Promé Karta pa e Korintionan 11:1-34

  • “Sigui mi ehèmpel” (1)

  • Prinsipio tokante outoridat i tokante tapamentu di kabes (2-16)

  • Selebrashon di Sena di Señor (17-34)

11  Sigui mi ehèmpel, meskos ku ami ta sigui e ehèmpel di* Kristu.+ 2  Mi ta elogiá boso pasobra boso semper ta kòrda riba mi, i boso ta sigui fielmente e instrukshonnan* ku mi a duna boso. 3  Pero mi ke pa boso sa ku Kristu tin outoridat riba* tur hòmber;+ hòmber tin outoridat riba* muhé;+ anto Dios tin outoridat riba* Kristu.+ 4  Ora un hòmber ta hasi orashon òf e ta profetisá* ku su kabes tapá, e hòmber ei ta brongosá e persona ku tin outoridat riba dje.* 5  Pero ora un muhé hasi orashon òf profetisá+ sin tapa kabes, e muhé ei ta brongosá e persona ku tin outoridat riba dje.* E ora ei, ta komo si fuera su kabes ta feitá.* 6  Pasobra si un muhé no ta tapa su kabes, e mester kòrta su kabei. Pero ta un bèrgwensa pa un muhé kòrta su kabei masha kòrtiku òf feita su kabes; p’esei e mester tapa su kabes. 7  Un hòmber no mester tapa kabes, pasobra e ta reflehá e imágen di Dios+ den asuntu di outoridat, i e hòmber ta trese onor pa Dios. Pero un muhé ta trese onor pa un hòmber. 8  Hòmber no a bini di muhé; muhé a bini di hòmber.+ 9  Ademas, Dios no a krea hòmber pa motibu di muhé; Dios a krea muhé pa motibu di hòmber.+ 10  Ta p’esei un muhé mester bisti algu riba su kabes; e ta hasi esei pa mustra ku e ta respetá e outoridat ku hende hòmber tin i pa e angelnan por mira esei.+ 11  Ademas, den e kongregashon di Señor, muhé no por eksistí sin hòmber, ni hòmber no por eksistí sin muhé.* 12  Pasobra meskos ku muhé a ser kreá for di kurpa di hòmber,+ asina tambe hòmber ta nase for di muhé. Pero Dios a krea tur kos.+ 13  Husga pa boso mes: Ta apropiá pa un muhé resa na Dios dilanti di otro hende sin tapa su kabes? 14  E manera ku hende a ser kreá mes ta siña boso* ku ta un bèrgwensa pa hòmber laga nan kabei krese bira largu. 15  Pero si un muhé tin kabei largu, esei ta algu bunita.* Dios a dun’é su kabei komo algu pa tapa kabes. 16  Si un hende no ta di akuerdo ku esei i e kier sigui otro kustumber, boso mester bis’é ku ni nos ni e kongregashonnan di Dios no tin niun otro kustumber. 17  Pero, miéntras mi ta duna boso e instrukshonnan ei, mi ke bisa lo siguiente: Mi no ta elogiá boso, pasobra boso reunionnan ta hasi mas daño ku bon. 18  Pa kuminsá, mi ta tende ku ora boso tin reunion di kongregashon, tin desunion entre boso. I te na sierto grado, mi ta kere esei tambe. 19  Pasobra kasi sigur tin sekta* den boso kongregashon;+ e sektanan ei ta pone ku lo bira bisto ken ta e hendenan ku Dios ta aprobá. 20  Ora boso reuní huntu pa kome Sena di Señor,+ boso no ta hasi esei na e manera korekto. 21  Ora e momento yega pa kome di e sena ei, algun di boso a kome boso mes sena kaba. Di manera ku algun hende tin hamber miéntras ku otro hende ta burachi pasobra nan a bebe di mas. 22  Boso no tin boso mes kas kaminda boso por kome i bebe? Ta menospresiá boso ta menospresiá e kongregashon di Dios? Ta bèrgwensa boso ke laga e rumannan ku ta pober sinti? Kiko mi por bisa boso? Akaso mi mester elogiá boso? Den e asuntu ei, mi no por elogiá boso. 23  Loke mi a siña boso ta loke Señor a siña mi. Riba e anochi+ ku nan lo a traishoná Señor Hesus, el a kohe un pan. 24  Despues di gradisí Dios, el a kibra e pan i bisa: “Esaki ta representá mi kurpa+ ku lo mi entregá pa boso. Sigui hasi esaki na mi memoria.”*+ 25  Despues ku nan a kaba di sena* huntu, el a kohe un kopa+ i pas’é pa nan, bisando: “E kopa akí ta representá e pakto nobo+ ku lo ser konfirmá* ku mi sanger.+ Ki ora ku boso bebe for di e kopa, hasi esei pa kòrda riba mi.”+ 26  Pues, ki ora* ku boso kome di e pan ei i bebe di e kopa ei, boso ta sigui anunsiá morto di Señor, te ora Señor bini. 27  Pues, si un persona kome di e pan òf bebe di e kopa di Señor na un manera ku no ta digno,* e persona ei ta mustra falta di rèspèt pa e kurpa i e sanger di Señor. 28  Kada hende mester saminá su mes bon promé i hasi sigur ku e ta digno.+ E ora ei numa, e tin mag di kome di e pan i bebe di e kopa. 29  Si un hende kome i bebe sin ku e ta realisá ku e kosnan ei ta representá e kurpa di nos Señor, e hende ei ta kondená su mes ora e kome i bebe. 30  Ta p’esei mes hopi di boso ta suak i malu, i basta di boso ta muriendo.*+ 31  Pero si nos saminá nos mes bon, nos lo no ser kondená. 32  Sinembargo, ora nos no hasi esei, nos ta ser husgá; Yehova* ta disipliná nos.+ E ta hasi esei pa nos no ser kondená huntu ku mundu.+ 33  P’esei, mi rumannan, ora boso reuní huntu pa kome Sena di Señor, warda te ora tur hende t’ei. 34  Si un hende tin hamber, e mester kome na kas pa boso no ser kondená ora boso reuní huntu.+ Lo mi regla sobrá asuntu ora mi yega.

Nota

^ Òf: “Imitá mi, meskos ku mi ta imitá.”
^ Lit.: “e tradishonnan.”
^ Lit.: “ta kabes di.”
^ Lit.: “ta kabes di.”
^ Lit.: “ta kabes di.”
^ Òf: “e ta hasi konosí loke Dios a revelá.”
^ Òf: “brongosá su kabes.”
^ Òf: “brongosá su kabes.”
^ Normalmente, ta esklabo tabatin kabes feitá, òf kisas nan tabata feita kabes di un hende muhé ku a kòrta orea di su kasá.
^ Esta, hòmber i muhé tin mester di otro.
^ Òf: “Naturalesa mes ta siña boso.”
^ Òf: “ta un gloria p’e.”
^ Òf: “desunion; vários grupo.” Wak Glosario.
^ Òf: “Sigui hasi esaki pa kòrda riba mi.”
^ Esaki tabata referí na e sena di Pasku Hudiu.
^ Òf: “lo ser seyá.”
^ Òf: “tur biaha; kada bes.”
^ Òf: “bebe di e kopa di Señor sin ku e ta digno.”
^ Es desir, nan tabata suak, malu òf muriendo den sentido spiritual.

Derecho di outor pa e publikashon akí