Ri nabʼe carta xtaq bʼi chke ri aj Corinto 12:1-31
12 Qachalal, kwaj kiwetaʼmaj ri kixkowinik kibʼan rukʼ ri utobʼanik ri espíritu santo.
2 Ri ix iwetaʼm che are chiʼ majaʼ kixkojon chrij ri Qajaw, xiqʼijilaj y xibʼan ri xkaj ri dioses ri kechʼaw taj.
3 Kwaj kinbʼij chiwe che we jun winaq kʼamom ubʼe rumal ri espíritu santo kuyoqʼ ta ri Jesús. Y kʼo ta nijun winaq kkowinik kubʼij che ri Jesús are Qajaw we are ta ri espíritu santo bʼinaq che.
4 Jalajoj ri kojkowinik kqabʼano, pero xa jun ri espíritu santo kʼolik;
5 jalajoj chak kojkowinik kqabʼano rech kqapatanij ri Dios, pero xa jun ri Qajaw kʼolik.
6 Jalajoj ri kubʼan ri Dios che kitoʼik ri winaq rech kekowinik kkibʼan kʼi jastaq, pero xa jun Dios kʼolik.
7 Rumal ri kojkowinik kqabʼano qas qʼalaj are chiʼ kʼo ri espíritu santo pa qawiʼ y wariʼ kuya utzilal chqe qonojel.
8 Y are ri espíritu santo kbʼanowik che e kʼo kechʼaw rukʼ nojibʼal y e nikʼaj chik kechʼaw chrij jastaq che kubʼij ri espíritu chke.
9 Ri espíritu santo kubʼan chke e nikʼaj chik che qas kkikubʼsaj kikʼuʼx chrij ri Dios y kubʼan chke e jujun chik che kekowinik kekunanik.
10 Y ri espíritu santo ubʼanom che e nikʼaj chik kekowinik kkibʼan milagros, e nikʼaj chik kekowinik kkibʼan profetizar, y e nikʼaj chik kekowinik kkichʼobʼo we ri tajin kkʼutik rukʼ ri Dios petinaq wi, y e nikʼaj chik kekowinik kechʼaw pa jalajoj taq idiomas, y e nikʼaj chik e utoʼom rech kekowinik kkibʼan traducir pa nikʼaj chi idiomas.
11 Ri winaq kekowinik kkibʼan juntir wariʼ rumal ri utobʼanik ri espíritu santo, pero are ri u espíritu santo ri Dios kilowik jas kuya che ri winaq.
12 Junam rukʼ ri qa cuerpo kʼi partes kʼo che pero xa jun ri cuerpo, paneʼ kʼi partes kʼolik pero xa jun kibʼanom. Y jewaʼ ubʼanom ri u cuerpo ri Cristo.
13 Pero oj juntir xqabʼan qa bautismo rukʼ espíritu santo rech kqabʼan xa jun cuerpo. Paneʼ oj judío, oj griego, oj esclavos o oj esclavos taj, oj juntir xyaʼ espíritu santo chqe.
14 Y jelaʼ ubʼanom ri cuerpo xa ta jun ubʼanik, xaneʼ e kʼi partes e kʼo che.
15 We ta ri aqanaj kkowinik kchʼawik y kubʼij: «Rumal che in qʼabʼaj taj, in rech ta ri cuerpo», paneʼ kubʼij wariʼ pero rech wi na ri cuerpo.
16 Y we ri xikinaj kkowinik kchʼawik y kubʼij: «Rumal che in bʼaqʼwachaj taj, in rech ta ri cuerpo», paneʼ kubʼij wariʼ pero rech wi na ri cuerpo.
17 We ta juntir ri cuerpo are bʼaqʼwachaj ¿la kkowin riʼ ri winaq kuto?, y we ta juntir ri cuerpo are xikinaj ¿la kkowin riʼ ri winaq kunaʼ ri ruxlabʼ ri jastaq?
18 Pero ri Dios xeʼukoj kan ri partes rech ri cuerpo pa taq ri lugar ri xril wi ri areʼ che utz kukoj wi.
19 We ta xa jun uwach kʼo che ri cuerpo, ¿jas ta ubʼanik riʼ ri cuerpo?
20 Kʼi kʼu ri u partes ri cuerpo kʼolik, pero xa jun ri cuerpo.
21 Ri bʼaqʼwachaj kkowin taj kubʼij che ri qʼabʼaj «At rajawaxik ta chwe» ni ri jolomaj kkowin taj kubʼij chke ri aqanaj «Ix rajawaxik ta chwe».
22 Pero ri partes re ri cuerpo che kqachomaj oj che qas ta kʼo kipatan, kʼo kipatan.
23 Y ri partes re ri qa cuerpo che kqachomaj oj che qas ta nim kibʼanik keqachajij; rukʼ wariʼ ri nim ta kibʼanik, qas loqʼ keqilo.
24 Y ri parte re ri qa cuerpo che kqachomaj oj che más utz, kʼo ta rajawaxik che. Pero ri Dios qas utz xubʼan che juntir ri cuerpo rumal laʼ ri parte che kqachomaj oj che kʼo rajawaxik che más utz uchajixik xubʼano.
25 Xubʼan wariʼ rech kʼo ta jachoj ibʼ chkixoʼl ri partes re ri cuerpo y chkijujunal kkichajij kibʼ chbʼil taq kibʼ.
26 We jun parte re ri qa cuerpo kuriq kʼax juntir ri e nikʼaj chik kkinaʼ ri qʼoxom. Y we jun parte re ri qa cuerpo nim kilik juntir ri e nikʼaj chik kekikot rukʼ.
27 Ri ix ix u cuerpo ri Cristo, y chijujunal, ix jun parte re ri u cuerpo.
28 Y ri Dios jalajoj chak xuya chke ri e kʼo pa ri congregación, jewaʼ xubʼano: nabʼe xeʼukoj kan ri apóstoles; ukabʼ xeʼukoj kan ri profetas; urox xeʼukoj kan ri maestros; tekʼuriʼ ri kkibʼan milagros, ri kekowinik kekunanik; ri kekitoʼ e nikʼaj chik; ri e kʼamal taq bʼe y ri kechʼaw pa jalajoj taq idiomas.
29 ¿La e juntir apóstoles? ¿La e juntir profetas? ¿La e juntir maestros? ¿La e juntir kekowinik kkibʼan milagros?
30 ¿La e juntir kekowinik kekunanik? ¿La e juntir kekowinik kechʼaw pa jalajoj taq idiomas? ¿La juntir kekowinik kkibʼan traducir?
31 Kiya ta kan ukojik ichuqʼabʼ rech rukʼ ri utobʼanik ri espíritu santo más kixnaʼw che ubʼanik kʼi chak pa ri congregación. Ri in kinkʼut kʼu na ri bʼe ri más nim ubʼanik chiwach.
