Bo Ta Refreskante pa Otro Hende?

NA FINAL di e parti zùit di e kareda di Seru Antilíbano, Seru Hermon ta situá ku su tòp mahestuoso di 2.814 meter riba nivel di laman. Mayor parti di aña e tòp di Seru Hermon ta tapá ku un kapa di sneu. I esaki ta pone ku e vapor kayente di anochi ku ta pasa riba dje ta kondensá i produsí serena. E serena ta baha riba palu di pino i di fruta ku ta na barika di e seru i tambe riba e kunukunan di wendrùif ku ta keda mas abou. Durante Israel di antigwedat su temporada largu di sekura, e serena refreskante ei tabata e fuente prinsipal di humedat pa e vegetashon.

Den un kantika ku Dios a inspirá, e salmista a kompará e union refreskante ku tin entre e adoradónan di Yehova ku e “serena di Seru Hermon, ku ta baha riba e serunan di Sion.” (Salmo 133:1, 3) Meskos ku Seru Hermon ta suministrá serena refreskante na e vegetashon, nos tambe por ta refreskante pa hende ku nos ta topa. Kon nos por logra esei?

Hesus Su Ehèmpel Refreskante

Hesus tabatin un influensia profundo riba otro hende. Asta un enkuentro breve kuné por tabata masha refreskante. Por ehèmpel, e eskritor di Evangelio, Marko, a relatá: “[Hesus] a tuma [“e muchanan,” NW] den su brasa i a bendishoná nan, poniendo su mannan riba nan.” (Marko 10:16) E muchanan ei lo a sinti nan masha kontentu!

Riba Hesus su último anochi na tera komo hende, el a laba pia di su disipelnan. Su humildat mester a konmové nan kurason. Hesus a bisa nan: “Mi a duna boso un ehèmpel, pa boso tambe hasi manera ami a hasi ku boso.” (Juan 13:1-17) Sí, nan tambe mester tabata humilde. Ounke e disipelnan no a komprondé mesora kiko e tabata ke men i mas lat e anochi ei a kuminsá pleita ku otro tokante kua di nan tabata mas grandi, Hesus no a rabia. Mas bien, ku pasenshi el a rasoná ku nan. (Lukas 22:24-27) Asta “ora ku [Hesus] a wòrdu zundrá, e no a zundra bèk.” De echo, “ora ku el a sufri, e no a menasá, ma a konfia su mes na Esun ku ta husga ku hustisia.” Hesus su ehèmpel refreskante ta digno di ser imitá.—1 Pedro 2:21, 23.

Hesus a bisa: “Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu [òf, “refreskamentu,” NW] pa boso alma.” (Mateo 11:29) Imaginá bo, risibí instrukshon for di Hesus personalmente! Despues ku e hendenan den su teritorio natal a tend’é siña hende den nan snoa, nan a keda asombrá i a bisa: “For di unda e hòmber aki a haña e sabiduria aki i e podernan pa hasi milager?” (Mateo 13:54) Ora nos lesa tokante Hesus su bida i ministerio, esaki por siña nos vários manera ku nos por ta refreskante pa otro hende. Laga nos konsiderá kon Hesus a pone un ekselente ehèmpel mediante abla edifikante i un aktitut di ta kla pa yuda.

Papia na un Manera Edifikante

Ta muchu mas fásil pa destruí un edifisio ku konstruí un nobo. E mesun prinsipio ei tokante destruí i konstruí ta konta pa nos abla. Komo hende imperfekto, nos tur tin nos debilidatnan. Rei Salomon a bisa: “No tin hende hustu riba tera ku kontinuamente ta hasi bon i nunka ta peka.” (Eklesiastés  7:20) Ta fásil pa mira fayo di un otro persona i kibr’é ku remarkenan skèrpi. (Salmo 64:2-4) Di otro banda, pa papia na un manera edifikante sí nos tin ku hasi esfuerso.

Hesus a usa su lenga pa edifiká hende. El a ofresé nan refreskamentu spiritual, mediante predikashon di e bon nobo di Reino. (Lukas 8:1) Ademas, Hesus a refreská esnan ku a bira su disipel dor di revelá su Tata selestial na nan. (Mateo 11:25-27) P’esei, no ta nada straño ku hende a sinti nan atraí na Hesus!

Na kontraste, e eskriba- i fariseonan no a tene kuenta ku e nesesidatnan di otro hende. Hesus a bisa: “Nan ta gusta e lugá di onor na bankete, i e mihó asientonan den snoa.” (Mateo 23:6) De echo, nan tabata menospresiá hende komun, bisando: “E multitut aki, ku no konosé e Lei, ta maldishoná.” (Juan 7:49) Nan aktitut sigur no tabata refreskante!

Hopi bes nos abla ta un refleho di loke nos ta di paden i di e manera ku nos ta mira otro hende. Hesus a bisa: “E bon hende, for di e bon tesoro di su kurason, ta saka loke ta bon; i e mal hende, for di e mal tesoro, ta saka loke ta malu; pasobra for di e abundansia di kurason su boka ta papia.” (Lukas 6:45) Pero kiko nos tin ku hasi anto pa nos abla por ta refreskante pa otro hende?

Pa kuminsá, nos tin ku tuma tempu pa pensa promé ku nos papia. Proverbionan 15:28 ta bisa: “Kurason di e hustu ta studia bon kon pa kontestá.” Nos no tin nodi tuma hopi tempu pa pensa. Si nos para ketu djis un ratu asina, por lo general nos por determiná ki efekto nos komentarionan lo tin riba otro hende. Nos lo por puntra nos mes: ‘Loke mi ta bai bisa aki ta algu amoroso? E ta basá riba bèrdat, òf ta simplemente ‘loke nan di’? E ta “un palabra duná na ora”? Lo e refreská i edifiká esnan ku mi ta bai papia kuné?’ (Proverbionan 15:23) Si nos yega n’e konklushon ku loke nos ta pensa ta negativo òf ku e no ta oportuno, laga nos hasi esfuerso konsiente pa deshasí di dje. Mihó ainda, dikon no trata di remplas’é ku algu mas positivo i apropiá? Palabranan ku hende ta papia sin pensa ta manera “hinká di spada,” miéntras ku komentarionan positivo ta un “kuramentu.”—Proverbionan 12:18.

Un otro kos ku por yuda nos ta, di enfoká riba loke ta hasi nos kompañeronan di fe presioso den bista di Dios. Hesus a bisa: “Ni un hende no por bin serka mi, si no ta e Tata ku a manda mi a hal’é.” (Juan 6:44) Yehova ta mira kualidatnan positivo den kada un di su sirbidónan fiel, asta den esnan ku na nos pareser tin un personalidat difísil. Ora nos ta hasi esfuerso pa identifiká nan bon kualidatnan, nos lo tin motibu pa papia kosnan positivo di nan.

Yuda Otro Hende

Hesus tabatin pleno komprondementu di e situashon penoso di e hendenan oprimí. Sí,  “ora ku el a mira e multitutnan, el a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:36) Pero Hesus a hasi mas ku djis mira nan kondishon deplorabel; el a hasi algu pa yuda nan. El a ekstendé e invitashon: “Bin serka mi tur ku ta kansá i kargá, i lo mi duna boso sosiegu [òf, “refreská boso,” NW].” Ademas, el a duna nan e siguransa aki: “Mi yugo ta suave i mi karga ta lihé.”—Mateo 11:28, 30.

Awe nos ta biba den “tempunan trabahoso.” (2 Timoteo 3:1) Hopi hende ta sinti nan kargá ku “e preokupashonnan di e mundu aki.” (Mateo 13:22) Otronan ta karga e peso di sirkunstansianan personal difísil. (1 Tesalonisensenan 5:14) Kon nos por duna refreskamentu na hende den nesesidat? Meskos ku Kristu, nos por yuda aliviá nan karga.

Algun hende ta trata di deshogá nan mes dor di papia tokante nan problemanan. Si personanan deprimí bin buska yudansa serka nos, nos ta tuma tempu pa skucha nan ku atenshon? Pa nos por ta un oyente kompasivo, nos tin ku dominá nos mes. Esaki ta enserá keda konsentrá riba loke e otro persona ta bisando, i no pensa kon pa kontestá òf kon pa resolvé e problema. Ora nos ta skucha e persona ku atenshon, ta mantené kontakto visual i ta smail ora esei ta apropiá, nos ta mustra ku nos ta interesá den dje.

Den e kongregashon kristian tin hopi oportunidat pa nos animá nos kompañeronan di fe. Por ehèmpel, ora nos ta asistí na reunionnan na Salòn di Reino, nos por wak ken ta esnan ku ta lucha ku problema di salú. Tin biaha ta solamente un par di minüt promé òf despues di e reunion nos tin mester pa animá nan. Nos por tuma nota tambe di esnan ku tabata ousente na e Estudio di Buki di Kongregashon kaminda nos ta asistí. Podisé nos por yama nan na telefòn i mustra ku nos ta interesá den nan bienestar òf ofresé nos yudansa.—Filipensenan 2:4.

Ansianonan kristian tin un karga di responsabilidat pisá den e kongregashon. Nos por hasi hopi pa yuda aliviá nan karga dor di koperá ku nan i kumpli humildemente ku kualke asignashon ku nos por risibí. E Palabra di Dios ta urgi nos: “Obedesé boso lidernan i someté boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i no ku tristesa, pasobra esaki lo no ta bentahoso pa boso.” (Hebreonan 13:17) Ora nos ta desplegá un aktitut dispuesto, nos por refreská esnan “ku ta goberná bon.”—1 Timoteo 5:17.

Semper Papia na un Manera Edifikante i Hasi Bon Obra

Serena refreskante ta resultado di míles di gota chikitu di awa ku ta kai suavemente, komo si fuera, for di nada. Asina tambe, probablemente e refreskamentu ku nos ta duna otro hende no ta resultado di un solo akto noble. Mas bien, e ta resultado di un akumulashon di kualidatnan manera esnan di Kristu ku nos ta manifestá tur ora bai.

Apòstel Pablo a skirbi: “Stima otro ku amor fraternal; duna preferensia na otro den onor.” (Romanonan 12:10) Laga nos sigui Pablo su konseho. Mediante nos abla i echonan, laga nos ta realmente refreskante pa otro hende.

[Plachinan na página 29]

E serena di Seru Hermon—un fuente refreskante di humedat pa e vegetashon

[Plachi na página 30]

Un skuchadó kompasivo ta refreskante pa otro hende