1, 2. (a) Kiko algun lider religioso kier a sa, i kiko Pedro a kontestá nan? (Wak e promé plachi.) (b) Kon bini Pedro por a papia ku asina tantu kurashi?

ALGUN siman despues ku Hesus a muri, apòstel Pedro a enfrentá un grupo di lider religioso poderoso. Nan tabata e mesun grupo di lider hudiu ku a traha kòmplòt pa mata Hesus. Awor nan tabata rabiá ku Pedro i a eksigí un splikashon di dje pasobra el a kura un hòmber ku a nase lam. Nan kier a sa ta ku ki outoridat òf den nòmber di ken Pedro a hasi esaki. Ku kurashi e apòstel a kontestá: “Ta den nòmber di Hesukristu, e nazareno, esun ku boso a klaba na staka, ma ku Dios a lanta for di morto, sí, ta pa medio di dje e hòmber akí ta pará bon di salú boso dilanti.”—Echo. 4:5-10.

² Mas promé, Pedro tabatin asina tantu miedu ku el a nenga Hesus tres biaha. (Mar. 14:66-72) Kon bini awor e tabatin asina tantu kurashi dilanti di e lidernan religioso? Spiritu santu sin duda a hunga un papel importante den esei, pero tambe Pedro tabatin sigur ku Hesus a ser resusitá. Dikon Pedro tabata asina sigur ku Hesus ta na bida? I dikon nos tambe por tin e mesun konfiansa ei?

3, 4. (a) Menshoná e resurekshonnan ku a tuma lugá promé ku e apòstelnan di Hesus a nase. (b) Ken Hesus a resusitá?

 ³ Pa e apòstelnan di Hesus, e idea di ku mortonan por biba atrobe no tabata algu nobo; resurekshon a yega di tuma lugá promé ku nan a nase. Nan tabata sa ku Dios a duna e profetanan Elías ku Eliseo e outoridat pa hasi e milager ei. (1 Rei. 17:17-24; 2 Rei. 4:32-37) Tabatin asta e kaso di un hòmber morto ku a biba bèk ora ku nan a benta su kurpa den un graf i su kurpa a mishi ku e wesunan di Eliseo. (2 Rei. 13:20, 21) Meskos ku nos ta kere ku e Palabra di Dios ta bèrdat, asina e promé kristiannan a kere e relatonan bíbliko akí.

⁴ Muy probablemente, e relatonan di e resurekshonnan ku Hesus a hasi ta konmové nos mashá ora nos ta lesa nan. Por ehèmpel, nos por imaginá kon babuká e biuda a keda ora Hesus a resusitá su úniko yu. (Luk. 7:11-15) Na un otro okashon, Hesus a resusitá un mucha muhé di 12 aña. Nos por imaginá kon e tristesa profundo di e mayornan a kambia den alegria i asombro ora ku Hesus a lanta nan yu muhé for di morto! (Luk. 8:49-56) Anto imaginá kon emoshoná e mirónesnan lo mester tabata ora nan a mira Lázaro kana sali for di e graf sano i salvo!—Huan 11:38-44.

5. Den ki manera e resurekshon di Hesus tabata otro for di esnan promé kuné?

⁵ E apòstelnan tabata sa ku e resurekshon di Hesus tabata otro for di tur e resurekshonnan promé kuné. E hendenan ku a resusitá anteriormente a lanta bèk ku kurpa físiko i ku tempu a bolbe muri. Pero Dios a resusitá Hesus ku un kurpa spiritual ku nunka por kaba na nada. (Lesa Echonan 13:34.) Pedro a skirbi ku Hesus “a ser matá den karni, ma a haña bida bèk den spiritu.” Es mas, “el a bai shelu i awor e ta na man drechi di Dios, kende a someté angel, outoridat i poder na dje.” (1 Ped. 3:18-22) E resurekshonnan anterior tabata ekstraordinario, pero e resurekshon di Hesus tabata e milager di mas grandi den historia.

6. Ki efekto e resurekshon di Hesus tabatin riba su disipelnan?

⁶ E resurekshon di Hesus tabatin un impakto profundo riba su disipelnan. E no tabata morto mas manera su enemigunan tabata kere. Al kontrario, awor e tabata un spiritu ku niun hende lo no por a hasi daño. Ademas, su resurekshon a konfirmá ku e tabata e Yu di Dios, i unabes e disipelnan tabata sa esaki, nan tristesa profundo a kambia den gran alegria. Awor, en bes di miedu nan a haña kurashi. Nan por a proklamá e bon notisia ku konvikshon ya ku Hesus tabata bibu i e propósito di Yehova lo a kumpli sin falta!

7. Kiko Hesus ta hasiendo awe, i ki preguntanan ta lanta?

⁷ Komo sirbidónan di Yehova, nos sa ku Hesus no tabata djis un bon hende ku a hasi kos grandi. E ta bibu awe i ta dirigí e trabou di prediká ku ta tumando lugá rònt mundu. Komo e Rei di e Reino selestial di Dios, Hesukristu pronto lo eliminá tur maldat for di riba tera i transformá nos planeta den un paradeis kaminda hende lo biba pa semper. (Luk. 23:43) Nada di esaki lo por a sosodé si Hesus no a ser resusitá. Pues, dikon nos por ta sigur ku el a ser lantá for di morto? Bon mirá, kiko su resurekshon ta nifiká pa nos?

8, 9. (a) Dikon e lidernan religioso hudiu a pidi pa vigilá e graf di Hesus? (b) Kiko a sosodé ora e muhénan a bai na e graf?

⁸ Despues ku Hesus a ser ehekutá, e saserdotenan prinsipal i e fariseonan a  bai serka Pilato i a bis’é: “Señor, nos ta kòrda ku ora e gañadó ei tabata na bida, el a bisa: ‘Despues di tres dia lo mi lanta for di morto.’ P’esei, duna òrdu pa tuma medida di siguridat na e graf te ku e di tres dia, pa su disipelnan no bin hòrta su kurpa i bisa e pueblo: ‘El a lanta for di morto!’ E último engaño akí lo ta pió ku esun promé.” Pilato a kontestá nan: “Ata un trupa di sòldá pa boso. Bai i vigil’é lo mihó ku boso por.” I esei ta eksaktamente loke nan a hasi.—Mat. 27:62-66.

⁹ Hesus a ser derá den un graf kobá den baranka i a lora un piedra grandi pone na boka di e graf. E lidernan religioso hudiu tabata ke pa Hesus keda pa semper ei den: morto den graf. Pero Yehova tabatin otro kos na mente. Ora Maria Magdalena i e otro Maria a bini na e graf riba e di tres dia, nan a haña e piedra halá un banda i un angel sintá riba dje. E angel a bisa e muhénan pa wak den e graf pa nan mira pa nan mes ku e ta bashí. E angel di: “E no ta akinan, pasobra el a ser lantá for di morto.” (Mat. 28:1-6) Hesus tabata bibu!

10. Ki prueba Pablo a duna ku Hesus a ser resusitá?

¹⁰ Loke a tuma lugá e siguiente 40 dianan a komprobá fuera di tur duda ku Hesus a ser resusitá. Den apòstel Pablo su promé karta na e korintionan, el a duna un resúmen di e evidensia ei. El a skirbi: “Un di e promé kosnan ku mi a pasa pa boso ta loke mi tambe a risibí, esta, ku Kristu a muri pa nos pikánan, segun e Skritura, ku nan a der’é, ku el a ser lantá for di morto riba e di tres dia, segun e Skritura, ku el a aparesé na Sefas i despues na e 12 apòstelnan. Despues di esei el a aparesé na mas ku 500 ruman pareu; algun di nan a bai sosegá, ma mayoria di nan t’ei huntu ku nos ainda. Despues di esei el a aparesé na Santiago, kaba na tur e apòstelnan; ma por último, el a aparesé na mi tambe, manera na un ku a nase promé ku tempu.”—1 Kor. 15:3-8.

11. Den ki sentido e resurekshon di Hesus a tuma lugá “segun e Skritura”?

¹¹ E resurekshon di Hesus a tuma lugá “segun e Skritura.” E Palabra di Dios a profetisá e resurekshon. Por ehèmpel, David a skirbi ku Dios lo no a laga su “fiel sirbidó” keda den Graf. (Lesa Echonan 13:35.) Na ken David a referí? Wèl, riba e dia di Pentekòste di aña 33, apòstel Pedro a apliká e pasashi profétiko ei na Hesus, bisando: “[David] a mira e resurekshon di Kristu di antemano i a papia tokante esei, esta, ku Dios lo no a lag’é keda den Graf i ku su kurpa lo no a putri.”—Echo. 2:23-27, 31.

12. Ken a mira Hesus despues di su resurekshon?

¹² Hopi hende a mira Hesus despues ku el a resusitá. Durante e 40 dianan despues ku Hesus a resusitá, el a aparesé na su disipelnan den e hòfi kaminda su graf tabata, tambe riba kaminda pa Emaus i na otro lugá. (Luk. 24:13-15) Algun biaha el a papia ku personanan individual—un di nan tabata Pedro—i na otro okashon el a papia ku grupo di hende. Un biaha, Hesus a aparesé asta na un grupo di mas ku 500 hende! Klaru ku nos no por pasa por haltu di loke tantu hende asina a mira.

13. Kon e disipelnan a demostrá ku nan tabatin sigur ku Hesus a ser resusitá?

¹³ E disipelnan a prediká tokante e resurekshon di Hesus ku masha konvikshon. Nan a ser persiguí, nan a sufri i  algun a ser matá pa motibu di e testimonio ku nan tabata duna di e resurekshon di Kristu. Pensa un ratu: Pedro a prediká tokante e resurekshon di Kristu na e mesun hendenan ku a odia Hesus i ku a traha kòmplòt pa mat’é. Lo el a riska su bida pa un mentira? Nò. Tantu Pedro komo e otro disipelnan tabatin sigur ku Hesus ta na bida i tabata dirigiendo e trabou di prediká. Es mas, e resurekshon di Hesus a duna su disipelnan e garantia ku nan tambe lo ser resusitá. Pues, Esteban a muri konvensí ku lo bai tin un resurekshon di e mortonan.—Echo. 7:55-60.

14. Kiko ta konvensé bo ku Hesus ta bibu?

¹⁴ Nos tin prueba ku Hesus ta gobernando awor komo Rei i ta Kabes di e kongregashon kristian. Kristianismo berdadero ta sigui floresé. Esaki lo a sosodé si Hesus no tabata bibu? Kisas nunka nos lo no a tende di Hesus si e no a ser resusitá. Pero nos tin prueba konvinsente ku Hesus ta bibu i ta guia i dirigí nos awe segun ku nos ta prediká e bon notisia rònt mundu.

15. Dikon e resurekshon di Hesus ta duna nos kurashi pa prediká?

¹⁵ E resurekshon di Kristu ta duna nos kurashi pa prediká. E último 2.000 añanan, enemigunan di Dios a hasi tur loke ta posibel pa para predikashon di e bon notisia di Reino i e trabou di hasi disipel. Nan a usa tur sorto di arma kontra nos: apostasia, bofon, atakenan violento, prohibishon, tortura i ehekushon. Ma Beibel a profetisá: “Ningun arma ku wòrdu formá kontra bo lo no prosperá.” (Isa. 54:17) Nos no tin miedu di e kompinchinan di Satanas. Hesus ta ku nos i ta apoyá nos, manera el a primintí ku lo e hasi. (Mat. 28:20) Nos no tin nodi di tin miedu, pasobra maske kiko nos enemigunan hasi, nunka nan lo no por silensiá nos!

16, 17. (a) Kon e resurekshon ta konfirmá loke Hesus a siña hende? (b) Segun Huan 11:25, ki poder Dios a duna Hesus?

¹⁶ E resurekshon di Hesus ta konfirmá ku tur loke el a siña hende ta bèrdat. Pablo a skirbi ku si Kristu no a ser lantá for di morto, e fe i predikashon kristian lo no tabatin niun sentido. Un komentarista bíbliko a skirbi: “Si Kristu no a ser lantá, . . . kristiannan ta víktimanan digno di lástima, engañá pa un enorme mentira.” Sin e resurekshon di Hesus, e relatonan di Evangelio ta bira simplemente un historia tristu di un hòmber sabí i di bon kurason ku a ser asesiná pa su enemigunan. Ma echo ta ku Hesus a resusitá. I esei ta konfirmá ku tur loke el a siña hende tabata bèrdat, inkluso loke el a bisa tokante futuro.—Lesa 1 Korintionan 15:14, 15, 20.

¹⁷ Hesus a bisa: “Ami ta e resurekshon i e bida. Esun ku pone fe den mi, maske e muri, lo bolbe biba.” (Huan 11:25) E deklarashon sorprendente ei lo keda realisá sin falta. Yehova a duna Hesus e poder pa resusitá no solamente e hendenan ku lo goberná komo spiritu den shelu sino tambe míles di miónes di hende ku lo lanta ku e speransa di biba pa semper riba tera. E sakrifisio di reskate i resurekshon di Hesus ta un garantia ku morto lo no eksistí mas. Esaki no ta duna bo e fortalesa pa wanta prueba i asta enfrentá morto ku kurashi?

18. E resurekshon di Hesus ta un garantia di kiko?

¹⁸ E resurekshon di Hesus ta duna nos e garantia ku hende lo ser husgá a base di e normanan amoroso di Yehova. Pablo a bisa un grupo di hòmber i muhé den  Aténas di antigwedat ku Dios “ta bai husga henter mundu den hustisia pa medio di un hòmber ku el a nombra. I el a duna tur hende un garantia di esaki ya ku el a lant’é for di morto.” (Echo. 17:31) Sí, Dios a apuntá Hesus komo Hues, i nos por tin sigur ku su huisio lo ta hustu i amoroso.—Lesa Isaías 11:2-4.

19. E echo ku nos ta kere den e resurekshon di Kristu tin ki efekto riba nos?

¹⁹ Nos ke hasi e boluntat di Dios pasobra nos ta kere den e resurekshon di Hesus. Si no ta pasobra Hesus a duna su bida komo sakrifisio i a ser resusitá despues, nos lo no tabatin niun posibilidat di libra for di piká i morto. (Rom. 5:12; 6:23) Si Hesus no a ser resusitá, nos lo no tabatin speransa i por a bien bisa: “Laga nos kome i bebe, pasobra mañan nos ta muri.” (1 Kor. 15:32) Ma nos no ta konsentrá riba e plasernan di bida. Mas bien, nos ta apresiá e speransa di resurekshon i ta semper ansioso pa obedesé Yehova den tur kos.

20. Kon e resurekshon di Hesus ta demostrá e grandesa di Yehova?

²⁰ Kristu su resurekshon ta demostrá e grandesa di Yehova, kende “ta rekompensá esnan ku ta hasi esfuerso pa busk’é.” (Heb. 11:6) Bo a yega di para ketu un ratu i pensa riba e gran poder i sabiduria ku Yehova a usa pa resusitá Hesus komo un spiritu inmortal? E resurekshon di Hesus a demostrá bon kla ku Dios tin e kapasidat di kumpli ku tur loke e primintí. Yehova a profetisá ku lo bini un “simia,” òf desendiente, ku lo a hunga un papel klave den resolvé e kuestion di soberania universal. Pa kumpli ku e profesia ei, Hesus, e “simia,” mester a muri i ser resusitá.—Gén. 3:15.

21. Kiko e speransa di resurekshon ta nifiká pa bo?

²¹ Nos ta masha gradisidu na Yehova pa e speransa di resurekshon! Apòstel Huan a skucha e promesa maravioso akí: “Tende! E tènt di Dios lo ta ku humanidat, i lo e biba huntu ku nan, i nan lo ta su pueblo. I Dios mes lo ta huntu ku nan. I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas. I Esun sintá riba e trono a bisa: . . . ‘Skirbi, pasobra e palabranan akí ta digno di konfiansa i bèrdat.’” Ken a duna Huan e revelashon inspirá akí? Hesukristu resusitá!—Rev. 1:1; 21:3-5.