Trigj nom Enhault

No de Enhaultslist gonen

 KAPITEL 8

De Israeliten nämen Kanaan en

De Israeliten nämen Kanaan en

Josua leit daut Volkj, aus see Kanaan ennämen. Jehova sat Rechta en, waut daut Volkj von äare Fiend raden.

AUL miere hundat Joa trigj haud Jehova Abraham siene Nokomen daut Launt Kanaan vesproaken. Nu wieren de Israeliten bat doa, daut vesproakne Launt entonämen. Un Josua wia de Leida.

Gott haud beschloten, de Kanaanita to venichten. Daut wia uk kjeen Wunda, wiels dee hauden daut Launt derch un derch besudelt met äa schwienschet Jeschlajchtsläwen un äare Merdarie. De Israeliten sullen de Städa von Kanaan volstendich venichten.

Ea dee daut Launt enneemen, schekjt Josua oba twee Spionen, waut dan no de Staut Jericho kjeemen. Eene Fru, waut Rahab heet, neem dee en äa Hus opp un hilt dee unja Schutz, uk wan see wist, daut daut Israeliten wieren. Rahab jleewd aun de Israeliten äaren Gott, wiels see jehieet haud, woo dee de Israeliten jeholpen haud. See wull haben, de Spionen sullen ar vespräakjen, daut see ar un äare Aunjehieeje veschoonen wudden.

Aus de Israeliten dan ieescht en Kanaan wieren un jäajen de Staut Jericho kjeemen, deed Jehova een Wunda. Hee leet de Mia von Jericho toopbräakjen. Dan neemen Josua siene Truppen de Staut bosich en un venichten dee. Oba Rahab un dee äare Famielje veschoonden see. En de näakjste sas Joa neem Josua von daut vesproakne Launt een grootet Biet no daut aundre en. Dan wort daut Launt aun de Stam Israel vedeelt.

Aum Enj von sienen langen Deenst kroagd Josua daut gaunze Volkj toop. Hee holp an trigjtodenkjen, waut Jehova fa äare Väafoaren aules jedonen haud un rod an too, emma Jehova to deenen. Oba aus Josua un de elre Mana, waut met am toop jedeent hauden, ieescht jestorwen wieren, veleeten de Israeliten Jehova un fungen aun, faulsche Jetta auntobäden. En de näakjste 300 Joa wia daut Volkj emma wada ojjehuarsom. Jehova leet dan too, daut äare Fiend, soo aus de Filista, an väl toosaden. Oba emma, wan de Israeliten Jehova no Help prachaden, sad Jehova eenen Rechta en, om an von äare Fiend to raden. Äwa de Joaren wieren daut aules toop 12 Rechta.

De ieeschta Rechta wia Otniel un de latsta wia Simson, de stoakjsta Mensch, waut daut jejäft haft. Waut en de Tiet von Otniel bat Simson aules passieed, es en daut Bibelbuak Rechta oppjeschräwen. Dise Berechten wiesen eenatlei emma wada sea kloa: Jehova jehorchen brinjt Säajen, oba Jehova nich jehorchen brinjt Lieden.

Stett sikj opp de Bibelbieekja Josua un Rechta un opp 3. Mose 18:24-25.