Tito 2:1-15
2 Balet sika, itultuloy mon salitaen no antoran bengatla so manepeg ed suston bangat.
2 Saray mamasiken et maadia ra komon ed kagagawa ra, seryoso ra, maabig so panagnonot da, walaan ira na mabiskeg a pananisia, panangaro, tan panagsungdo.
3 Ontan met, saray akukulaw et mapagalang komon so kakikiwas da, aliwa ran managpauges, aliwa ran mainum na alak, maong so ibabangat da;
4 pian napanonotan da iray malangwer a bibii ya aroen da iray kaasawaan da tan aroen da iray anak da,
5 a maabig komon so panagnonot da, masimpit ira, amta ray mankimey diad abung, maong ira, mapasakop ira ed kaasawaan dan dili, ta pian agpansalitaan na mauges so salita na Dios.
6 Ontan met, itultuloy mon pasesegen iray malangwer a lalaki a maabig komon so panagnonot da,
7 diad amin a bengatla et ipanengneng mo a sakey kan ehemplo na maabig iran gawa; nepeg ya ibangat mo iray maabig a bengatla, seryoso ka,
8 maabig so panagsalitam ya ag-itan nabalaw; ta pian nabaingan imay onsusumpa tan anggapoy mauges a nibaga to nipaakar ed sikatayo.
9 Saray aripen et manpasakop komon ed saray amo ra diad amin a bengatla, tan paliketen da ran maong, ag-ira komon maebat,
10 ag-ira mantatakew, noag ingen ipatnag da so sigpot a katooran, ta pian diad amin a bengatla et nipanengneng day karakep na bangat na Dios a Manangilaban tayo.
11 Ta impatnag la na Dios so agnaparaan a kaabigan to a saya so kilabanan na amin a klase na totoo,
12 ya ibabangat to itayon mangipulisay ed ag-inkamaridios tan minumundo iran pilalek tan manbilay itayon walaan na maabig a panagnonot tan inkatunong tan maridios a debosyon diad sayan peles a sistema na mundo,
13 legan tayon aalagaren so maliket ya ilalo tan say maglorian kiparungtal na makapanyarin-amin a Dios tayo tan si Kristo Jesus a Manangilaban tayo,
14 ya inter toy inkasikato parad sikatayo pian niliktar to itayo ed amin a klase na kaugsan tan nalinisan to itayo pian magmaliw itayon totoo a parad sikato labat, a maseseg ed maabig iran gawa.
15 Itultuloy mon salitaen irayan bengatla tan mamaseseg ka tan mamaat ka unong ed niiter ed sikan autoridad a mangiganggan. Anggapo komon so manleglemew ed sika.
