Ri nabʼe carta xtaq bʼi chke ri aj Corinto 7:1-40
7 Kwaj kinya u respuesta ri i pregunta ri xitzʼibʼaj lo chwe. Are más utz na we ri achi kkʼuliʼ taj y kqʼoyiʼ ta rukʼ nijun ixoq.
2 Pero rumal che e kʼi tajin keqaj pa ri tzʼilalaj taq makaj,* rumal laʼ más utz na che ri achi kʼo rixoqil y ri ixoq kʼo rachajil.
3 Rajawaxik che ri achi kubʼan rukʼ ri rixoqil ri rajawaxik kubʼano* y ri ixoq rajawaxik kubʼan rukʼ ri rachajil ri rajawaxik kubʼano.
4 Ri ixoq are ta chi ktaqan puwiʼ ri u cuerpo, xaneʼ are ri rachajil. Xa junam, ri achi are ta chi ktaqan puwiʼ ri u cuerpo, xaneʼ are ri rixoqil.
5 Kiya ta kan ubʼanik ri relaciones sexuales, we kiya kan ubʼanik rajawaxik ix kebʼ kichomaj kiya kan ubʼanik y kibʼan wariʼ xa rumal che kiwaj kikoj ri i tiempo che ubʼanik orar. Pero rajawaxik xa jun tiempo kiya kan ubʼanik rech kixqaj ta pa tentación rumal ri Satanás y kixkʼojiʼ chi rukʼ jun winaq xa rumal che kixkowin taj kiqʼil iwibʼ.*
6 Kinbʼij wariʼ chiwe rech kiwetaʼmaj jas ri kixkowinik kibʼano, pero xa ta tajin kixintaq che ubʼanik.
7 Kwaj taneʼ che e juntir ri achijabʼ e junam wukʼ in, pero ri Dios junam ta ri uyaʼom chqe chqajujunal: jun wi ri uyaʼom che jun y jun wi ri uyaʼom che jun chik.
8 Más utz na we ri e kʼulan taj y ri kaminaq kikʼulaj kkibʼan ke junam wukʼ in.
9 Pero ri kekowin taj kkiqʼil kibʼ más utz we kekʼulik, chuwach xaq kkirayij keqʼoyiʼ rukʼ jun winaq.
10 Kwaj kinbʼij chke ri e kʼulanik, rajawaxik che ri ixoqibʼ kkiya ta kan ri kachajil, pero in taj kinbʼinik xaneʼ are ri Qajaw.
11 We ri ixoq kuya kan ri rachajil, makʼuliʼ chik. Pero we kraj taj kkʼojiʼ utukel chutzir bʼaʼ* rukʼ ri rachajil. Y ri achi rajawaxik kujach ta kan ri rixoqil.
12 Pero are waʼ ri kwaj kinbʼij chke ri e nikʼaj chik, are ta chi ri Qajaw kbʼinik, we jun qachalal achi kʼo rixoqil ri kkojon ta chrij ri Qajaw, pero ri ixoq kraj kkanaj kan rukʼ, mujach bʼaʼ kan ri rixoqil.
13 Y we ri rachajil jun qachalal ixoq kkojon ta chrij ri Qajaw, pero ri achi kraj kkanaj kan rukʼ, mujach bʼaʼ kan ri rachajil.
14 Ri achi ri kkojon ta chrij ri Qajaw kux na chʼajchʼoj chuwach ri Dios rumal ri qachalal ixoq. Y ri ixoq ri kkojon ta chrij ri Qajaw kux na chʼajchʼoj chuwach ri Dios rumal ri qachalal achi. Rumal laʼ xuqujeʼ ri kalkʼwal e chʼajchʼoj chi chuwach ri Dios.
15 Pero we ri kʼulaj ri kkojon ta chrij ri Qajaw kraj kujach kanoq, utz riʼ we kbʼek. Rajawaxik taj che jun qachalal kkʼojiʼ rukʼ ri ukʼulaj, we ri ukʼulaj kraj taj kkʼojiʼ rukʼ. Rumal che ri Dios kraj kkʼojiʼ jororibʼal chqaxoʼl.
16 At ixoq, we kajach ta kan ri awachajil, weneʼ katkowinik katoʼ rech kkojon chrij ri Qajaw. Y ri at achi, we kajach ta kan ri awixoqil, weneʼ katkowinik katoʼ rech kkojon chrij ri Qajaw.
17 Chijujunal bʼaʼ chixkikot rukʼ ri ikʼaslemal je jas uyaʼom ri Jehová* chiwe, are chiʼ majaʼ kiwetaʼmaj uwach. Are waʼ ri kinbʼij pa juntir taq ri congregaciones.
18 We kʼo jun achi chixoʼl ri ubʼanom chi circuncidar ribʼ are chiʼ xretaʼmaj uwach ri Dios, mubʼano che ubʼanom ta circuncidar* ribʼ. Y we kʼo jun achi chixoʼl ri ubʼanom ta circuncidar ribʼ are chiʼ xretaʼmaj uwach ri Dios, mubʼan circuncidar ribʼ.
19 Ri más nim ubʼanik are unimaxik ri ktaqan wi ri Dios, man are taj we ri winaq ubʼanom circuncidar ribʼ o ubʼanom taj.
20 Chijujunal chixkikot rukʼ ri ikʼaslemal je jas uyaʼom ri Dios chiwe.
21 Matbʼisonik we at esclavo are chiʼ xawetaʼmaj uwach ri Dios. Pero we katkowinik katel che esclavo, utz riʼ.
22 We at esclavo are chiʼ xatsikʼix rumal ri Qajaw rech katok u discípulo, at esclavo ta chi chuwach ri Qajaw. Pero we at esclavo taj are chiʼ xatsikʼix rumal ri Cristo, katok na resclavo.
23 Nim xutoj ri Dios rech xixuloqʼo; rumal laʼ miya chi bʼe ketaqan ri winaq piwiʼ.
24 Qachalal, chixkikot rukʼ ri ikʼaslemal je jas ri uyaʼom ri Dios chiwe are chiʼ majaʼ kiwetaʼmaj uwach.
25 Xuqujeʼ kʼo kwaj kinbʼij chke ri man e kʼulan taj, pero man are ta ri Qajaw bʼinaq chwe, xaneʼ are ri kinchomaj in, ri toqʼobʼisam nuwach rumal ri Qajaw rech kinya ta kan upatanexik.
26 Rumal ri kʼax kqil kamik, kinchomaj in, che xaq utz laʼ jelaʼ kibʼan kanoq je jas ibʼanom kamik.
27 We kʼo chi awixoqil, majach bʼik. We majaʼ kʼo awixoqil, matzukuj bʼaʼ awixoqil.
28 Awas taj we katkʼulik. Y awas taj we jun ala o jun ali* kkʼuliʼk. Pero ri kekʼulik kkiriq na kʼax pa ri kikʼaslemal y ri in kwaj taj kkiriq kʼax.
29 Qachalal, are waʼ ri kinchomaj in, rumal che oj kʼo chi pa ri kʼisbʼal taq qʼij. Ri e kʼulanik chkibʼanaʼ che jetaneʼ kʼo ta kixoqil
30 y ri keʼoqʼik chkibʼanaʼ che jetaneʼ keʼoqʼ taj; ri kekikotik chkibʼanaʼ che jetaneʼ kekikot taj; ri kkiloqʼ jastaq chkibʼanaʼ che jetaneʼ kʼo ta jastaq ke
31 y ri kkikoj ri jastaq re ri uwach ulew chkibʼanaʼ che jetaneʼ kkikoj taj. Rumal che ri uwach ulew tajin ksach uwach.*
32 Ri kwaj in are che kʼo ta jas kibʼisoj, rumal che ri achi ri kʼulan taj xaq xiw kok il che ri jastaq re ri Qajaw y krilo jas rajawaxik kubʼano rech kqaj chuwach ri Qajaw.
33 Pero ri kʼulanik are kok il che ri jastaq ri kʼo cho ri uwach ulew y are krilo jas rajawaxik kubʼano rech kqaj chuwach ri rixoqil,
34 rumal laʼ kkowin taj kuya ronojel che ri Dios. Ri ixoq y ri ali ri e kʼulan taj, are más keʼok il che ri jastaq re ri Qajaw y are kkilo jas rajawaxik kkibʼano rech ri ki cuerpo y ri kichomanik e chʼajchʼoj. Pero ri ixoq ri kʼulanik are kok il che ri jastaq ri kʼo cho ri uwach ulew y krilo ri rajawaxik kubʼano rech kqaj chuwach ri rachajil.
35 Kinbʼij wariʼ chiwe rech kiriq utzilal. Xa ta kwaj kixinqʼatej, xaneʼ kwaj che kibʼan ri utz y rech kʼo ta jun jastaq kixqʼaten che upatanexik ri Qajaw.
36 Pero we jun kunaʼo che rajawaxik jun ukʼulaj,* chkʼulan bʼaʼ we ya kʼo chi ujunabʼ, awas taj we kkʼuliʼk.
37 Pero we jun kunaʼo che rajawaxik taj kkʼuliʼk, kkowinik kuqʼil ri u cuerpo y qas uchomam chik che kkʼuliʼ taj, utz we je kubʼano.
38 Rumal laʼ utz we jun winaq kkʼuliʼk, pero are más utz na we kkʼuliʼ taj.
39 Ri ixoq rajawaxik kkʼojiʼ rukʼ ri rachajil we ri achi kʼa kʼasal na. Pero we kkam ri rachajil utz kkʼuliʼk we kraj, pero rajawaxik xaq xiw kkʼuliʼ rukʼ jun winaq ri kniman che ri Qajaw.*
40 Pero kinchomaj in, más kkikot na riʼ ri ixoq we kkʼuliʼ ta chik. Y ri in qas wetaʼm che kʼo ri u espíritu ri Dios pa nuwiʼ.
Notas
^ Waral ri tzij griega pornéia kchʼaw chrij kʼi uwach makaj. Chawilaʼ ri diccionario.
^ Wariʼ kraj kubʼij ri relaciones sexuales.
^ O «kibʼan controlar iwibʼ».
^ O «chtzalij bʼaʼ».
^ Chawilaʼ ri tema A5.
^ Chawilaʼ ri diccionario.
^ Are kchʼaw chrij jun ala o jun ali che ubʼanom ta relaciones sexuales.
^ O «tajin kkʼextajik».
^ O «kkowin taj kuqʼil ri u cuerpo chrij ri relaciones sexuales».
^ O «xaq xiw kkʼuliʼ rukʼ jun u discípulo ri Qajaw».
