Ri nabʼe carta xtaq bʼi chke ri aj Corinto 8:1-13

  • Ri Pablo kchʼaw chrij ri rikil che kyaʼ chkiwach ri dioses (1-13)

    • «Chqawach oj xa jun Dios kʼolik» (5, 6)

8  Chanim riʼ kwaj chik kinchʼaw iwukʼ chrij ri rikil* ri kyaʼ chkiwach ri dioses, ix iwetaʼm chrij wariʼ. Chnaʼtaj chiwe che ri etaʼmabʼal kubʼano che ri winaq kubʼan nim che ribʼ, pero ri loqʼoqʼebʼal kubʼano che keqatoʼ ri nikʼaj chik. 2  We kʼo jun winaq kuchomaj che retaʼm chi ronojel, qastzij taj, majaʼ qas kretaʼmaj. 3  Y ri winaq ri kuloqʼoqʼej ri Dios, etaʼmatal uwach rumal ri Dios. 4  Chanim riʼ chojchʼawampeʼ chrij ri rikil ri kyaʼ chkiwach ri dioses, pero qetaʼm che ri dioses kʼo ta kipatan, xa jun ri qastzij Dios kʼolik. 5  Chkiwach ri winaq e kʼo kʼi dioses pa ri kaj y pa ri uwach ulew. Are chiʼ laʼ kkibʼij che e kʼo kʼi «dioses» y e kʼo kʼi «ajaw». 6  Pero chqawach oj xa jun Dios kʼolik, ri Qatat, areʼ xbʼanow juntir ri jastaq y oj kʼaslik rech kqapatanij. Xuqujeʼ chqawach oj xa jun Qajaw kʼolik, ri Jesucristo, rumal ri areʼ xebʼan juntir ri jastaq y rumal ri areʼ kʼo qakʼaslemal. 7  Pero juntir taj ketaʼm wariʼ. Rumal che e jujun ojer kanoq xekiqʼijilaj dioses, rumal laʼ are chiʼ kkitij ri rikil ri yaʼom chkiwach ri dioses, kkinaʼo che jetaneʼ tajin kekiqʼijilaj. Y rumal che qas ta kkichʼobʼo jachike ri utz y ri utz taj,* kkinaʼ pa kanimaʼ che awas ri tajin kkibʼano. 8  Pero ri rikil kubʼan taj chi kojqebʼ más rukʼ ri Dios. Rumal laʼ kʼo ta kubʼano we kqatijo xuqujeʼ kʼo ta kubʼano we kqatij taj. 9  Paneʼ kʼo i derecho kitij ri kiwaj, pero chichajij iwibʼ rech kibʼan ta kʼax chke ri qachalal ri qas ta kkichʼobʼo jachike ri utz y ri utz taj. 10  At ri kʼo awetaʼmabʼal, weneʼ jun qachalal katril kanoq che tajin katwaʼ pa ri templo kech ri tyox, weneʼ umak awech ri qachalal riʼ ri qas ta retaʼm jachike ri utz y ri utz taj kraj kutij ri rikil che yaʼom chkiwach ri tyox. 11  Paneʼ at katkowinik katij ri rikil riʼ pero rukʼ wariʼ tajin kabʼan kʼax che ri rachilanik ri awachalal rukʼ ri Dios, rumal laʼ chnaʼtaj chawe che ri Cristo xuqujeʼ xkam rumal ri awachalal riʼ. 12  We kabʼan wariʼ che ri awachalal, tajin kabʼan kʼax che ri u conciencia y tajin katmakun chuwach ri Cristo. 13  Rumal laʼ we ri rikil kintijo kutzaq ri wachalal, kintij ta chi bʼaʼ tiʼj rech kintzaq ta ri wachalal.

Notas

^ O weneʼ «tiʼj».
^ O «Y rumal che qas ta utz ri ki conciencia».

Copyrights for this publication