Ri nabʼe carta xtaq bʼi chke ri aj Corinto 16:1-24
16 Are chiʼ kimol pwaq che kitoʼik ri e chaʼom, chibʼanaʼ ri xinya kan ubʼixik pa taq ri congregaciones re Galacia.
2 Pa ri nabʼe qʼij re ronojel taq semanas chitasaʼ kan jubʼiqʼ che ri pwaq kichʼako rech kiya che tobʼanik, rech kʼateʼ ta kimulij are chiʼ kinopanik.
3 Y are chiʼ kinopan iwukʼ, keʼintaq bʼi pa Jerusalén ri achijabʼ che e ichaʼom chik rech kkikʼam bʼi ri pwaq imulim.
4 Pero we rajawaxik kinbʼe in, kinbʼe kukʼ.
5 Nabʼe kinqʼax na bʼi pa Macedonia, tekʼuriʼ kinopan iwukʼ.
6 Y weneʼ kinkʼojiʼ na kan jun tiempo iwukʼ o kinqʼaxej ri qʼalaj chilaʼ, tekʼuriʼ kinijachaʼ kan pa ri bʼe.
7 Y we ri Jehová* kraj, kwaj kinkʼojiʼ na jun tiempo iwukʼ y xaq ta aninaq kinqʼax bʼik.
8 Rumal laʼ, kinkanaj na pa Éfeso kʼa kkʼis na ri Nimaqʼij re Pentecostés,
9 rumal che kʼo kʼi chak kinbʼan na, pero e kʼo kʼi nukʼulel.
10 Y we kopan ri Timoteo, utz ukʼulaxik chibʼanaʼ rech kuxiʼj ta ribʼ, rumal che xuqujeʼ tajin kubʼan ri uchak ri Jehová, junam wukʼ in.
11 Rumal laʼ, nim chiwilaʼ wi y utz rilixik chibʼanaʼ. Chijachaʼ kan pa ri bʼe rech utz uwach kul wukʼ, rumal che tajin kqeyeʼj chi waral.
12 Kʼi mul xinbʼij che ri Apolos kbʼe kukʼ ri qachalal che iwilik, pero xkowin taj, kʼateʼ kbʼe chilaʼ are chiʼ kkowinik.
13 Qas chixkʼaskʼatoq, miya kan ukubʼsaxik ikʼuʼx chrij ri Dios, mixiʼj iwibʼ, y ko chixtakʼaloq.
14 Qas rukʼ iwanimaʼ chibʼanaʼ ronojel ri jastaq.
15 Qachalal, kʼo kwaj kinbʼij chiwe. Ix qas iwetaʼm che ri Estéfanas y ri e kʼo pa ri rachoch are ri nabʼe taq cristianos re ri tinamit Acaya y ri e areʼ xekipatanij ri qachalal.
16 Cheʼinimaj ri qachalal ri e junam rukʼ ri Estéfanas, che sibʼalaj ketobʼanik y kechakunik.
17 Sibʼalaj kinkikotik che e kʼo ri Estéfanas, ri Fortunato y ri Acaico wukʼ, rukʼ wariʼ kinnaʼo che xaq ta nutukel, paneʼ ix kʼo ta ix wukʼ.
18 Sibʼalaj xkiya nuchuqʼabʼ in y sibʼalaj xkiya ichuqʼabʼ ix, rumal laʼ nim cheʼiwilaʼ wi.
19 Ri qachalal re Asia, ri Áquila y ri Prisca, xuqujeʼ ri qachalal ri kkimulij kibʼ pa ri kachoch, kkitaq bʼi i saludo pa ubʼiʼ ri Qajaw.
20 E juntir ri qachalal waral kkitaq bʼi i saludos. Y ri ix chikʼutuʼ che kiwaj iwibʼ* are chiʼ kiya rutzil iwach.
21 Ri in Pablo, kintaq bʼi i saludos y qas in xintzʼibʼanik.
22 We kʼo jun nim ta kril ri Qajaw, kqʼat na tzij puwiʼ. ¡Chatpet bʼaʼ Qajaw!
23 Chkʼol bʼaʼ ri nimalaj rutzilal ri Qajaw Jesús iwukʼ.
24 Ri ix, ri ix u discípulo ri Cristo Jesús kwaj kiwetaʼmaj che sibʼalaj kixwaj.
