Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 3

De groote Äwaschwamunk

De groote Äwaschwamunk

Gott venicht eene beese Welt, oba helt Noah un siene Famielje aum läwen.

MET de Tiet jeef daut emma mea Menschen oppe Ieed, un wäajens de Sind worden dee emma schlajchta. Henoch, een eenselna Profeet, woarnd de Menschen, daut Gott de Beese eenen Dach venichten wudd. Oba enne Städ bäta wort daut bloos oaja. Daut jeef uk Enjel, waut sikj jäajen Gott stalden. Dee veleeten äaren Plauz em Himmel un deeden sikj oppe Ieed to Menschen vewaundlen. Dee jinjen äare Fleescheslost no un neemen sikj bejierich Frues. Daut wia oba gaunz jäajen de Natua. Doawäajen wieren de Kjinja von dise nich soo aus jeweenlich. Daut worden jewaultje Riesen, waut sea stoakj un bees wieren. Dee worden Nefiliten jenant. Derch dee neem de Merdarie un daut beese ieescht mol soo rajcht äwahaunt. Gott feeld sikj sea schlajcht doaräwa, daut aules oppe Ieed soo vedorwen wia.

Eenje Tiet no Henoch läwd Noah. Hee un siene Famielje wieren aundasch aus de aundre Menschen, wiels see emma proowden daut to doonen, waut Gott jefoll. Aus Gott sikj eenich wort, de beese Menschen to venichten, wull hee oba Noah met siene Famielje uk de veschiedne Sorten Tieren raden. Gott wull eene groote Äwaschwamunk äwa de Ieed brinjen. Doawäajen säd hee to Noah, hee sull eene Arche buen, daut wia een groota Kausten. Doa bennen wudden see met de Tieren toop äwaläwen. Noah deed soo, aus Gott am jesajcht haud. En de 40 ooda 50 Joa, aus Noah deed dän Kausten buen, deed hee de Menschen uk fa de Äwaschwamunk woarnen. De Bibel sajcht, hee wia eena, dee “Jerajchtichkjeit prädijd” (2. Petrus 2:5). Oba de Menschen jleewden am nich. Schlieslich wia daut soo wiet, daut Noah toop met siene Famielje un de Tieren en dän Kausten nenjinkj. Dan schloot Gott de Däa too un daut funk aun to räajnen.

Daut räajend 40 Doag, Dach un Nacht, bat aules unja Wota wia. De Beese wieren aula wajch. Moonaten lota, aus daut Wota wada aufjetrocken wia, sad de Kausten sikj opp eenen Boajch. Met de Tiet kunn Noah met siene Famielje un de Tieren dän Kausten veloten. See wieren doa een Joa bennen jewast. Noah wia sea dankboa un hee brocht Jehova een Opfa. Jehova vespruak Noah un siene Famielje dan, hee wudd kjeenmol mea aulet Läwen oppe Ieed met eene Äwaschwamunk venichten. Aus Bewies doafäa jeef hee dän Räajenboagen. Dee sull de Menschen emma aun dit Vespräakjen denkjen halpen.

No de Äwaschwamunk jeef Gott de Menschen waut niee Jebooten. Hee jeef de Menschen de Frieheit, Fleesch to äten, oba see durwen nich daut Bloot äten. Gott säd uk, de Menschen sullen sikj äwa de gaunze Ieed vedeelen. Oba eenje wullen nich jehorchen. Toom Trotz stunden dee sikj toop un fungen aun, en de Staut Babel, waut lota Babielon wia, eenen huagen Torm to buen. De Väaschta von dee heet Nimrod. Oba Gott vestieed dee äaren Plon un vewerd dee äare Sproak. Un wiels dee sikj unjarenaunda nich mea vestonen kunnen, hieeden dee opp met buen un vestreiden sikj.

Stett sikj opp 1. Mose, Kapitels 6 bat 11 un opp Judas 14-15.