Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 16

De Messias kjemt

De Messias kjemt

Jehova moakt kloa, daut Jesus von Nazaret de Messias es, dee aul soo lang es verutjesajcht worden.

WOO wudden de Menschen weeten, wäa de Messias wia? Jehova wudd daut to weeten doonen. Well wie mol seenen, woo. Bie 400 Joa wieren aul vegonen von don, aus de Hebräische Schreften wieren foadich jeschräwen worden. En Nazaret, eene Staut em Nuaden von Galiläa, wond eene junge Mejal, waut Maria heet. Eenen Dach kjrieech Maria eenen besondren Besuch. Daut wia de Enjel Gabriel. Dee säd to Maria, see wudd eenen Sän kjrieen. Maria haud oba noch kjeenen Maun. Woo sull daut dan sennen? De Enjel säd, Gott wudd daut derch sienen heiljen Jeist bewirkjen, daut meent, derch siene wirkjende Krauft. Daut Kjint wudd Gott sien Sän sennen, dee bat doahan em Himmel jewast wia. Gott wudd dän sien Läwen en Maria äa Muttalief äwadroagen. Daut wudd de Kjennich woaren, dee fa emma rejieren wudd, von dän aul soo lang wia de Räd jewast.

Maria neem dit besondre Väarajcht deemootich aun. See wia eenen Jung vesproaken, waut Josef heet un een Descha wia. Josef befried sikj oba ieescht mau dan met Maria, aus Gott am derch eenen Enjel jesajcht haud, wuarom dee schwanga wia. Oba sull de Messias nich en Betlehem jebuaren woaren? (Micha 5:1). Dise kjliene Staut wia bie 140 Kilomeeta auf von Nazaret!

Een reemischa Harscha befool, daut gaunze Volkj to talen. Doawäajen must jiedra eena sikj gonen doa enschriewen loten, wua hee jebuaren wia. Josef un Maria wieren beid von Betlehem un soo reisden see doa han (Lukas 2:3). En Betlehem, en eenen Staul, brocht Maria dan äa Bäbe to Welt un läd daut en eene Kjrebb nenn. Nich wiet auf von doa wieren Schophoads oppe Stap. Gott schekjt eene Schoa Enjel, dee an säden, daut de Messias, ooda Christus jroz jebuaren wia.

Lota wudden uk noch aundre doaropp hanwiesen, daut Jesus de Messias wia. De Profeet Jesaja haud verutjesajcht, daut doa eena komen wudd, waut dän Wajch fa dän Messias sienen Deenst reedmoaken wudd (Jesaja 40:3). Daut wia Johanes de Deepa. Aus Johanes Jesus sach, säd hee: “Kjikjt, daut es Gott sien Laum, daut de Welt äare Sinden wajchnemt!” Eenje von Johanes siene Jinja deeden Jesus fuaz nofoljen. Eena von dee säd: “Wie haben dän Messias jefungen” (Johanes 1:29, 36, 41).

Oba daut jeef noch mea Bewies. Aus Johanes Jesus deepen deed, bestemd Jehova Jesus derch dän heiljen Jeist toom Messias. Gott säd dan selfst vom Himmel ut: “Dit es mien leewa Sän, met däm ekj sea tofräd sie” (Matäus 3:16-17). De vesproakna Messias wia nu entlich jekomen!

Wanea passieed dit? Daut wia en daut Joa 29, krakjt aum Enj von de 483 Joa, waut Daniel verutjesajcht haud. Uk dit wiest, daut Jesus werkjlich de vesproakna Messias es. Oba, waut wudd Jesus de Menschen lieren?

Stett sikj opp Matäus, Kapitels 1 bat 3, Markus, Kapitel 1, Lukas, Kapitel 2 un Johanes, Kapitel 1.

Noch mea doaräwa

EENE GOODE NORECHT VON GOTT

Wäa es Jesus Christus?

Läs die hia no, wuarom Jesus stoawen must, waut daut Leesjelt es un waut Jesus vondoag deit.