Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 7

Gott moakt de Israeliten frie

Gott moakt de Israeliten frie

Jehova brinjt Ploagen opp Ägipten. Moses leit de Israeliten ut Ägipten rut. Gott jeft de Israeliten derch Moses de Jesazen.

DE Israeliten hauden daut väle Joaren goot jehaut en Ägipten un wieren een grootet Volkj jeworden. Dan wort een aundra Farao de Kjennich, dee Josef nich kjand. Dis grausoma un beesa Harscha haud Angst, de Israeliten wudden de Äwamacht kjrieen, un muak dee to Sklowen. Dee befool soogoa, aule kjliene Junkjes, waut to Welt kjeemen, em Niel Riefa to schmieten. Oba eene äwanämende Mutta wull äaren kjlienen Sän beschitzen. See deed dän en eenen Korf nenn un sad dän mank daut Wotagraus aune Kaunt Niel Riefa. Doa funk am Farao siene Dochta. See neem sikj daut Kjint aun un nand daut Moses. Un Moses wort en de Kjennichsfamielje oppjetrocken.

Aus Moses 40 Joa oolt wia, kjeem hee em Trubbel, wiels hee eenen israelitischen Sklow to Help kjeem, dee von eenen ägiptischen Oppsechta vekjielt wort. Doahinja must Moses flichten un kjeem no een framdet Launt. Aus Moses 80 Joa oolt wia, schekjt Jehova am trigj no Ägipten. Hee sull von Farao velangen, Gott sien Volkj frietoloten.

Oba Farao säd daut kort auf. Doawäajen schluach Gott Ägipten met tieen Ploagen. Jiedatsmol kjrieech Farao oba de Jeläajenheit, de näakjste Ploag väatobieejen. Doch Farao veacht Moses uk dän sienen Gott Jehova un jeef nich bie. Schlieslich, bie de latste Ploag, schekjt Jehova eenen Enjel, dee aule Ieeschtjebuarne en Ägipten dootmuak. Bloos dee Famieljes, waut Jehova jehorchten un daut Bloot von een junget Schop aun äare Däarenjerechta schmäaden, worden veschoont. Von doa aun hilden de Israeliten jieda Joa daut Passafast, om aun dit to denkjen.

Aus Farao sach, daut sien ieeschtjebuarna Sän doot wia, befool hee, Moses un aul de Israeliten sullen Ägipten veloten. De gaunze Schoa muak sikj fuaz opp. Oba dan endad Farao sienen Senn wada un juach de Israeliten met väle Kjrichsmana un Woages hinjaraun. De Israeliten wieren ver daut Roode Mäa un daut leet soo, aus hauden see kjeenen Utwajch. Oba Jehova deeld daut Mäa un de Israeliten kunnen oppem drieejen Boddem doa derchgonen. Aun beid Sieden stunt daut Wota aus huage Wenj. Aus de Ägipta de Israeliten hinjaraun juagen, leet Gott daut Mäa wada toogonen. Farao un sien gaunzet Häa vedrunken.

Lota loagaden de Israeliten aum Sinai Boajch, wua Jehova eenen Bunt muak met an. Moses wia de Vemedla tweschen Jehova un de Israeliten. Jehova jeef an derch Moses Jesazen, waut an aus Schutz deenden un an weesen, woo see läwen sullen. Soo lang aus de Israeliten Jehova aus äaren Harscha jehorchten, wudd hee met an sennen un aundre Velkja wudden derch an jesäajent woaren.

De mieeschte Israeliten weesen oba, daut see Jehova nich vetruden. Doawäajen leet hee an aus Strof 40 Joa lank enne Wiltnis romwaundren. Dan storf Moses. Josua, een opprechtja Maun, wort de näakjsta Leida. Schlieslich wieren de Israeliten soo wiet, en daut Launt nentogonen, waut Gott Abraham vesproaken haud.

Stett sikj opp de Bibelbieekja 2. Mose bat 5. Mose un opp Psalm 136:10-15 un Aposteljeschicht 7:17-36.