Guia Divino pa Scoge un Casá

“Lo mi haci pa bo tin perspicacia i instruí bo den e caminda cu bo mester bai. Lo mi duna conseho cu mi wowo riba bo.”—SALMO 32:8.

1. Ki factornan ta necesario pa un matrimonio exitoso?

UN ACROBAT ta lansa su mes for di e trapesio den laira, rápidamente ta dobla su curpa, i ábilmente ta dal koprol den haltu. E ta stret su curpa, rek su man i un otro acrobat cu ta cologá cabes abou na e otro banda ta gar’é. Un pareha ta schaats huntu suavemente riba un pista di ijs. Di ripiente, e homber ta hisa su partner i ta push’é bai haltu. E muher ta drei rond rápidamente, ta baha elegantemente riba un solo schaats, i huntu nan ta sigui bira den círculo riba ijs. Ámbos presentacion ta parce fácil. Sin embargo, ken lo purba haci e presentacion ei sin train, sin un partner capas, i principalmente sin e clase di guia of instruccion adecuá. Di igual manera, un bon matrimonio por parce djis un cos di casualidad. Sin embargo, matrimonio tambe ta dependé di un bon partner, esfuerso coordiná i specialmente di conseho sabí. Sí, bon guia ta esencial.

2. (a) Ken a instituí e areglo matrimonial, i cu ki propósito? (b) Con a regla algun matrimonio?

² Ta normal pa un hóben soltero pensa riba un futuro casá, un partner den bida. For di e tempu cu Jehova Dios a instituí matrimonio di un homber i un muher, esaki tabata un manera normal di bida. Pero e promé homber, Adam, no a scoge su casá. Jehova amorosamente a proveé un esposa p’e. (Génesis 2:18-24) E promé pareha mester a multiplicá di tal manera cu e tera cu tempu lo a yena cu hende. Despues di e promé union ei, tabata e mayornan dje bruid i bruidegom cu generalmente a scoge un casá, tin bes despues di e consentimentu di esnan enbolbí. (Génesis 21:21; 24:2-4, 58; 38:6; Hosué 15:16, 17) Maske scogementu di casá pa yu ta comun ainda den algun pais i cultura, awe hopi hende mes ta scoge nan casá.

3. Con tin cu scoge un casá?

³ Con tin cu scoge un casá? Tin hende ta ser influenciá dor di aparencia: loke ta agradabel i deseabel pa bista. Otro hende ta busca beneficio material: un hende cu lo cuida nan bon i cu lo satisfacé nan necesidad i deseo. Pero e tipo di enfoke aki so lo hiba na un relacion felis i satisfaciente? “Encanto por ta falsu, i bunitesa por ta bano,” Proverbionan 31:30 ta bisa, “pero e muher cu ta teme Jehova ta esun cu ta percurá alabansa pa su mes.” I ta ei ta sinta un punto importante: Tuma Jehova na cuenta ora di scoge un casá.

Guia Amoroso di Dios

4. Ki yudansa Dios ta percurá relacioná cu e asuntu di scoge un casá?

⁴ Nos amoroso Tata celestial, Jehova, a proveé su Palabra skirbí pa guia nos den tur asuntu. E ta bisa: “Ami, Jehova, ta bo Dios, Esun cu ta siña bo beneficiá bo mes, Esun cu ta haci bo stap den e caminda den cua bo mester cana.” (Isaías 48:17) Pues, no ta nada straño pa haña guia den Bijbel cu a proba di ta eficas pa scoge un casá. Jehova kier pa nos matrimonio ta duradero i felis. P’esei, el a percurá yudansa pa nos comprendé i aplicá e instruccionnan aki. Esei no ta loke nos lo verwagt di nos amoroso Creador?—Salmo 19:8.

5. Kico ta vital pa nos por tin felicidad duradero den matrimonio?

 ⁵ Ora Jehova a instituí e areglo matrimonial, su intencion tabata pa esaki por ta un laso duradero. (Marco 10:6-12; 1 Corintionan 7:10, 11) Esei ta e motibu pakico “el a odia divorcio,” i ta permitié solamente a base di “fornicacion.” (Malakías 2: 13-16; Mateo 19:9) Kier men, scoge un casá ta un di e pasonan di mas serio cu nos por tuma i ta algu cu no mester ser mirá como leve. Masha poco decision tin un potencial asina grandi pa causa felicidad of causa tristesa. Miéntras un bon seleccion por enrikesé bo bida i hacié placentero, un escoho imprudente por trece hopi tristesa. (Proverbionan 21:19; 26:21) Pa felicidad por continuá, ta vital pa scoge sabí i ser dispuesto pa haci un compromiso duradero, pasobra Dios a instituí matrimonio como un relacion cu lo a prosperá si tin armonia i cooperacion.—Mateo 19:6.

6. Di con ta specialmente homber i muhernan hóben tin cu tene cuidou ora di scoge un casá, i con nan por tuma e decision mas sabí?

⁶ Specialmente homber i muhernan hóben mester tene cuidou pa atraccion físico i deseonan fuerte no troce nan dicernimentu ora di scoge un casá. Sin duda, un relacion cu ta basá solamente riba factornan asina rápidamente por terminá den desprecio of asta odio. (2 Samuel 13:15) Di otro banda, amor duradero por ser cultivá segun nos ta siña conocé nos compañero i tambe segun nos ta comprendé nos mes mas mihó. Tambe nos tin cu reconocé cu loke ta mihó pa nos no semper ta loke nos curason ta deseá na promé instante. (Jeremías 17:9) P’esei e guia divino cu tin den Bijbel ta asina importante. E ta yuda nos dicerní cua ta e decision mas sabí pa tuma den bida. E salmista a representá Jehova bisando: “Lo mi haci pa bo tin perspicacia i instruí bo den e caminda cu bo mester bai. Lo mi duna conseho cu mi wowo riba bo.” (Salmo 32:8; Hebreonan 4:12) Maske matrimonio por satisfacé nos necesidad natural pa amor i compañerismo, tambe e ta trece desafionan cuné cu ta rekerí madures i dicernimentu.

7. Pakico algun hende no ta aceptá conseho basá riba Bijbel relacioná cu scogementu di un casá, sin embargo na kico esaki por hiba?

⁷ Ta sabí pa haci caso di loke e Originador di matrimonio tin di bisa en cuanto e asuntu di scoge un casá. Pero kisas tog nos ta rechasá conseho bíblico di mayornan of di ancianonan cristian. Por ta nos ta pensa cu nan  no ta comprendé nos completamente, i deseonan emocional fuerte por impulsá nos pa sigui e inclinacion di e curason. Sin embargo, despues ora nos confrontá e realidad di bida, kisas ta duel nos cu nos no a sigui e conseho sabí duná na nos pa nos mes bon. (Proverbionan 23:19; 28:26) Nos por haña nos mes den un matrimonio sin amor, cu yunan cu nos tin dificultad pa cuida, i kisas asta cu un casá incrédulo. Ki tristu lo ta si un areglo cu lo por a trece hopi felicidad ta bira un fuente di hopi sufrimentu!

Debocion na Dios—Un Factor Crucial

8. Con debocion na Dios ta yuda un matrimonio pa por ta duradero i pa trece felicidad?

⁸ Ta berdad cu atraccion pa otro por fortificá un matrimonio. Pero ta asta mas importante pa tin e mésun balornan pa asina un union matrimonial por dura i producí felicidad. Ora ámbos ta sirbi Jehova Dios, esaki ta moldea nan den un relacion duradero i ta promové unidad den un forma inigualabel. (Eclesiástes 4:12) Ora un pareha cristian ta haci e adoracion berdadero di Jehova e cos mas importante den nan bida, nan ta uní spiritualmente, mentalmente i moralmente. Nan ta studia e Palabra di Dios huntu. Nan ta haci oracion huntu, i esei ta uni nan curason. Nan ta compañá otro bai reunionnan cristian i ta traha huntu den e ministerio di veld. Tur esaki ta yuda forma un laso spiritual cu ta hala nan mas cerca di otro. Asta mas importante ainda, e ta resultá den Jehova su bendicion.

9. Kico Abraham a haci relacioná cu hañamentu di un casá pa Isaac, i cu ki resultado?

⁹ Pa motibu di su debocion na Dios, e fiel patriarca Abraham a busca manera pa agradá Dios ora e momento a yega pa scoge un esposa pa su yu Isaac. Abraham a bisa e criá di cas di confiansa: “Mi mester pone bo hura pa Jehova, e Dios di shelu i e Dios di tera, cu lo bo no tuma un esposa pa mi yu homber for di e yu muhernan di e cananeonan, entre ken mi ta  biba, sino cu lo bo bai mi pais i cerca mi famianan, i abo siguramente lo tuma un esposa pa mi yu homber, pa Isaac. . . . [Jehova] lo manda su angel dilanti bo, i siguramente lo bo tuma un esposa pa mi yu homber for di einan.” Rebeca a resultá di ta un esposa sobresaliente, cu Isaac a stima masha hopi.—Génesis 24:3, 4, 7, 14-21, 67.

10. Ki obligacion Bijbel ta pone riba esposo i esposa?

¹⁰ Si nos ta cristiannan soltero, debocion na Dios lo yuda nos desaroyá cualidadnan cu lo hacié mas fácil pa nos cumpli cu e rekisitonan bíblico di matrimonio. Apostel Pablo a mencioná algun di e cosnan cu esposo i esposanan tin di cumpli cuné como lo siguiente: “Laga esposanan keda sumiso na nan esposo mescos cu na Señor . . . Esposonan, sigui stima boso esposa, mescos cu e Cristo tambe a stima e congregacion i a entregá su mes p’e . . . Esposonan mester ta stimando nan esposa mescos cu nan mes curpa. . . . Laga cada un di boso individualmente stima su esposa mescos cu su mes; en cambio, e esposa mester tin respet profundo pa su esposo.” (Efesionan 5:22-33) Manera nos por mira, e palabranan inspirá di Pablo ta enfatisá e necesidad pa amor i respet. Cumpli cu e conseho aki ta encerá temor respetuoso pa Jehova. E ta rekerí compromiso di henter curason tantu den tempu bon como malu. Cristiannan cu ta pensa pa casa mester ta capas pa asumí e responsabilidad aki.

Dicidí Ki Ora pa Casa

11. (a) Ki conseho e Scritura ta duna relacioná cu ki ora pa casa? (b) Cua ehempel ta mustra e sabiduria di sigui e conseho di Bijbel hañá na 1 Corintionan 7:36?

¹¹ Ta vital pa sa ki ora nos ta cla pa casa. Ya cu esaki ta varia di hende pa hende, e Scritura no ta stipulá un edad. Sin embargo, e ta mustra cu ta mihó pa warda te ora nos “a pasa e flor di hubentud,” cu ta ora deseonan sexual fuerte por afectá bon huicio. (1 Corintionan 7:36) “Ora mi tabata mira mi amiganan ta traha afsprak pa sali i despues ta casa, hopi di nan na edad di tiener, tin bes tabata difícil pa aplicá e conseho aki,” Michelle ta bisa. “Pero mi a realisá cu e conseho ta di Jehova, i e ta bisa nos solamente loke ta pa nos beneficio. Dor di warda pa casa, mi por a concentrá riba mi relacion cu Jehova i haña mas experencia den bida, cu ta imposibel pa bo tin ora bo ta tiener. Algun aña despues, mi tabata mihó prepará pa trata tantu cu e responsabilidadnan como cu e problemanan cu ta lanta den matrimonio.”

12. Di con ta sabí pa no core casa ora bo ta yong?

¹² Esnan cu casa muchu lihé ora nan ta relativamente yong ainda, hopi bes ta descubrí cu nan necesidad i deseonan ta cambia segun cu nan ta madurá. E ora ei nan ta ripará cu cosnan cu promé nan tabata gusta no ta asina importante mas. Un mucha muher cristian tabata determiná pa casa ora e tabatin 16 aña. Su wela a casa cu e edad ei, i su mama tambe. Ora un yoncuman cu e tabata interesá den dje a nenga di casa cuné e tempu ei, el a scoge un otro hende cu tabata dispuesto pa haci esei. Pero mas despues den bida el a lamentá e decision purá cu el a tuma.

13. Kico hopi bes esnan cu ta casa prematuro no tin?

¹³ Ora un hende ta pensa pa casa, ta importante pa e tin un comprendimentu madurá di tur loke esei ta encerá. Un matrimonio prematuro por trece hopi problema cu un pareha yong probablemente no ta bon prepará pa trata cuné. Kisas nan no tin e experencia i madures necesario pa trata cu e preshonnan di matrimonio i di criamentu di yu. Matrimonio ta solamente pa esnan cu ta físicamente, mentalmente i spiritualmente prepará pa cuminsá un relacion duradero.

14. Kico ta necesario pa trata situacionnan cu ta causa tension den matrimonio?

¹⁴ Pablo a skirbi cu esnan cu casa “lo tin tribulacion den nan carni.” (1 Corintionan 7:28) Problema lo presentá dor cu tin dos personalidad diferente, i opinion lo varia. Pa motibu di imperfeccion humano, por ta difícil pa cumpli  cu nos papel bíblico den e areglo matrimonial. (1 Corintionan 11:3; Colosensenan 3:18, 19; Tito 2:4, 5; 1 Pedro 3:1, 2, 7) Madures i stabilidad spiritual ta necesario pa busca i sigui guia divino pa asina resolvé di un manera amoroso situacionnan cu ta causa tension.

15. Ki papel mayornan por hunga den prepará nan yunan pa matrimonio? Ilustrá.

¹⁵ Mayornan por prepará nan yunan pa matrimonio dor di yuda nan comprendé e importancia di sigui guia divino. Dor di usa e Scritura i publicacionnan cristian ábilmente, mayornan por yuda nan yunan determiná si nan of nan prospectivo compañero ta cla pa haci compromiso matrimonial. * Blossom di diesocho aña di edad a pensa cu e tabata enamorá di un yoncuman den su congregacion. E yoncuman tabata un minister pionero di tempu completo, i nan kier a casa. Pero Blossom su mayornan a pidié pa warda un aña dor cu nan tabata sinti cu e tabata muchu yong ainda. Despues Blossom a skirbi: “Mi ta asina gradicidu cu mi a scucha e conseho sabí ei. Durante e aña ei, mi a madurá un poco i a cuminsá mira cu e yoncuman aki no tabatin e cualidadnan necesario pa ta un bon casá. Cu tempu el a bai for di e organisacion, i mi a scapa for di loke lo a bira un desaster den mi bida. Esta maraviyoso ta pa por tin mayornan sabí kende nan dicernimentu ta confiabel!”

‘Casa Solamente den Señor’

16. (a) Con cristiannan por ser poné na prueba en cuanto ‘casa solamente den Señor’? (b) Ora tentacion pa casa cu incrédulo presentá, riba kico cristiannan mester refleccioná?

¹⁶ Jehova su instruccion pa cristiannan ta mashá cla: ‘Casa solamente den Señor.’ (1 Corintionan 7:39) Mayornan cristian i nan yunan kisas por ser poné na prueba den e asuntu aki. Con asina? Hóbennan kisas ta deseá di casa, pero por ta no tin hopi partner disponibel den congregacion. Por lo ménos esei ta loke ta aparentá. Kisas tin ménos homber cu muher den un cierto localidad, of kisas no tin ningun hende den e área cu ta parce apropiado. Un yoncuman cu no ta un miembro dedicá di e congregacion kisas ta mustra interes den un mucha muher cristian (of vise versa), i tin preshon pa ignorá e normanan cu Jehova a pone. Bou di tal circunstancia, lo ta bon pa refleccioná riba e ehempel di Abraham. Un manera cu el a mantené su bon relacion cu Dios tabata dor di haci sigur cu su yu Isaac a casa cu un adoradó berdadero di Jehova. Isaac a haci e mésun cos den caso di su yu Jacob. Esaki a rekerí esfuerso di tur esnan enbolbí, pero esei a agradá Dios i a resultá den su bendicion.—Génesis 28:1-4.

17. Di con casa cu un incrédulo probablemente ta desastroso, i cua ta e motibu mas importante pa ‘casa solamente den Señor’?

¹⁷ Den masha poco caso, e esposo incrédulo despues a bira un cristian. Sin embargo, casa cu hende incrédulo hopi bes a resultá di ta desastroso. Esnan uní bou di yugo desigual no ta compartí e mésun creencia, principio of metanan. (2 Corintionan 6:14) Esaki por tin un efecto perhudicial riba comunicacion i riba felicidad matrimonial. Por ehempel, un señora cristian tabata lamentá mashá cu despues di un reunion edificante e no por bai cas i papia riba cosnan spiritual cu su casá incrédulo. Naturalmente, mas importante ainda, ‘casa solamente den Señor’ ta un asuntu di lealtad na Jehova. Ora nos ta cumpli cu e Palabra di Dios,  nos curason no ta condená nos, pasobra nos ta haci “loke ta agradabel den su bista.”—1 Juan 3:21, 22.

18. Ora un hende ta pensa pa casa, na ki asuntunan importante e mester presta atencion, i di con?

¹⁸ Ora un hende ta pensa pa casa, e birtud i spiritualidad di e prospectivo casá mester ta e cos mas importante. Un personalidad cristian, huntu cu amor pa Dios i debocion di henter alma na dje, ta hopi mas balioso cu atraccion físico. Esnan cu ta apreciá i ta cumpli cu nan obligacion pa ta compañeronan matrimonial spiritualmente fuerte, ta gosa di aprobacion divino. I e fortalesa mas grandi cu un pareha por logra ta bini ora ámbos ta adorá e Creador i ta aceptá su guia completamente. Di e manera aki Jehova ta ser onrá, i e matrimonio ta cuminsá riba un fundeshi spiritual sólido cu lo contribuí na un union duradero.

[Nota]

Con Lo Bo Contestá?

• Di con guia divino ta necesario pa scoge un bon casá?

• Con debocion na Dios lo yuda fortalecé e laso matrimonial?

• Con mayornan por prepará nan yunan pa matrimonio?

• Di con ta importante pa ‘casa solamente den Señor’?

[Preguntanan di Estudio]

[Plachinan na página 17]

Aplicá e conseho di Dios ora di scoge bo casá por resultá den hopi felicidad

[Plachinan na página 18]

Bendicion ricu ta bini di ‘casa solamente den Señor’