Segundo Krónikanan 21:1-20
21 Yehósafat a bai sosegá serka su antepasadonan, i nan a der’é huntu ku su antepasadonan na Stat di David. Anto Yehóram, yu hòmber di Yehósafat, a bira rei na Yehósafat su lugá.+
2 Yehóram tabatin e siguiente ruman hòmbernan, kendenan tambe tabata yu di Yehósafat: Azarías, Yehièl, Zakarías, Azarías, Mikaèl i Sefatías. Nan tur tabata yu hòmber di Yehósafat, rei di Israel.
3 Nan tata a duna nan hopi regalo di plata i di oro i hopi otro kos balioso. Fuera di e kosnan ei, el a duna nan vários stat fortifiká na Huda.+ Anto el a pasa e reino pa Yehóram,+ pasobra Yehóram tabata e yu mayó.
4 Ora Yehóram a tuma mando di e reino di su tata, Yehóram a mata tur su ruman hòmbernan+ ku spada pa asina sigurá su posishon komo rei. El a mata algun kabesante di Israel tambe.
5 Yehóram tabatin 32 aña dia ku el a bira rei. El a goberná ocho aña na Herúsalèm.+
6 El a sigui mesun rumbo ku e reinan di Israel,+ mesun rumbo ku Ákab i Ákab su famianan* a sigui, pasobra e tabata kasá ku yu muhé di Ákab.+ Yehóram tabata hasi loke tabata malu den bista di Yehova.
7 Pero Yehova no tabata ke kaba ku dinastia* di David debí na e pakto ku el a sera ku David.+ Dios a primintí ku lo e laga e lampi di David i di David su desendientenan bria pa semper.+
8 Den tempu di Yehóram, Édòm a lanta kontra Huda.+ Anto e hendenan di Édòm a nombra nan propio rei.+
9 E ora ei, Yehóram a bai Édòm, huntu ku e komandantenan di su ehérsito i ku tur su garoshinan di guera. Anto den anochi, el a ataká e edomitanan ku a rondoná e i e komandantenan di garoshi di guera, i el a derotá nan.
10 Tòg, te awe e pueblo di Édòm ta sigui oponé outoridat di Huda. E tempu ei, e habitantenan di Libna+ tambe a lanta kontra Yehóram, pasobra el a bandoná Yehova, Dios di su antepasadonan.+
11 Yehóram a traha lugá sagrado*+ den e serunan na Huda, i asina el a pone e habitantenan di Herúsalèm bira infiel na Dios.* Sí, el a pone Huda desviá.
12 Ku tempu, Profeta Elías+ a manda un mensahe por eskrito p’e, bisando: “Esaki ta loke Yehova, Dios di bo antepasado David, ta bisa: ‘Bo no a sigui ehèmpel di bo tata, Yehósafat,+ ni di Rei Asa+ di Huda.
13 Bo ta sigui e mal kamindanan di e reinan di Israel,+ i bo ta pone e pueblo di Huda i e habitantenan di Herúsalèm bira infiel na Dios.*+ Nan a sigui mesun rumbo ku kas di Ákab,+ ku tambe a bira infiel na Dios.* Asta bo a mata bo propio ruman hòmbernan,+ bo mes famianan, kendenan tabata mihó ku bo.
14 P’esei, Yehova ta bai kastigá bo pueblo, bo yunan i bo esposanan severamente. I lo e destruí tur bo pertenensianan.
15 Es mas, lo bo haña un malesa króniko di tripa i hopi otro problema di salú. Dia aden dia afó, lo bo sufri di e malesa ei di tripa, te ku, despues di tempu, bo tripanan ta sali afó.’”
16 Anto Yehova a pone+ e filisteonan*+ i e arabirnan+ ku tabata biba den bisindario di e etiopenan lanta kontra Yehóram.
17 Nan a ataká Huda i invadí e lugá, i nan a bai ku tur pertenensia ku tabatin den kas* di Rei.+ Nan a bai ku e yu hòmbernan di Rei i ku e esposanan di Rei. Yehóakaz,*+ e yu hòmber mas chikitu di Rei, tabata e úniko yu ku a keda atras.
18 Anto Yehova a laga Yehóram haña un malesa di tripa ku no por a kura.+
19 Dos aña despues, e malesa a pone ku Yehóram su tripanan a sali afó, i Yehóram a muri ku doló teribel. Su pueblo no a sende kandela na su onor, manera nan a hasi pa su antepasadonan.+
20 Yehóram tabatin 32 aña dia ku el a bira rei. El a goberná ocho aña na Herúsalèm. Niun hende no a lamentá su morto. Nan a der’é na Stat di David,+ pero no den e grafnan di e reinan.+
