Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 13

Goode un schlajchte Kjennichs

Goode un schlajchte Kjennichs

Israel woat jedeelt. Äwa de Joaren rejieren väle Kjennichs äwa de Israeliten. De mieeschte sent Gott nich tru. Jerusalem woat von de Babielonia venicht.

SOO aus Jehova verutjesajcht haud, wort Israel jedeelt, wiels Salomo oppjehieet haud, Jehova auntobäden. No Salomo wort sien Sän Rehabeam Kjennich, oba dee wia sea strenj to daut Volkj. Tieen Stam säden sikj doahäa von Rehabeam loos. Oba twee Stam bleewen dän Kjennich en Jerusalem tru, wiels daut een Nokomen von David wia. Soo jeef daut dan daut Nuadkjennichrikj von Israel met tieen Stam un daut Siedkjennichrikj von Juda met twee Stam.

Beid Kjennichrikjs hauden väl Trubbel. Mieeschtens, wiels de Kjennichs Jehova ojjehuarsom wieren. En Israel wia daut noch oaja aus en Juda, wiels doa von fuaz aun faulsche Jetta aunjebät worden. Jehova schekjt Profeeten, soo aus Elia un Elisa, waut groote Wunda deeden, soogoa Doodje oppwakjen. Oba daut Volkj endad sikj nich. Schlieslich leet Gott too, daut de Assiera daut Nuadkjennichrikj venichten deeden.

Juda bleef noch een bät äwa 100 Joa lenja bestonen, oba wort dan uk von Gott bestroft. Mau een poa Kjennichs en Juda horchten no de Woarnungen von de Profeeten un proowden daut Volkj wada doatoo to brinjen, Jehova to deenen. Josia wia eena von dee. Hee funk aun, de Aufjetta en Juda opptoriemen, un deed dän Tempel fa Jehova wada oppfreschen. Bie dise Oabeit kjeem met eemol daut Buak met Jehova siene Jesazen verendach, waut Moses oppjeschräwen haud. Daut bewäajd Josia soo sea, daut hee noch dolla jäajen dän Jettadeenst schauft.

De Kjennichs no Josia wieren oba nich soo aus hee. Doawäajen leet Jehova too, daut de Babielonia Juda enneemen un Jerusalem un dän Tempel venichten deeden. Dee, waut äwaläwden, worden aus Jefangne met no Babielon jenomen. Gott säd verut, daut de Jefangenschoft 70 Joa dieren wudd. Aul dise Joaren bleef Juda onbewont, bat de Israeliten schlieslich wada kunnen trigjgonen.

Oba von David siene Nokomen wudd kjeena mea rejieren, bat de vesproakna Rada, ooda Messias wudd Kjennich woaren. Aun de mieeschte Kjennichs, waut no David en Jerusalem rejieeden, wia kloa to seenen, daut onvolkomne Menschen nich fäich sent to rejieren. Bloos de Messias wudd doatoo em Staund sennen. Jehova säd to dän latsten Kjennich von David siene Nokomenschoft: “Sat diene Kroon tosied . . . bat deejanja kjemt, wäm daut met rajcht jehieet. Däm woa ekj daut jäwen” (Hesekiel 21:31-32).

Stett sikj opp de Bibelbieekja 1. Kjennichs, 2. Kjennichs un opp 2. Chronik, Kapitels 10 bat 36 un Jeremia 25:8-11.