Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

De Bibel: Om waut jeit daut doa bennen?

 KAPITEL 19

Jesus sajcht waut besondret verut

Jesus sajcht waut besondret verut

Jesus sajcht verut, aun waut daut woat to seenen sennen, wan hee aus Kjennich rejieet un wan dise Welt to Enj komen woat.

JESUS wia met vea von siene Apostel toop opp dän Oliewenboajch. Von doa bowen kunnen see Jerusalem un dän Tempel fein seenen. Jesus haud jroz ver een Stootje jesajcht, daut de Tempel wudd venicht woaren. Un eemol ea haud Jesus doavon jerät, daut ‘dise Tiet to Enj komen’ wudd (Matäus 13:40, 49). Nu wullen dise vea Apostel mea doaräwa weeten un säden: “Saj ons . . . aun waut fa een Tieekjen wie seenen kjennen, daut du kjemst, un daut dise Tiet aufschluten woat” (Matäus 24:3).

Jesus säd dan verut, waut doa passieren wudd, jroz ea Jerusalem wudd venicht woaren. Oba waut Jesus hia verutsäd, wudd sikj lota noch em grooten äwa de gaunze Welt erfellen. Soo aus Jesus säd, wudd daut veschiedne Dinja jäwen, waut aula en deeselwje Tiet passieren wudden. Un daut wudd daut Tieekjen sennen, daut Jesus jekomen wia. Daut meent, daut Jehova am em Himmel toom Kjennich jemoakt haud. Von doa aun wudd dän Messias siene Harschoft aunfangen, waut aul soo lang wia worden verutjesajcht. Dit Tieekjen wudd uk wiesen, daut dise Tiet aufschluten wudd. Daut wudden aulsoo de latste Doag sennen von dise Welt met aul de veschiedne Relijionen, de Rejierungen un daut gaunze, woo de Menschen läwen. Daut Kjennichrikj wudd met daut beese oppe Ieed een Enj moaken un doahinja wudd daut eene niee frädelje Welt jäwen.

Jesus erkjläad dan, waut daut Tieekjen sennen wudd, wan hee em Himmel wudd aus Kjennich rejieren. Hee säd, daut wudd väl Kjrich, Hungaschnoot, groote Ieedbäben un schlemme Krankheiten jäwen. De Menschen wudden emma gottloosa woaren. Un de goode Bootschoft von Gott sien Kjennichrikj, säd Jesus, wudd von siene woare Nofolja äwa de gaunze Welt jeprädicht woaren. Tolatst wudd daut “een Älent”, ooda eene groote Triebsaul jäwen, soone, aus daut noch kjeenmol ea jejäft haud (Matäus 24:21).

Aun waut wudden Jesus siene Nofolja seenen kjennen, daut de groote Triebsaul dicht bie wia? Jesus säd: “Lieet dit vom Fiejenboom” (Matäus 24:32). Wan de Fiejenboom utlat, weet eena, daut de Somma dicht bie es. Krakjt soo wudd daut uk to seenen sennen, daut daut Enj dicht bie wia, wan aul daut, waut Jesus verut jesajcht haud, en deeselwje Tiet passieren wudd. Oba krakjt waut fa eenen Dach ooda waut fa eene Stund de groote Triebsaul komen wudd, säd Jesus, wist bloos de Voda. “Jie weeten nich wanea dee Tiet komen woat”, säd Jesus to siene Jinja. Doawäajen sullen see waka sennen (Markus 13:33).

Stett sikj opp Matäus, Kapitels 24 un 25, Markus, Kapitel 13 un Lukas, Kapitel 21.

^ Varsch 14 En daut Buak Waut lieet de Schreft werkjlich? von Jehova siene Zeijen kaust du en daut 9. Kapitel noch mea von Jesus siene Profezeiunk läsen.