Kon Hende Ta Ser Uní Mundialmente?

KON lo bo definí e palabra “union”? Pa algun hende, e palabra simplemente ta nifiká ku no tin frikshon ni konflikto. Por ehèmpel, si dos òf mas nashon ta firma un tratado i ta bai di akuerdo ku sierto kondishonnan pa mantené pas, hende lo por bisa ku tin union entre nan. Pero esei ta realmente e kaso? No nesesariamente.

Pensa riba esaki: Atraves di historia, míles di tratado di pas a ser firmá i kibrá. Dikon? Esei ta asina pasobra hopi biaha e lidernan di mundu ta mas preokupá ku nan propio supremasia òf poder ku nan ta preokupá ku pas òf union. Anto tin tambe algun nashon ku tin miedu di loke por pasa si nan forsa militar kai atras na komparashon ku otro nashonnan.

Pues, e echo ku dos nashon no ta den guera ku otro no ta nifiká ku nan ta uní i na pas ku otro. Dikon? Pensa riba esaki: Ora dos hòmber ta mek pistol riba otro, bo por bisa ku nan ta na pas ku otro djis pasobra niun di dos no a hala e gai? Lo ta un bobedat pa pensa esei! Sin embargo, esei ta e situashon di hopi nashon awe. E deskonfiansa ku ta oumentando ta duna hende miedu ku un dia e nashonnan lo usa nan armanan. Kiko hende a hasi pa evitá e desaster ei?

Miedu di Arma Nuklear—Un Menasa pa Union

Hopi hende ta pone nan konfiansa den e Tratado pa No Produsí Arma Nuklear (NPT). E tratado aki ku a ser aprobá na 1968, ta prohibí paisnan ku no tin arma nuklear di produsí esakinan i ta pone un límite na e produkshon den paisnan ku tin nan kaba. NPT—aprobá awor pa mas ku 180 nashon—tin e meta pa finalmente logra desarmá e nashonnan kompletamente.

Ounke e meta aki por parse unu noble, algun krítiko ta pensa ku NPT ta djis un intento pa tene sierto paisnan for di e “klup di arma nuklear,” esta, pa evitá ku e nashonnan ku no tin arma nuklear ta bai produsí nan. P’esei, hende tin miedu ku algun pais ku a firma e tratado kisas ta pensa otro awor. Sí, algun nashon ta pensa ku ta masha inhustu ku mester prohibí nan di produsí arma, ku na nan opinion, lo por yuda nan protehá nan mes.

 Loke ta hasi e kuestion mas kompliká—kisas asta oumentá e riesgonan di peliger—ta e echo ku no a prohibí ningun nashon di produsí energia nuklear. Esaki a pone algun hende teme ku nashonnan ku supuestamente ta usa energia nuklear pa propósitonan pasífiko lo por ta produsiendo armanan nuklear na sekreto.

Podisé asta nashon ku ya kaba tin armanan nuklear ta ignorá NPT. Krítikonan ta bisa ku lo ta un bobedat pa spera ku nashonnan ku ta bon armá lo eliminá òf sikiera redusí nan arsenal. Segun un fuente, “pa logra esaki . . . mester bin asina un grado di amistat i konfiansa entre e paisnan ku aktualmente ta oponé otro ku [ta difísil pa kere ku] esaki hamas lo sosodé.”

Hende su esfuersonan pa logra union, sin importá kon sinsero nan tabata, a resultá en bano. Esaki no ta un sorpresa pa hende ku ta studia Beibel, pasobra e Palabra di Dios ta bisa: “No ta keda na hende pa dirigí su pasonan.” (Jeremias 10:23) Ku frankesa Beibel ta bisa tambe: “Tin un kaminda ku ta parse bon den bista di hende, ma su fin ta e kaminda di morto.” (Proverbionan 16:25) Gobièrnunan humano ta limitá den loke nan por hasi pa logra union. Sin embargo, nos no ta sin speransa.

E Fuente di Berdadero Union

Segun Beibel, Dios ta primintí ku mundu lo ser uní, pero no mediante esfuersonan di hende. E Kreadó, kende su propósito ta pa hende rònt mundu biba na pas, lo logra loke hende no por. Pa algun hende esaki kisas ta difísil pa kere. Sin embargo, for di prinsipio Dios su propósito tabata pa hende biba na pas i den armonia. * Hopi teksto di Beibel ta duna evidensia ku Dios su propósito pa uni e rasa humano no a kambia. Laga nos konsiderá djis algun ehèmpel:

• “Bin, mira e obranan di SEÑOR, kende a hasi desolashonnan [òf, “susesonan asombroso,” NW] riba tera. E ta hasi gueranan stòp te na e fin di tera; E ta kibra bog i ta kòrta lansa na dos; e ta kima e garoshinan ku kandela.”—SALMO 46:8, 9.

• “Nan lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.”—ISAIAS 11:9.

• “E lo traga morto pa semper, i Señor DIOS lo seka awa di wowo for di tur kara. E lo kita e reproche di su pueblo for di henter tera, pasobra SEÑOR a papia.”—ISAIAS 25:8.

• “Ma segun su promesa nos ta sperando shelunan nobo i un tera nobo, den kual ta biba hustisia.”—2 PEDRO 3:13.

• “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—REVELASHON 21:4.

 E promesanan ei ta konfiabel. Dikon? Pasobra komo e Kreadó, Yehova tin e poder i abilidat pa uni humanidat. (Lukas 18:27) I e tin e deseo tambe pa hasi esei. De echo, Beibel ta yama e deseo ei Dios su “[“gustu,” NW] . . .  pa . . . reuní huntu tur kos den Kristu, tantu loke ta den e shelunan komo loke ta riba tera.”—Efesionan 1:8-10.

Dios su promesa di “un tera nobo” den kua ‘hustisia ta biba’ no ta un soño ku no por ser realisá. (2 Pedro 3:13) Relashoná ku loke el a primintí, Yehova a bisa: “E lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:11.

Uní Mediante e Palabra di Dios

Manera e artíkulo anterior a mustra, hopi bes religion a yuda dividí hende en bes di uni nan. Nos mester pensa seriamente riba e asuntu aki, pasobra si nos ta atmití ku tin un Kreadó, no ta rasonabel pa spera ku su adoradónan lo ta biba na pas i den union ku otro? Sigur ku sí!

E echo ku religion ta kousa divishon no ta un refleho di Yehova Dios i su Palabra. Mas bien, e ta demostrá e defisiensia di religionnan ku ta promové plannan di hende pa alkansá union en bes di apoyá Dios su propósito. Hesus a yama e lidernan religioso ku a biba den su tempu ‘hipókrita,’ i el a bisa nan: “Ku rason Isaias a profetisá di boso, bisando: ‘E pueblo aki ta onra mi ku nan lepnan, ma nan kurason ta leu for di mi. I ta en bano nan ta adorá mi, siñando preseptonan di hende komo doktrina.’”—Mateo 15:7-9.

Na kontraste, adorashon berdadero ta uni hende. Profeta Isaias a predisí: “Lo sosodé den e último dianan ku e seru di e kas di SEÑOR lo wòrdu establesí komo e seru prinsipal, i lo wòrdu halsá mas haltu ku e seritunan; i tur nashon lo basha bai na dje. I e lo husga entre e nashonnan, i lo reprendé hopi pueblo. I nan lo bati nan spadanan traha plug ku nan, i nan lo bati nan lansanan traha skèr-pa-snui ku nan. Nashon lo no lanta spada kontra nashon, i nunka mas nan lo train pa guera.”—Isaias 2:2, 4.

Awe den mas ku 230 pais, Testigunan di Yehova ta siguiendo e instrukshonnan ku Yehova Dios ta duna relashoná ku maneranan pa logra union. Kiko ta e base di nan union? Apòstel Pablo a skirbi: “Bisti amor, kual ta e laso perfekto di unidat.” (Kolosensenan 3:14) E palabra griego ku Pablo a usa pa “laso” por referí na e kabuyanan den e kurpa humano. E kabuyanan ei ta masha fuerte i nan tin dos funshon masha importante. Nan ta mantené e órganonan di e kurpa na nan lugá, i nan ta tene e wesunan huntu.

Den kaso di amor ta meskos. E kualidat aki ta hasi mas ku simplemente evitá ku hende ta mata otro. Amor manera esun di Kristu ta yuda hende ku diferente background funshoná huntu den un manera pasífiko. Por ehèmpel, e ta yuda hende biba na armonia ku loke generalmente ta ser yamá e Regla di Oro. Segun Mateo 7:12, Hesukristu a bisa: “Tur loke boso kier pa hende hasi pa boso, hasi meskos pa nan.” Hopi hende ku a apliká e prinsipio aki por a vense prehuisio.

“Amor un pa Otro”

Testigunan di Yehova ta determiná pa proba ku nan ta disipelnan di Kristu dor di kumpli ku loke Hesus a bisa, esta: “Tur hende lo sa ku boso ta mi disipel, si boso tin amor un pa otro.” (Juan 13:35) Nan a demostrá e amor ei na un manera remarkabel ora tabatin konfliktonan rasial i turbulensia polítiko. Por ehèmpel, durante e genosidio di 1994 na Ruanda, Testigunan di Yehova a demostrá nan amor pa otro.  Testigunan di e tribu hutu a riska nan bida pa protehá nan rumannan di e tribu tutsi!

Klaru ku ta irealístiko pa nos spera ku e nashonnan di mundu lo desaroyá amor pa próhimo te n’e grado ku nan lo logra un mundu uní. Di akuerdo ku Beibel, ta Yehova lo logra esei na su debido tempu. Sin embargo, asta for di awor hende por bisti nan mes ku amor i asina uni ku otro.

Aña pasá, Testigunan di Yehova a dediká mas ku mil mion ora na bishitá hende i papia ku nan tokante Beibel i su balor den nos mundu djawe. Konosementu eksakto di e Palabra di Dios a uni miónes di hende, di kua algun tabata odia otro anteriormente. El a uni arabir ku hudiu, armenio ku turko, aleman ku ruso, djis pa menshoná algun.

Lo bo ke siña mas di e maneranan ku Beibel, e Palabra di Dios, ta uni hende? Si esei ta e kaso, sea asina bon di tuma kontakto ku Testigunan di Yehova den bo bisindario, òf skirbi na e adrès apropiá na página 2.

[Nota]

[Komentario na página 4]

Míles di tratado di pas a ser firmá i kibrá

[Komentario na página 7]

Aplikashon di prinsipionan bíbliko a logra loke gobièrnunan humano no por logra

[Plachi na página 5]

E Palabra di Dios ta indiká ken ta e Fuente di berdadero union

[Plachi na página 7]

Testigunan di Yehova di e tribunan hutu i tutsi ta konstruí un lugá di adorashon huntu