Ri nabʼe carta xtaq bʼi chke ri aj Corinto 5:1-13

  • Kʼo jun winaq tajin kubʼan tzʼilalaj taq makaj chixoʼl (1-5)

  • «Xa rukʼ jubʼiqʼ levadura kasipoj juntir ri qʼor» (6-8)

  • «Chiwesaj bʼi ri itzel winaq ri kʼo chixoʼl» (9-13)

5  Xbʼix chwe che chixoʼl ix tajin kbʼan tzʼilalaj taq makaj,* rumal che kʼo jun achi xubʼan rixoqil che ri rixoqil ri utat* y wariʼ sibʼalaj awas rumal che ni ri winaq ri ketaʼm ta uwach ri Dios kkibʼano. 2  ¿La xa kixkikot rumal ri tajin kubʼano? ¿La ma ta are rajawaxik kixbʼisonik? ¿La ma ta are utz kiwesaj bʼi ri jun achi riʼ chixoʼl? 3  Paneʼ in kʼo ta iwukʼ chilaʼ, pero iwetaʼm ri kinchomaj* y nuqʼatom chi tzij puwiʼ wajun achi riʼ, jetaneʼ in kʼo iwukʼ. 4  Are chiʼ kimulij iwibʼ pa ri ubʼiʼ ri Qajaw Jesús, chnaʼtaj chiwe ri kinchomaj.* Y rumal che kʼo ri u poder ri Qajaw Jesús iwukʼ, 5  chiwesaj bʼi ri jun achi riʼ chixoʼl, chiyaʼ pa uqʼabʼ ri Satanás rech ksach uwach ri makaj ri xrokisaj pa ri congregación y jeriʼ kʼo ta jun itzelal kriqitaj pa ri congregación are chiʼ kopan ri qʼij kpe ri Qajaw. 6  Utz taj che kqabʼan nim che qibʼ. ¿La ma ta iwetaʼm che xa rukʼ jubʼiqʼ levadura kasipoj juntir ri qʼor? 7  Chiwesaj bʼi ri ojer qʼor ri kʼo levadura rukʼ, rech jetaneʼ ix jun kʼakʼ qʼor chik ri kʼo ta levadura rukʼ. Rumal che ri Cristo ri alaj qachij* re ri Pascua ya xkamisaxik. 8  Rech are chiʼ kqabʼan ri nimaqʼij rech ri Pascua, kqatij ta kaxlanwa ri bʼanom rukʼ ri ojer qʼor ri kʼo levadura rukʼ, ri kukʼutunisaj ri makaj y ri itzelal, xaneʼ are kqatij ri kaxlanwa ri kʼo ta levadura rukʼ, ri kukʼutunisaj ri utzilal y ri qas ubʼeʼal. 9  Xintzʼibʼaj bʼi jun carta chiwe rech keʼiwachilaj ta chi ri winaq ri kkibʼan tzʼil taq makaj. 10  Pero rukʼ ri xinbʼij are ta kraj kubʼij che kitas iwibʼ chkij ri winaq* ri kkibʼan tzʼil taq makaj, ri kkirayij kʼi jastaq, ri elaqʼomabʼ o ri kkiqʼijilaj taq dioses. Rumal che we qas kitas iwibʼ chkij ri winaq riʼ, rajawaxik riʼ kixel bʼi cho ri uwach ulew. 11  Pero kinbʼij chiwe che kiwachilaj ta chi jun qachalal ri kubʼan tzʼil taq makaj, kurayij kʼi taq jastaq, kuqʼijilaj taq dioses, kʼax kchʼawik,* kqʼabʼarik o kubʼan elaqʼ. Ni kitij ta iwa rukʼ ri winaq riʼ. 12  Yaʼtal ta chwe in kinqʼat tzij pa kiwiʼ ri winaq ri e kʼo ta pa ri congregación, pero yaʼtal chiwe ix kiqʼat tzij pa kiwiʼ ri e kʼo pa ri congregación, 13  y are ri Dios kqʼatow tzij pa kiwiʼ ri e kʼo ta pa ri congregación. Rumal laʼ, «chiwesaj bʼi ri itzel winaq ri kʼo chixoʼl».

Notas

^ Pa griego kbʼix pornéia che. Chawilaʼ ri diccionario.
^ O «ri unanabʼal».
^ Pa ri idioma girego, «pero in kʼo iwukʼ pa ri espíritu».
^ Pa ri idioma griego, «che in kʼo iwukʼ pa ri espíritu».
^ Pa nikʼaj chi lugar jewaʼ kbʼix che: «ri alaj qakarneʼl».
^ Pa ri idioma griego, «ri winaq re wajun uwach ulew».
^ O «kyoqʼonik».

Copyrights for this publication