Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 5

Gott säajent Abraham un dän siene Famielje

Gott säajent Abraham un dän siene Famielje

Abraham siene Nokomen woaren emma mea. Gott halpt Josef en Ägipten.

JEHOVA wist, daut deejanja, wäm hee daut mieeschte räakjend, eenen Dach wudd motten lieden un stoawen. Doaropp wees aul de Profezeiunk en 1. Mose 3:15 han. Woo kunn Gott de Menschen oba dietlich moaken, woo väl am daut kosten wudd? Derch eene woare Jeschicht von eenen Voda un dän sienen Sän. De Voda wia Abraham. Gott wull haben, Abraham sull sienen leewen Sän Isaak opfren.

Abraham haud eenen stoakjen Gloowen. Hee wist, daut de Rada, dän Gott verutjesajcht haud, von Isaak aufstaumen sull. Abraham vetrud doaropp, daut Gott Isaak soogoa vom Doot oppwakjen kunn, wan daut sennen sull. Hee jehorcht Gott un wull sienen ieejnen Sän opfren, daut wieetvolste, waut hee haud. Dan schekjt Gott eenen Enjel, dee am noch enne Tiet doavon aufhilt. Gott lowd Abraham doafäa, daut hee soo tru wia, un vesechad am sien Vespräakjen noch eemol.

Isaak haud dan twee Säns, daut wieren Esau un Jakob. Esau acht daut jeistliche nuscht. Jakob oba jo un hee wort doafäa beloont. Gott jeef Jakob dän Nomen Israel. Von dän siene 12 Säns staumd daut Volkj Israel auf. Oba woo wort de Famielje schlieslich to een grootet Volkj?

Daut funk doamet aun, daut de mieeschte von Jakob siene Säns äaren jinjren Brooda Josef aufjenstich worden un dän aus Sklow vekoften. Josef kjeem dan no Ägipten, wua hee väl derchmuak. Oba Gott säajend am, wiels hee een mootja Jung wia un eenen stoakjen Gloowen haud. Schlieslich wort Josef von Farao, dän Kjennich von Ägipten, en een huaget Aumt enjesat. Eenje Tiet lota jeef daut eene Hungaschnoot un Jakob schekjt siene Junges no Ägipten Ätwoa kjeepen. Un wäa wia de Beaumta, waut fa de gaunze Noarunk en Ägipten veauntwuatlich wia? Josef! Siene Breeda wieren sea vebleft, aus dee daut enworden. An wia daut sea leet, waut see dän aunjedonen hauden, oba Josef hilt an daut togood. Un hee sorjd doafäa, daut de gaunze Famielje no Ägipten kjeem. See kjrieejen doa feinet Launt jejäft, wua an daut goot jinkj, un see worden emma mea. Nu kunn Josef vestonen, daut Gott daut aules soo jelenkjt haud, om daut to erfellen, waut hee vesproaken haud.

En Ägipten wort Jakob siene Famielje emma jrata. Ver sienen Doot säd hee verut, daut de vesproakna Rada een majchtja Harscha sennen wudd un daut dee wudd von sienen Sän Juda aufstaumen. Joaren lota säd Josef ea hee storf verut, daut Gott Jakob siene Famielje eenen Dach wudd ut Ägipten rutleiden.

Stett sikj opp 1. Mose, Kapitels 20 bat 50 un opp Hebräa 11:17-22.