Ri nabʼe carta xtaq bʼi chke ri aj Corinto 14:1-40
14 Kiya ta kan kiloqʼoqʼexik ri e nikʼaj chik, xuqujeʼ chikojoʼ ichuqʼabʼ rech kʼo más kixkowinik kibʼano rukʼ ri utobʼanik ri espíritu santo. Y más chikojoʼ ichuqʼabʼ rech ri espíritu santo kixukoj che ubʼanik profetizar.
2 Rumal laʼ ri kkowinik kchʼaw pa jun chi idioma rukʼ ri utobʼanik ri espíritu santo, rukʼ ri Dios tajin kchʼaw wi man kukʼ ta ri winaq. Paneʼ rukʼ ri utobʼanik ri espíritu santo kchʼaw chrij jastaq ri xubʼij ta na ri Dios, pero nijun kchʼobʼowik.
3 Pero ri winaq ri kubʼan profetizar keʼubʼan animar ri winaq rukʼ ri kubʼij, kukubʼsaj kikʼuʼx y keʼutoʼo.
4 Ri kchʼaw pa jun chi idioma xaq xiw ri areʼ kubʼan animar ribʼ, pero ri kubʼan profetizar kkowinik kubʼan animar e juntir ri e kʼo pa ri congregación.
5 Utz riʼ we ta ix juntir kixchʼaw pa taq idiomas, pero ri más utz na are che kibʼan profetizar. Rumal che are más ktobʼan na ri kubʼan profetizar chuwach ri kchʼaw pa taq idiomas. Ri kchʼaw pa jun chi idioma kkowinik kutoʼ ri congregación, we kubʼan traducir ri kubʼij.
6 Qachalal, ¿la kʼo kixutoʼ wi riʼ we kinopan iwukʼ y kinchʼaw pa jun idioma che ri ix kichʼobʼ taj? Are más kixutoʼ riʼ we are kinkʼut chiwach ri ubʼim ri Dios chwe, kinkʼut chiwach chrij jun jastaq ri nijun etaʼmanaq, jun profecía o jun jastaq ri rajawaxik kiwetaʼmaj.
7 Xaq junam rukʼ jun instrumento re música, je jas ri flauta y ri arpa. We jun winaq xa jun sonido kubʼan rukʼ ri flauta o ri arpa, ¿la kkichʼobʼ riʼ ri winaq jas música tajin kubʼano?
8 We qas ta qʼalaj jas sonido kbʼan rukʼ ri trompeta, ¿la kʼo jun riʼ kubʼan preparar ribʼ rech kbʼe pa ri chʼaʼoj?
9 Xaq junam rukʼ, we ix kikoj tzij ri kʼax uchʼobʼik, ¿jas kkibʼan riʼ ri e nikʼaj chik che uchʼobʼik ri kibʼij? Jetaneʼ xa pa ri kaqiqʼ riʼ tajin kixchʼaw wi.
10 Pa ronojel ri uwach ulew kʼo kʼi idiomas y juntir kechʼobʼotajik.
11 Pero we kinchʼobʼ ta ri tajin kubʼij ri winaq chwe, jetaneʼ ri areʼ aj waral taj y chuwach ri areʼ ri in jetaneʼ re jun chi tinamit.
12 Xaq junam iwukʼ ix, rumal che kiwaj kʼi kibʼan rukʼ ri utobʼanik ri espíritu santo, chikojoʼ bʼaʼ ichuqʼabʼ rech rukʼ ri utobʼanik ri espíritu santo kixkowinik kibʼan kʼi jastaq che kibʼanik animar ri qachalal pa ri congregación.
13 Rumal laʼ ri kchʼaw pa jun chi idioma chutaʼ che ri Dios rech xuqujeʼ kkowinik kubʼan traducir.
14 Rumal che we kinbʼan orar pa jun chi idioma, tajin kinbʼan orar riʼ rukʼ ri utobʼanik ri espíritu santo y are ta tajin kinkoj ri nuchomanik.
15 ¿Jas kʼu ri rajawaxik kinbʼano? Are chiʼ kinbʼan orar rukʼ ri utobʼanik ri espíritu santo, rajawaxik kinbʼan jun chi oración rech kchʼobʼotaj ri xinbʼij. Y are chiʼ kinbʼan jun bʼix che ri Dios rukʼ ri utobʼanik ri espíritu santo, rajawaxik kinbʼan chi jumul ri bʼix y kinkoj tzij ri kchʼobʼotajik.
16 We rukʼ ri utobʼanik ri espíritu santo ri at tajin kaya uqʼij ri Dios pa jun chi idioma, ¿la kkowin riʼ ri winaq kubʼij «amén» we kuchʼobʼ ta ri tajin kabʼij?
17 Paneʼ utz ri tajin kabʼan che ubʼanik ri a oración, pero tajin ta keʼatoʼ riʼ ri nikʼaj chik.
18 Kinmaltyoxij che ri Dios rumal che más wetaʼm kʼi idiomas chiwach ix.
19 Pero are chiʼ kʼo kinkʼut pa ri congregación are más utz kwilo xa kebʼ oxibʼ tzij kinkojo pero qas kechʼobʼotajik, chuwach we kinkoj 10 mil tzij pa jun chi idioma y kechʼobʼotaj taj.
20 Qachalal, kixchoman taj je jas kubʼan jun akʼal, xaneʼ chixchomanoq je jas kubʼan jun winaq ri kʼo chi ujunabʼ. Y chibʼanaʼ iwe je jas jun akʼal ri kubʼan ta itzelal.
21 Tzʼibʼam kʼu pa ri Ley: «‹Kenchʼabʼej na ri winaq re wajun tinamit riʼ pa jalajoj taq idiomas y kenkoj na winaq re nikʼaj chi tinamit che kitoʼik pero ri e areʼ kkita ta chʼabʼexik›, kcha ri Jehová».*
22 Rumal che ri kechʼaw pa jalajoj idiomas are jun etal* chke ri kekojon ta chrij ri Jesús, man chke taj ri kekojonik. Y ri profecías are jun etal chke ri kekojon chrij ri Jesús, man chke ta ri kekojon taj.
23 Rumal laʼ, we juntir ri e kʼo pa ri congregación kkimulij kibʼ pa jun lugar y e juntir kechʼaw pa jalajoj taq idiomas, tekʼuriʼ kopan jun winaq ri kʼo ta retaʼm o jun winaq ri kojonaq ta chrij ri Jesús, ¿la ma ta kubʼij riʼ che xa xixkonirik?*
24 Pero we ix juntir tajin kibʼan profetizar y kopan jun winaq ri kojonaq ta chrij ri Jesús o jun winaq ri kʼo ta retaʼmabʼal, are chiʼ kuta ri tajin kibʼij, kunaʼ riʼ che xa tajin kpixbʼexik* y kumaj rilik riʼ jas ri qas tajin kubʼan ri areʼ.
25 Rumal che qas retaʼm chik ri tajin kubʼano, kxukiʼ riʼ y kuqasaj ri upalaj riʼ cho ri ulew che uqʼijilaxik ri Dios y kubʼij: «Qastzij wi che kʼo ri Dios iwukʼ».
26 Rumal laʼ qachalal, iwetaʼm chik ri rajawaxik kibʼano are chiʼ kimulij iwibʼ. E jujun chiwe kebʼixonik, e nikʼaj chik kixkitijoj chrij ri utzij ri Dios, e nikʼaj chik kkibʼij ri kuqʼalajisaj ri Dios chkiwach, e nikʼaj chik kekowinik kechʼaw pa jalajoj taq idiomas y e nikʼaj chik kekowinik kkibʼan traducir. Pero rajawaxik kibʼan wariʼ rech kitolaʼ iwibʼ.
27 Y ri kechʼaw pa jalajoj idiomas rajawaxik xa kebʼ o oxibʼ kechʼawik y kkeyeʼj na ri ki turno, xuqujeʼ rajawaxik kʼo jun kbʼanow traducir ri kkibʼij.
28 Pero we kʼo ta nijun kbʼanow traducir ri kkibʼij mechʼaw chkiwach ri qachalal, xaneʼ xaq pa kanimaʼ chechʼaw wi rukʼ ri Dios.
29 Xa e kebʼ o e oxibʼ chke ri profetas kechʼawik y ri e nikʼaj chik qas chkitatabʼej y chechoman chrij ri xyaʼ ubʼixik.
30 Pero we kʼo jun qachalal kʼo pa riqbʼal ibʼ y xaq kʼateʼ kʼo xqʼalajisax chuwach rumal ri Dios, ri tajin kchʼaw nabʼe rajawaxik kutanabʼaʼ tzijonem.
31 Ix juntir kixkowinik kibʼan profetizar pero rajawaxik chijujunal kibʼano, rech juntir kʼo kketaʼmaj chrij ri kibʼij y kuya kichuqʼabʼ.
32 Ri profetas rajawaxik qas utz kkibʼan che ubʼanik ri chak ri uyaʼom ri Dios chke.
33 Rumal che ri Dios utz krilo kbʼan ri jastaq rukʼ cholajil y jamaril.
Pa ronojel taq ri congregaciones kech ri e chaʼom,
34 rajawaxik che ri ixoqibʼ kechʼaw taj, rumal che yaʼtal taj kkibʼan wariʼ. Xaneʼ chenimanoq junam rukʼ ri kubʼij ri Ley.
35 We ri ixoq kʼo kraj kretaʼmaj, chutaʼ che ri rachajil cho rachoch, rumal che kʼixbʼal we jun ixoq kchʼaw chkiwach ri qachalal pa ri congregación.
36 ¿La chiwe ix nabʼe xtzijox wi ri utzij ri Dios? ¿La xaq xiw chiwe ix xtzijox wi?
37 We ix ix profeta o kʼo chi jun jastaq kixkowinik kibʼano rukʼ ri utobʼanik ri espíritu santo, rajawaxik kinimaj ri xintzʼibʼaj bʼi chiwe rumal che are waʼ ri kubʼij ri Qajaw.
38 Pero we kʼo jun chiwe kniman taj, kqaj ta riʼ ri winaq riʼ chuwach ri Dios.*
39 Rumal laʼ qachalal chikojoʼ ichuqʼabʼ che ubʼanik profetizar y miqʼatej kiwach ri winaq ri kechʼaw pa jalajoj taq idiomas.
40 Qas utz chibʼanaʼ che juntir wariʼ y rukʼ cholajil chibʼanaʼ.
