Panagaral na Biblia​—Kasin Parad Sika Itan?

“AGNAYARIN basaen no anggapoy pari.” Onian pasakbay so naromog ed bandad unaan na pigaran Biblia a kayarian na saray Katoliko. “Bilang Katoliko et mataltalag a nisasalaysay so Biblia ed sikami,” kuan nen Kay Murdy na Catholic Bible Institute diad Los Angeles, “balet ta manguuman la itan [a situasyon].” Inkuanto a bektan namoria la na saray Katoliko a say Masanton Kasulatan so maka-impluensia’d bilay da, “nabayuboan dan mismo so pankaliktan da ed Biblia.”

Nipaakar ed sayan pananguman, inaon na magasin a U.S. Catholic so imbaga na sakey a coordinator na edukasyon parad relihyon, a liknaen na saray Katoliko ya akilimog ed saray grupo na panagaral na Biblia a “sikaray akibotan bilang Katoliko, tan wala manayay daakan a kayamanan ed Biblia. Labay dan nagamoran itan a daakan a kayamanan a liknaen dan agnipagamor ed sikara.”

Iyan lan ontan, anto ta’y “kayamanan” ditan a kaukolan ya anapen na sakey a manaaral na Biblia? Isipen pa iya: Labay mo ta ya amtaen no panon a natalonaan iray kapagaan ed inagew-agew a kabibilay? Panon mon napansiansia so kareenan ed loob na pamilya? Akin a walay awawey a pirmin maruksa tan masumpa ed totoo? Anto ta so sengegan na karawalan ed limog na saray kalangweran natan? Saray napanmatalkan ya ebat ed saraya tan ed arum niran makapawetwet a tepet so naromog ed Salitay Dios, say Biblia, tan talagan magmaliw iratan a “kayamanan,” on, aliwa lambengat a parad saray Katoliko odino Protestanti noagta ontan met ed saray Buddhista, Hindu, Muslim, Shintoista, pati ni ingen ed saray ateista tan agnostiko. Singa inkuan la na salmista, ‘Say salita [na Dios] sikato so sakey a silewan ya onkana ed saray salisali to, tan sakey a liwawa ya onkana ed saray basbas to.’ Nayarin magmaliw met ya ontan ed sika.​—Salmo 119:105.