Ri nabʼe carta xtaq bʼi chke ri aj Corinto 4:1-21
4 Ri winaq rajawaxik kojkilo che oj kojtobʼan rukʼ ri Cristo y pa qaqʼabʼ yaʼom wi ri xuya ta na ubʼixik ri Dios.
2 Y rajawaxik che ri winaq ri kʼo yaʼom pa kiqʼabʼ qas kkibʼan ri kichak.
3 Ri in kinxiʼj ta wibʼ we ri ix kiqʼat tzij pa nuwiʼ o jun juez kuqʼat tzij pa nuwiʼ rech krilo we kʼo numak. Rumal che ni in kinqʼat tzij pa nuwiʼ.
4 Ri in kinnaʼo che kʼo ta numak, pero wariʼ kraj ta kubʼij che in utz winaq. Xaq xiw ri Jehová* taqal che kuqʼat tzij pa nuwiʼ.
5 Rumal laʼ qachalal miqʼat tzij pa kiwiʼ e nikʼaj chik, we majaʼ kopan ri qʼij kpe ri Qajaw. Ri areʼ kresaj na lo chi saq ri ukʼolom ri winaq pa ri qʼequʼm y kresaj na chi saq ri ukʼolom pa ranimaʼ. Rukʼ wariʼ ri Dios kuya na ri qas taqal chke chkijujunal, kunimarisaj na kiqʼij.
6 Qachalal xinkoj wibʼ in che ejemplo y ri Apolos rech ri ix kʼo kiwetaʼmaj chqij y rech kʼo kiwetaʼmaj chrij ri tzʼibʼam kan pa ri Utzij ri Dios, ri kubʼij: «Kiya ta más uwiʼ ri tzʼibʼam kanoq». Rech jeriʼ kibʼan ta nim che iwibʼ y are ta kitoʼ uwiʼ jun winaq y itzel kiwil jun chik.
7 ¿Jasche* kachomaj at che at junam ta kukʼ ri e nikʼaj chik? ¿Jas ri kʼo awukʼ at ri man yaʼom ta chawe rumal ri Dios? We kʼu are ri Dios yowinaq chawe, ¿jas kʼu che kabʼan nim che awibʼ che jetaneʼ xaq atukel at riqowinaq?
8 ¿La kichomaj che kʼo chi juntir iwukʼ? ¿La kichomaj che ix qʼinomabʼ* chik? ¿La ya ximajij uqʼatik tzij paneʼ majaʼ kqamajij oj? Utz riʼ we ya ximajij uqʼatik tzij rech jeriʼ ri oj kqamaj uqʼatik tzij iwukʼ.
9 Oj ri oj apóstoles, oj ukʼisbʼal grupo ri jetaneʼ kuya ri Dios cho jun escenario, ri qʼatom chi tzij pa qawiʼ rech kojkamisaxik. Xojya cho ri escenario rech kekaʼy e juntir ri winaq y ri ángeles chqe.
10 Ri oj kojilik che kʼo ta qanojibʼal rumal che oj teren chrij ri Cristo, pero ri ix kichomaj che kʼo inojibʼal rumal che ix teren chrij ri Cristo; ri oj kojilik che kʼo ta qachuqʼabʼ, pero ri ix kixilik che kʼo ichuqʼabʼ; ri ix kyaʼ nim iqʼij, pero ri oj itzel kojilik.
11 Kamik, tajin kqanaʼ na numik, kchaqij qachiʼ, kʼo ta más qatzʼyaq, kojchʼayik, kʼo ta qachoch
12 y kqakʼis qibʼ pa chak. Are chiʼ kojyoqʼik, ri oj kojtewchinik; are chiʼ kbʼan kʼax chqe, ri oj rukʼ paciencia kqachʼijo;
13 are chiʼ kmol tzij chqij, ri oj utz kojchʼaw chkij ri winaq. Ri winaq tajin kojkil na junam rukʼ mes, kʼo ta qapatan chkiwach.
14 Tajin ta kintzʼibʼaj wariʼ chiwe xa rumal che kwaj kinwesaj ikʼixbʼal, xaneʼ sibʼalaj kixwaj, ix jetaneʼ ix walkʼwal rumal laʼ kinya consejos chiwe.
15 Paneʼ e kʼo 10 mil i maestros* ri kkikʼut chiwach jas ri kibʼan che uterenexik ri Cristo, pero konojel taj e itat, rumal che in xinok itat are chiʼ xintzijoj ri utzalaj taq noticias chiwe chrij ri Cristo Jesús.
16 Rumal laʼ kintaʼ jun toqʼobʼ* chiwe, chibʼanaʼ iwe jas ri kinbʼan in.
17 Kintaq kʼu bʼi ri Timoteo iwukʼ, ri loqʼalaj nukʼojol y ri kupatanij ri Qajaw rukʼ ronojel ranimaʼ. Ri areʼ kunaʼtajisaj chiwe ri kinbʼan in che ri nuchak rukʼ ri Cristo Jesús, ri xuqujeʼ tajin kinkʼut in chkiwach ri qachalal pa ronojel ri congregaciones.
18 E jujun chiwe kkibʼan nim che kibʼ, kkichomaj che kinopan ta che iwilik.
19 Pero we ri Jehová kraj, kinopan iwukʼ pa kebʼ oxibʼ qʼij, rech kwetaʼmaj kiwach ri winaq ri kkibʼan nim che kibʼ. Pero xa ta rumal che kwaj kinta ri kkibʼij, xaneʼ kwaj kwilo we qas kʼo ri u poder ri Dios kukʼ.
20 Ri kkʼutuwik che kojniman che ri Uqʼatbʼal tzij ri Dios,* are ri kqabʼano man are ta ri kqabʼij, rumal che wariʼ kukʼutu che kʼo ri u poder ri Dios qukʼ.
21 ¿Jas ri kiwaj are chiʼ kinopan iwukʼ? ¿La are kiwaj kixinyajaʼ?* O ¿la are kiwaj rukʼ loqʼoqʼebʼal y rukʼ utzilal kixinchʼabʼej?
Notas
^ Chawilaʼ ri tema A5.
^ Pa nikʼaj chi lugar jewaʼ kbʼix che: «Sutan».
^ Pa nikʼaj chi lugar jewaʼ kbʼix che: «ix bʼiʼomabʼ».
^ O «tutores».
^ Pa nikʼaj chi lugar jewaʼ kbʼix che: «kintaʼ jun utzil».
^ O «ri u Reino ri Dios». Chawilaʼ ri diccionario.
^ Pa ri idioma griego, «¿La kiwaj kinkʼam bʼi cheʼ chiwij?».
