Ri nabʼe carta xtaq bʼi chke ri aj Corinto 3:1-23

  • Kjunamataj na ri kichomanik ri corintios rukʼ ri ke ri winaq (1-4)

  • «Are ri Dios xkʼiyisanik» (5-9)

    • Ri oj kojchakun rukʼ ri Dios (9)

  • Ri kkoj che uyakik ri ja rajawaxik kuchʼij ri qʼaqʼ (10-15)

  • «Ri ix ix u templo ri Dios» (16, 17)

  • «Ri kinojibʼal ri winaq kʼo ta upatan chuwach ri Dios» (18-23)

3  Qachalal, rumal che kʼamom ta ibʼe rumal ri u espíritu ri Dios, ix junam kukʼ akʼalabʼ kichʼobʼ ta más uwach ri Cristo y kixchoman junam kukʼ ri winaq. Rumal laʼ xinbʼij ta jastaq chiwe ri kinbʼij chke ri winaq che kʼamom kibʼe rumal ri u espíritu ri Dios. 2  Ojer kanoq xaq xiw leche xinya chiwe, rumal che kʼa majaʼ kixkowinik kitij ri qas wa. Pero kamik xuqujeʼ majaʼ na kixkowinik kitij ri qas wa. 3  Ri ix junam na kixchoman kukʼ ri winaq, rumal che kʼo titikil y chʼaʼoj chixoʼl. Wariʼ kukʼutu che ix junam kukʼ ri winaq re wajun uwach ulew. 4  Are chiʼ ri ix kibʼij: «In in teren chrij ri Pablo», y nikʼaj chik kkibʼij: «In in teren chrij ri Apolos», ¿la ma ta jewaʼ kkichomaj ri winaq? 5  ¿Jas ubʼanik ri Apolos? ¿Jas ubʼanik ri Pablo? Ri e areʼ xaq xiw xetobʼanik rech xixok u discípulo ri Cristo y xaq xiw xkibʼan ri chak ri xuya ri Qajaw chke chkijujunal. 6  In xintikow ri semilla, are ri Apolos xjaʼnik, pero are ri Dios xkʼiyisanik. 7  Ri ktikow ri semilla y ri kjaʼnik nim ta kibʼanik, ri más nim ubʼanik are ri Dios ri kkʼiyisanik. 8  Tekʼuriʼ, ri ktikow ri semilla y ri kjaʼnik xa junam kechakunik, pero chkijujunal ketewchix rumal ri chak kkibʼano. 9  Ri oj xa tajin kojchakun rukʼ ri Dios, ri ix ix jetaneʼ jun ulew ri tajin ktik iwach rumal ri Dios xuqujeʼ ix jetaneʼ jun ja ri tajin kyak rumal ri Dios. 10  Rumal ri nimalaj rutzilal ri Dios xinkowinik xinkoj ri uxeʼ ri ja, kinjunamataj rukʼ jun winaq ri qas retaʼm uyakik ja, pero jun chi wi ri winaq ri tajin kyakow ri ja. Rumal laʼ chqajujunal chqilaʼ ri kqabʼan che uyakik ri ja. 11  Ri Dios xukoj ri Jesucristo che ri raʼ ri ja, rumal laʼ kʼo ta chi jun kkowinik kukʼexo. 12  Ri winaq krilo jas kukoj che uyakik ri ja, we kraj kukoj oro che, plata, jeʼlalaj taq abʼaj, cheʼ, kʼim* o jalajoj uwach qʼayes. 13  Kopan na jun qʼij, kilik jas xel ri kichak ri winaq chkijujunal. Rumal che pa ri qʼij riʼ are ri qʼaqʼ kkʼutuwik jas xel ri kichak chkijujunal. 14  We ri ja ri xuyak ri winaq xuchʼij ri qʼaqʼ, ktewchiʼx na. 15  We kkʼat ri uchak ri winaq ksach uwach riʼ juntir ri uchak, pero ri areʼ kuriq ta kʼax riʼ; junam rukʼ jun winaq ri kkowinik kanimaj chuwach jun poroʼn.* 16  ¿La ma ta iwetaʼm che ri ix ix u templo ri Dios y kʼo ri u espíritu ri Dios iwukʼ? 17  We kʼo jun winaq kuwulij ri u templo ri Dios, ri areʼ ksachisax na uwach rumal ri Dios, rumal che santo ri u templo ri Dios y ix waʼ ri ix u templo. 18  Mibʼan engañar iwibʼ: we kʼo jun chiwe pa taq we qʼij riʼ, kuchomaj che kʼo unoʼj, are más utz we kubʼano che kʼo ta unoʼj rech kuriq unojibʼal. 19  Ri kinojibʼal ri winaq kʼo ta upatan chuwach ri Dios, rumal che tzʼibʼatal kanoq: «Ri Dios kubʼano che ri winaq ri kʼo kinojibʼal ketzaq pa ri ki trampa». 20  Xuqujeʼ bʼim kan wariʼ: «Ri Jehová* retaʼm che ri kkichomaj ri winaq ri kʼo kinojibʼal kʼo ta upatan». 21  Rumal laʼ, kibʼan ta nim che iwibʼ rumal ri kowinaq ri winaq che ubʼanik, rumal che juntir iwech ix: 22  iwech ri Pablo, ri Apolos, ri Cefas,* ri uwach ulew, ri kʼaslemal, ri kamikal, ri jastaq kʼo kamik, ri jastaq kpe na. Juntir iwech ix. 23  Ri ix ix rech ri Cristo y ri Cristo rech ri Dios.

Notas

^ Pa ri idioma griego, «heno».
^ Pa ri idioma griego, «qʼaqʼ».
^ Chawilaʼ ri tema A5.
^ Xuqujeʼ kbʼix Pedro che.

Copyrights for this publication