Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 24

Paulus siene Breew

Paulus siene Breew

Paulus siene Breew bestoakjen de Christenvesaumlunk.

DE NIEE Christenvesaumlunk wudd väl doatoo doonen, daut Jehova sien Väanämen sikj erfellen wudd. Doch daut dieed nich lang, bat de ieeschte Christen von aule Kaunten Wadastaunt kjrieejen. Wudden dee Gott volstendich tru bliewen, uk wan dee vefolcht worden ooda wan daut soogoa en äare Medd groote Trubbels jäwen wudd? En de Christliche Griechische Schreften finj wie 21 Breew, waut de Christen Rot un Moot jeewen.

Vieetieen von dise Breew worden von dän Apostel Paulus jeschräwen; von Reema bat Hebräa. Dee worden no de Nomes benant, wua dee hanjeschekjt worden, entwäda aun eenselne Persoonen ooda aun Christenvesaumlungen. Well wie mol seenen, von waut Paulus soo schreef.

Aunstendjet un goodet Vehoolen. Dee, waut Huararie driewen, de Ehe bräakjen un aundre schwoare Sinden begonen, woaren en “Gott sien Rikj nich nenkomen” (Galata 5:19-21; 1. Korinta 6:9-11). Gott siene Deena motten veeent sennen, krakjt endoont von waut fa een Volkj dee sent (Reema 2:11; Efeesa 4:1-6). Dee sellen uk wellich fa aundre waut äwrich haben un äare Breeda uthalpen (2. Korinta 9:7). Paulus säd uk: “Hoolt aun met bäden.” Christen woat toojerot, sikj em Jebäd ver Jehova uttoschedden (1. Tessalonicha 5:17; 2. Tessalonicha 3:1; Filippa 4:6-7). Om daut Gott de Jebäda hieet, mott Gloowen doahinja sennen (Hebräa 11:6).

Waut fa eenen Rot jeef Paulus fa Famieljes? Mana sellen äare Frues soo leewen aus sikj selfst. Frues sellen äare Mana opp iernst achten. Von Kjinja well Gott haben, dee sellen äare Elren jehorchen. De Elren sellen äare Kjinja met Leew opptrakjen un sikj doabie opp Gott siene Gruntsauzen stetten (Efeesa 5:22 bat 6:4; Kolossa 3:18-21).

Waut Gott derch Christus bewirkjt. Välet von Moses sien Jesaz wia fa de Israeliten een Schutz un wees dee dän Wajch, bat Christus kjeem (Galata 3:24). Christen sent oba nich mea unja dit Jesaz. De Hebräachristen, waut von de Juden wieren, erkjläad Paulus, wuatoo Gott daut Jesaz jejäft haud un woo Gott derch Christus aules erfeld, waut hee vesproaken haud. Paulus schreef, daut välet von daut Jesaz bloos  een Väabilt wia. Biejlikj de Tierenopfa wieren een Väabilt fa daut Opfa, waut Jesus derch sienen Doot brocht. Bloos derch dit Opfa kjennen opp iernst de Sinden vejäft woaren (Hebräa 10:1-4). Aus Jesus storf, hoof Gott dän Bunt von daut Jesaz opp, wiels daut Jesaz nich mea needich wia (Kolossa 2:13-17; Hebräa 8:13).

Goode Ordnunk enne Christenvesaumlunk. Mana, waut reed sent, enne Vesaumlunk Veauntwuatunk to äwanämen, motten een aunstendjet Läwen fieren un jewesse Bedinjungen ut de Bibel erfellen (1. Timotäus 3:1-10, 12-13; Titus 1:5-9). Jehova siene Deena sellen sikj räajelmässich met aundre Christen vesaumlen toom sikj unjarenaunda oppmuntren (Hebräa 10:24-25). Dise Toopkomes, wua Gott aunjebät woat, sellen Moot jäwen un uk eene Belia sennen (1. Korinta 14:26, 31).

Aus Paulus sienen tweeden Breef aun Timotäus schreef, wia hee en Room jefangen un must sien Jerecht aufwachten. Mau weinich Breeda wuagen sikj daut, dän to besieekjen. Paulus wist, daut hee boolt wudd motten stoawen. “Ekj hab dän gooden Kaumf jekjamft”, säd hee. “Ekj hab bat aum Enj utjehoolen, ekj hab Gloowen jehoolen” (2. Timotäus 4:7). Woomäajlich wort Paulus boolt nodäm wäajen sienen Gloowen dootjemoakt. Oba siene Breew sent bat vondoag eene goode Help fa woare Christen.

Stett sikj opp de Bibelbieekja Reema, 1. Korinta, 2. Korinta, Galata, Efeesa, Filippa, Kolossa, 1. Tessalonicha, 2. Tessalonicha, 1. Timotäus, 2. Timotäus, Titus, Filemon un Hebräa.