Bai na kontenido

Kiko Testigunan di Yehova Ta Pensa Tokante Entiero?

Kiko Testigunan di Yehova Ta Pensa Tokante Entiero?

Nos ta basa nos punto di bista di entiero i kustumbernan relashoná ku esei riba loke Beibel ta siña. Por ehèmpel:

  • Ta normal pa ta tristu ora un hende ku bo ta stima muri. E disipelnan di Hesus a yora morto di nan sernan kerí. (Huan 11:33-35, 38; Echonan 8:2; 9:39) Pues, nos no ta mira entiero komo un fiesta. (Eklesiástes 3:1, 4; 7:1-4) Mas bien, nos ta mir’é komo un oportunidat pa mustra komprenshon na otro hende.​—Romanonan 12:15.

  • E mortonan no sa nada. Sin importá nos background étniko òf kultural, nos ta evitá tur kustumber òf práktika ku ta basá riba e idea no bíbliko ku e mortonan ta konsiente i ku nan por tin influensia riba nos bida. (Eklesiástes 9:5, 6, 10) Esaki ta inkluí kustumbernan manera hasi ofrenda na morto, papia ku nan òf pidi nan fabor, tene fiestanan grandi despues di entiero òf pa aniversario di e morto òf partisipashon den rito di biuda. Beibel ta bisa pa ‘separá nos mes i stòp di mishi ku loke ta impuru,’ i nos ta obedesé e mandamentu ei ora nos ta keda leu di tur e kustumber- i práktikanan ei.—2 Korintionan 6:17.

  • E mortonan por bolbe biba. Beibel ta bisa ku ta bai tin un resurekshon i ku e dia lo yega ku lo no tin morto mas. (Echonan 24:15; Revelashon 21:4) E speransa akí ta yuda nos, meskos ku el a yuda e promé kristiannan, pa nos no partisipá den kustumbernan ekstremo di tenementu di luto.​—1 Tesalonisensenan 4:13.

  • Beibel ta animá nos pa ta modesto. (Proverbionan 11:2) Nos no ta mira entiero komo un oportunidat pa impreshoná hende ku nos posishon sosial òf estado finansiero. (1 Huan 2:16) Pues, nos no ta tene entiero grandi pa entretené hende ni pone kaha di morto demasiado karu òf bisti paña ekstrabagante pa impreshoná hende.

  • Nos no ta purba di imponé nos punto di bista di entiero riba otro hende. En bes di esei, nos ta sigui e siguiente prinsipio: “Kada un di nos lo duna kuenta i rason na Dios pa nos akshonnan.” (Romanonan 14:12) Klaru, si e oportunidat presentá pa splika nos kreensianan, nos lo hasi esei “na un manera suave i ku rèspèt profundo.”—1 Pedro 3:15.

Kon entiero di un Testigu di Yehova ta?

Lugá: Si e famia disidí di hasi un entiero, nan mes por skohe e lugá. E por ta na un Salòn di Reino, na un funerario, na un krematorio, na un santana òf na kas.

Programa: Pa konsolá famia i amigunan di e defuntu, un diskurso ta ser duná ku ta splika loke Beibel ta bisa tokante morto i e speransa di resurekshon. (Huan 11:25; Romanonan 5:12; 2 Pedro 3:13) Durante e diskurso, e oradó por konta tokante e bon kualidatnan di e hende ku a fayesé i kisas resaltá loke nos por siña for di su ehèmpel di fieldat.—2 Samuel 1:17-27.

Hopi biaha ta kanta un kantika basá riba Beibel. (Kolosensenan 3:16) I e programa ta kaba ku un orashon ku lo konsolá esnan presente.​—Filipensenan 4:6, 7.

Tarifa i pasamentu di kolèkt: Nos no ta kobra pa entiero ni pa niun otro sirbishi religioso. Na nos reunionnan tampoko nos no ta pasa kolèkt.​—Mateo 10:8.

Asistensia: Tur hende por asistí na un entiero na Salòn di Reino. Meskos ku nos reunionnan, nan ta habrí pa públiko.

Testigunan di Yehova ta bai entiero kaminda otro religion ta dirigí e programa?

Esei ta un desishon ku kada Testigu mester tuma a base di su konsenshi entrená pa Beibel. (1 Timoteo 1:19) Sinembargo, nos no ta partisipá den seremonia religioso ku ta bai kontra loke Beibel ta siña.​—2 Korintionan 6:14-17.