Trigj nom Enhault

No de Enhaultslist gonen

 KAPITEL 4

Gott sien Bunt met Abraham

Gott sien Bunt met Abraham

Abraham haft eenen stoakjen Gloowen un jehorcht Gott. Gott vesprakjt, hee woat am säajnen un väle Nokomen jäwen.

ABRAHAM läwd ojjefäa 350 Joa no de groote Äwaschwamunk. Hee läwd en de rikje Staut Ur en de Jäajent, wua vondoag Irak es. Abraham wia een Maun, dee eenen besonda stoakjen Gloowen haud. Sien Gloowen wort oba oppe Proow jestalt.

Jehova säd to Abraham, hee sull sien Tus veloten un sull no een framdet Launt trakjen. Abraham jehorcht onen to twiewlen. Hee muak sikj met siene Fru Sara, met sienen Brooda sienen Sän Loot un met aul siene Deena toop oppem Wajch. No eene lange Reis kjeemen see schlieslich no daut Launt Kanaan. Doa wonden see dan en Zelten un trocken von eene Städ no de aundre. Jehova muak dan eenen Bunt met Abraham. Hee vespruak am, hee wudd am to een grootet Volkj moaken un aule Famieljes oppe Ieed wudden derch am jesäajent woaren. Gott vespruak Abraham uk, daut daut Launt Kanaan eenen Dach wudd siene Nokomen jehieren.

Abraham un Loot buaden sikj nopp un hauden met de Tiet groote Häaden Schop un Vee. Abraham leet Loot dan utsieekjen, wua hee hantrakjen wull. Loot wäld sikj de fruchtboare Jäajent vom Jordan Riefa, waut dicht bie de Staut Sodom wia, un siedeld doa aun. De Menschen von Sodom fieeden oba een sea schwienschet Läwen un bejinjen schwoare Sinden jäajen Jehova.

Jehova vesechad Abraham noch eemol, daut siene Nokomen wudden soo väl woaren aus de Stierns aum Himmel. Abraham jleewd aun dit Vespräakjen. Siene leewe Fru Sara haud oba emma noch kjeene Kjinja. Aus Abraham aul 99 Joa wia un Sara meist 90, säd Gott to am, see wudden eenen Sän haben. Un krakjt soo aus Gott jesajcht haud, haud Sara dan werkjlich een Kjint, daut wia Isaak. Abraham haud noch aundre Kjinja, oba von Isaak wudd de Rada aufstaumen, dän Gott em Goaden Eden verutjesajcht haud.

Entweschen wond Loot met siene Famielje en de Staut Sodom. Loot wia oba een gooda Maun un hee wort nich soo aus de schaundhaufte Menschen von doa. Aus Jehova beschloot, Sodom to venichten, schekjt hee Enjel, dee Loot woarnen sullen. De Enjel porden Loot un siene Famielje sea no, Sodom fuaz to veloten. See sullen sikj uk nich omkjikjen. Dan leet Gott Fia un Schwäwelblitt opp Sodom un opp de schlajchte Nobastaut Gomorra räajnen un venicht aul de Bewona. Loot un siene twee Dajchta kjeemen doavon. Oba Loot siene Fru kjikjt sikj om, veleicht wiels ar daut schod wia om daut, waut see haud must trigjloten. Un daut kost ar daut Läwen.

Stett sikj opp 1. Mose 11:10 bat 19:38.