Santiago 3:1-18
3 Agagik, aliwan amin ed sikayo et nepeg a magmaliw a managbangat, lapud amta tayo a makaawat itayo na mas ambelat a panangukom.
2 Ta amin tayo et naynay a nalilingo.* No walay agnalilingo ed panagsalita to, sikatoy ayadyari, a nakontrol to met so interon laman to.
3 No inan tayoy pakalat iray sangi na saray kabayo pian ontulok ira ed sikatayo, napatulok tayo met so interon laman da.
4 Nia! Anggan saray baloto, anggano abalbaleg iratan tan itutulak na mabiskeg a dagem, saratan so niiwas-iwas na melmelag a timon ed inerman a labay a pangipaarapan na too a mamebemben ed satan.
5 Kanian ontan met, say dila et melmelag a kabiangan na laman ingen ta makapanggawa na alablabas iran panagpasirayew. Nia! Anggan say melag ya apoy et napoolan to so maaw-awang a kakiewan!
6 Sirin, say dila et sakey ya apoy. Diad amin a kabiangan na laman tayo, say dila so napno na kaugsan, lapud dudutakan toy interon laman tan popoolan toy interon panagbilay na sakey tan poolan itan na Gehenna.*
7 Ta say amin a klase na atap ya ayep ontan met iray manok tan say pinalsan onkukurong tan pinalsa ed dayat et papaamoen tan napapaamo la na katooan.
8 Balet say dila et agnapaamo na anggan siopa ed katooan. Sakey a bengatlan agnakontrol tan makaderal, a napno na makapatey a samal.
9 Uusaren tayo itan pian idayew si Jehova, say mismon Ama, ingen ta uusaren tayo met itan pian isamba iray totoo ya apalsan “kaulibay na Dios.”
10 Diad saksakey a sangi et ompapaway so panangidayew tan panag-ayew.
Aliwan manepeg, agagik, a sarayan bengatla et mantultuloy a nagawa ed onian paraan.
11 Kasin ompaway ed saksakey a subol so masamit tan ampait a danum?
12 Agagik, kasin makapanbunga na olibo so kiew ya igos odino say ubas et makapanbunga na igos? Say maasin a subol et agmet mamawala na masamit a danum.
13 Siopa ed sikayo so marunong tan makatalos? Ipanengneng to itan diad panamegley na maabig a kagagawa to, diad saray gawa ya atekepan na inkauyamo a manlalapud karunongan.
14 Balet no walad kapusoan yo so alabas ya imon tan makolkol ya awawey, agkayo komon manpapasirayew tan mantitila sumpad katuaan.
15 Aliwa iyan karunongan a manlalapud tagey, noagta mangaraldalin, inaayep, tan dinedemonyo.
16 Ta no iner so kawalaan na imon tan pankokolkol, diman so kawalaan na gulo tan amin a mauges a bengatla.
17 Balet say karunongan a manlalapud tagey, unona ed amin et malinis, insan mareen, makatunongan,* akaparaan ya ontulok, napno na panangasi tan maong a bungabunga, agmanangidumaduma, agmansimpisimpitan.
18 Niarum ni, say bukel na bungay inkatunong et intanem diad mareen iran kipapasen parad saramay mikakareenan.
