Karta pa Tito 3:1-15

  • Mustra e debido sumishon na hende den puesto di outoridat (1-3)

  • Sea kla pa hasi bon obra (4-8)

  • Keda leu for di pleitamentu tokante ko’i kèns i di hende ku ta promové sekta (9-11)

  • Algun komentario personal di Pablo i kumindamentu (12-15)

3  Sigui kòrda e rumannan pa nan ta sumiso i obediente na gobièrnu i na hende den puesto di outoridat,+ pa nan ta kla pa tur bon obra, 2  pa nan no papia malu di niun hende ni kana buska pleitu. Mas bien, nan mester ta hende rasonabel.*+ Den tur situashon, nan mester ta suave ku tur hende.+ 3  Pasobra un tempu, nos tambe tabata bobo, desobediente na Dios, i nos tabata ser engañá. Nos tabata sklabisá na vários deseo; nos tabata buska plaser so, i nos tabata hiba un bida yen di maldat i nos tabata envidiá otro hende. Nos tabata masha mal hende mes, i nos tabata odia otro. 4  Sinembargo, Dios, nos Salbador, a demostrá su bondat+ i su amor pa humanidat. 5  Dios a salba nos ora ku el a purifiká nos i asina nos a haña un bida nobo.+ I Dios a salba nos ora el a usa su spiritu santu pa hasi nos un persona nobo.+ El a hasi e kosnan ei pasobra e ta un Dios miserikòrdioso,+ i no pasobra nos a hasi kos hustu.+ 6  Dios a usa Hesukristu, nos Salbador, pa duna nos Dios su spiritu santu na abundansia.*+ 7  Dios a hasi esei pa nos por bira hende* ku tin e speransa di haña e bida eterno ku el a primintí.+ Dios su bondat inmeresí ta hasi posibel ku e por konsiderá nos hende hustu,+ i asina nos por haña e bida ei. 8  E palabranan ei ta konfiabel, i mi ke pa bo keda enfatisá e kosnan ei, pa asina yuda e hendenan ku a kere den Dios enfoká riba sigui hasi bon obra. E kosnan ei ta kos ku ta hopi bon i ku ta benefisiá hende. 9  Pero keda leu for di pleitamentu tokante ko’i kèns i di investigashon tokante lista di nòmber di antepasado i di diskushon i bringamentu tokante Lei, pasobra e kosnan ei no tin niun benefisio i no ta yuda ku nada.+ 10  Si un persona ta promové un sekta,*+ dun’é un promé spièrtamentu i despues un di dos spièrtamentu.+ I si e no hasi kaso, e ora ei, sòru pa bo no tin niun kontakto kuné mas,*+ 11  pasobra bo sa ku e persona ei a desviá for di e kaminda di e bèrdat i ku e ta kometiendo piká. Su komportashon mes ta konden’é. 12  Ora mi manda Artémas òf Tikiko+ serka bo, hasi tur bo esfuerso pa abo bini serka mi na Nikópolis, pasobra mi a disidí di pasa wenter einan. 13  Hasi tur loke bo por pa yuda Zénas i Apolo ku loke nan tin mester pa nan biahe.+ Zénas ta vèrsá den Lei. 14  I nos rumannan* tambe mester siña dediká nan mes na bon obra i yuda hende ku ta den nesesidat urgente,+ pa asina nan por keda produktivo den nan sirbishi.*+ 15  Tur e rumannan ku ta huntu ku mi ta manda kumindamentu pa bo. Kumindá e rumannan den fe ku tin kariño pa nos. Mi ta deseá pa boso tur haña bondat inmeresí di Dios.

Nota

^ Òf: “hende ku no ta keda para riba nan opinion.”
^ Òf: “spiritu santu generosamente.”
^ Òf: “heredero.”
^ Òf: “ta plama siñansa falsu.”
^ Òf: “e ora ei, rechas’é.”
^ Esaki ta referí na e kristiannan na Kreta.
^ Òf: “pa nan no keda sin produsí fruta.”

Derecho di outor pa e publikashon akí