chik nim ta ubʼanik. 22  Ri judíos kkaj kkʼut milagros chkiwach y ri griegos kkitzukuj kinojibʼal. 23  Pero ri oj are kojtzijon chrij ri Cristo, ri xxekebʼax chuwach jun cheʼ, ri judíos utz ta kkita wariʼ y ri man e judíos taj kʼo ta upatan chkiwach. 24  Chkiwach ri judíos y ri griegos ri e chaʼom, ri Cristo are u poder ri Dios y are ri unojibʼal ri Dios. 25  Chkiwach ri winaq ri jastaq re ri Dios kʼo ta kipatan y kʼo ta kichuqʼabʼ, pero ri jastaq riʼ are kʼo na más kipatan y kichuqʼabʼ. 26  Qachalal chixchoman chiwij ix ri ix chaʼom: chkiwach ri winaq kʼo ta jun chiwe ix kʼo unoʼj, nijun kʼo taqanik pa uqʼabʼ o petinaq pa jun familia nim ubʼanik. 27  Pero ri Dios xeʼuchaʼ ri e kʼo ta kipatan cho ri uwach ulew rech kresaj kikʼixbʼal ri kʼo kinoʼj y xuchaʼ ri nim ta kibʼanik rech kresaj kikʼixbʼal ri nim kibʼanik. 28  Ri Dios xeʼuchaʼ ri kʼo ta kipatan cho ri uwach ulew, ri keʼajawax taj y ri nim ta kibʼanik, rech kʼo ta chi upatan ri nim ubʼanik chkiwach ri winaq, 29  xuqujeʼ rech kʼo ta jun winaq kubʼan nim che ribʼ chuwach ri Dios. 30  Rumal ri Dios xixok u discípulos ri Cristo Jesús. Ri Jesús kukʼut ri unojibʼal ri Dios chqawach, rumal ri areʼ kojux utz taq winaq chuwach ri Dios, oj chʼajchʼoj y kojel pa uqʼabʼ ri makaj. 31  Rumal che je wariʼ tzʼibʼam kanoq: «Utz taj che jun winaq kubʼan nim che ribʼ, xaq xiw chunimarisaj ribʼ rumal che retaʼm uwach ri Jehová».*

Notas

^ Pa ri idioma griego, «ri kkikoj ri ubʼiʼ».
^ Xuqujeʼ kbʼix Pedro che.
^ Pa ri idioma girego, «ri cheʼ re kʼaxkʼolil».
^ Pa nikʼaj chi lugar jewaʼ kbʼix che: «Su».
^ Chawilaʼ ri tema A5.

Copyrights for this publication