Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 12

Gooda Rot fa daut Läwen

Gooda Rot fa daut Läwen

En daut Buak Spricha finj wie väl weisen Rot von Gott fa daut gaunze Läwen. Daut mieeschte wort von Salomo oppjeschräwen.

ES Jehova een weisa Harscha? Wie derwen bloos dän Rot betrachten, waut hee ons jeft, dan hab wie de Auntwuat. Es sien Rot goot? Jeit ons daut Läwen bäta un haft daut mea Senn, wan wie doano horchen? Kjennich Salomo schreef hundade Spricha opp, wua wie schia fa daut gaunze Läwen gooden Rot finjen. Well wie mol eenje doavon seenen.

Opp Gott vetruen. Een goodet Veheltnis met Gott stett sikj opp Vetruen. Salomo schreef: “Velot die opp däm HARN met dien gaunzet Hoat, un velot die nich opp dien ieejnet Vestaunt. Denkj aun am en aules waut du deist, un hee woat die dän rajchten Wajch wiesen” (Spricha 3:5-6). Opp Gott vetruen bediet, am to jehorchen un ons von am leiden to loten. Ieescht mol dan haft ons Läwen werkjlich eenen Senn. Wan wie daut doonen, kjenn wie Gott sien Hoat froo moaken, un Gott kaun doaderch bewiesen, daut Soton een Läajna es (Spricha 27:11).

Daut Vehoolen to aundre. Gott sien Rot fa Mana, Frues un Kjinja es vondoag krakjt soo paussent aus don. Fa dän Maun jeft Gott dän Rot: “Hab aul diene Freid met dee, dee du die en diene Jugent frieen deetst” (Spricha 5:18-20). Gott well aulsoo, daut Mana äare Frues tru bliewen sellen. Fa Frumenschen jeft daut Rot, woo see kjennen goode Ehefrues sennen, daut see von äare Mana un äare Kjinja jeschazt woaren (Spricha, Kapitel 31). Kjinja woat toojerot, see sellen äare Elren jehorchen (Spricha 6:20). Daut Buak Spricha wiest uk, woo goot daut es, Frind to haben, wiels wäa sikj oppoat helt, denkjt schlieslich bloos noch aun sikj selfst (Spricha 18:1). Frind kjennen ons toom gooden oba uk toom schlajchten metrieten. Doawäajen sell wie goot äwalajen, wäm wie toom Frint haben (Spricha 13:20; 17:17).

No sikj selfst oppaussen. En daut Bibelbuak Spricha woat ons toojerot, goot jesonnen to sennen un jäajen eenen schlajchten Senn to oabeiden. Wie sellen ons nich bedrinkjen un sellen uk flietich sennen (Spricha 6:6; 14:30; 20:1). De Spricha beschriewen uk, woo schlajcht daut utkjemt, wan wie ons bloos no daut rechten, waut wie fa goot aunseenen, enne Städ no Gott horchen (Spricha 14:12). Ons woat uk toojerot, ons Hoat fa schlajchte Dinja to schitzen, ‘wiels daut [Hoat] es wuaderch ons Läwen kjemt’ (Spricha 4:23).

Millionende Menschen äwa de gaunze Welt haben utjefungen, daut eena een bätret Läwen fieren kaun, wan eena no Gott sienen Rot horchen deit. Gott es werkjlich een weisa Harscha un daut jeft Grunt jenuach, am to jehorchen.

Stett sikj opp daut Bibelbuak Spricha.